Búgin elimizdiń basym bóliginde atmosferalyq frontaldy bólikterdiń ótýine baılanysty turaqsyz aýa raıy saqtalady. Ońtústiktiń keı jerlerinde qatty jaýyn-shashyn kútiledi. Jekelegen aýmaqtarda burqasyn, tuman, kóktaıǵaq bolyp, jel kúsheıedi, dep habarlady «Qazgıdromet» RMK.
Aqmola, Batys Qazaqstan, Aqtóbe, Soltústik Qazaqstan, Pavlodar, Qaraǵandy oblystarynyń keı jerlerinde burqasyn kútiledi, al Aqmola, Batys Qazaqstan, Qaraǵandy oblystarynda jeldiń ekpini 15-20 m/s kúsheıedi.
Jambyl, Ońtústik Qazaqstan, Qyzylorda oblystarynyń keı jerlerinde tuman, kóktaıǵaq bolyp, jeldiń jyldamdyǵy 15-23 m/s artady, sondaı-aq Qyzylorda oblysynda burqasyn soǵady.
Mańǵystaý oblysynda, kúndiz Atyraý oblysynyń keı jerlerinde jel 15-20 m/s kúsheıedi, Mańǵystaý oblysynyń jekelegen jerlerinde kóktaıǵaq boljanýda.
Qostanaı, Shyǵys Qazaqstan oblystarynyń keı jerlerinde burqasyn, tuman bolady, Shyǵys Qazaqstan oblysynda jeldiń jyldamdyǵy 15-20 m/s artady.
Almaty oblysynyń Jalańashkól aýdanynda jel 17-22 m/s kúsheıip, túnde keı jerlerinde tuman kútiledi.
Túnde Soltústik Qazaqstan oblysynyń keı jerlerinde qatty aıaz bolýy múmkin.