Ortopedııa – adamnyń tirek, qozǵalys júıelerin retke keltirýdi maqsat etetin medısınanyń, sonyń ishinde hırýrgııanyń basty bir salasy. Munyń úsh tarmaǵy bar eken. Bular dene bitiminiń kemistiginiń aldyn alý, emdeý jáne ota jasaý bolyp tabylady. Búgingi kúni ortopedııalyq-travmotologııalyq sala adamdarǵa qyzmet jasaý baǵytyna qaraı bet buryp otyr. Osy oraıda Oral qalasynda joǵary sanatty ortoped-travmotolog Asylbek Álibekov óz sheberhanasyn ashty.
Oǵan «Bıznestiń jol kartasy-2020» baǵdarlamasy aıasynda qarjylaı qoldaý kórsetildi. Osy arqyly nesıeniń paıyzdyq mólsherlemesi ájeptáýir qysqartyldy. Munyń septigi ǵımarat alýǵa da tıipti. Al sheberhana úshin qural-jabdyqtar men em-shara júrgizýge qajetti qondyrǵylar jeke qarajatqa alynǵan. Jańa kásip ıesi óz qyzmetiniń ereksheligi týraly gazet tilshisine baıandap berdi. Onyń uzyn-yrǵasy qandaı degenge kelsek, búgingi kúni turǵyndar tarapynan ortoped-mamannyń qyzmetine degen suranys arta túsipti.
Halyqtan taban deformasııasyn túzetý jónindegi tilekter kóbirek túsedi eken. Ásirese, óńirdegi jastar arasynda maıtabandylyq dertiniń jıi kezdesýi oılandyrmaı qoımaıdy. Sonyń saldarynan Qarýly Kúshter qatarynda qyzmet etýge jaramsyzdar sany ósip keledi. «Ony emdeý men aldyn alýdyń tásilderi jetkilikti. Biz ony qajettilikke qaraı qoldanamyz», deıdi ortoped-travmatolog Asylbek Álibekuly. Jalpy, jalpaq tabandy adam júrgen kezde tez sharshaıdy. Qozǵalǵan kezde baltyry, tabany men beli syrqyrap qoıa beredi. Munyń bári tabandaǵy ózgeristerdiń áseri. Emdelmeı júre berse, bul tize men jambas býyndarynyń, sonymen birge omyrtqa súıekteriniń ózgerisine soqtyrady eken.
Mamannyń aıtýynsha, taban súıekteri deneniń búkil salmaǵyn kóteredi. Bul rette aıaq kıimniń úlken máni bar ekenin ekiniń biri bile bermeıdi. Mysaly, únemi bıik óksheli aıaq kıim kıip júrgen jaǵdaıda taban súıegi bul aýyrtpalyqty kótere almaı, ózgeriske ushyraıtyn kórinedi. Sondyqtan, ata-analar balalarynyń qandaı aıaq kıim kıetinine kóńil aýdarmasa, keıin ókinishke tap bolýy múmkin.
A.Álibekov kásibı biliktiligin udaıy jetildirip otyrady. Ol keıingi kezde óziniń biliktiligin tek Qazaqstanda ǵana emes, sonymen birge, Reseı men Polshanyń irgeli ǵylymı-medısınalyq ortalyqtarynda kóterip keledi. Sonyń nátıjesinde, ol óńirdegi tirek-qozǵalys júıelerin emdeıtin biregeı mamanǵa aınalǵan. Onyń sheberhanasyndaǵy ota jasaıtyn orynnyń barlyq talaptarǵa saı ekeni de súısindirmeı qoımaıdy. Munda ota jasaý túrleri de jetildirile túsýde.
Ortoped usynyp otyrǵan qyzmet órisi tek ota jasaýmen shektelmeıdi. Sonymen birge, Asylbektiń sheberhanasy arqyly aqyly dárigerlik keńester beriledi, kompıýterlik dıagnostıka jasalady. Qazirgi tańda ortopedııalyq taýarlarǵa degen suranystar da óse túsýde. A.Álibekov turǵyndardyń bul qajettilikterin óteýge de ýaqyt taýyp júr. Biz joǵaryda búgingi keıipkerimizdiń oı-pikirine súıene otyryp, tirek-qozǵalys júıesindegi dertterdiń birqatary jaısyz aıaq kıim kıgennen paıda bolatynyn aıtqan edik. Osy turǵyda bilikti mamannyń laıyqty ári yńǵaıly aıaq kıimdi tıisti jerlerden izdep taýyp, óz klıentterine usynýy da onyń búgingi qyzmetiniń taǵy bir ereksheligin tanytqandaı.
Temir QUSAIYN,
«Egemen Qazaqstan»
ORAL