«Astana» fýtbol komandasynyń shabýylshysy Patrık Tvýmasıge Gana eliniń astanasy Akkra qalasynda shabýyl jasaldy, dep habarlady vesti.kz.
22 jastaǵy fýtbolshy merekege qarsy óz eline kelgen. Qarý asynǵan adamdar Tvýmasıdiń úıine basa-kóktep kirip, baǵaly zattary men aqsha alyp ketken.
«Olar tapanshasyn kezenip turǵandyqtan qarsy kúsh qoldana almadym. Otbasymdy óltiretinin aıtyp, qymbat zattarymdy alyp ketti», – deıdi Tvýması.
Qazirgi kúni polısııa urlyq jasaý isi boıynsha tergeý jumystary júrgizilip jatyr. Fýtbolshynyń aıtýynsha, 29 myń dollar (9,7 mıllıon teńge) qoldy bolǵan.
«Bul oqıǵadan keıin otbasymnyń aman qalǵany úshin Jaratqanǵa alǵysym sheksiz. Shabýyl jasaǵandar qomaqty qarjy men baǵaly zattardy alyp ketti. Degenmen, biz tirimiz. Bul bárinen de mańyzdy», – dedi «Astana» oıynshysy.