Soltústik óńirde 2,5 myńǵa jýyq qyzmetkerdiń basyn biriktiretin 595 mádenıet mekemeleri oblys jurtshylyǵyna qaltqysyz qyzmet kórsetip keledi.
Sońǵy jyldary olardyń materıaldyq-tehnıkalyq bazasy, kadrlardyń sapalyq áleýeti nyǵaıyp, «Jumyspen qamtýdyń jol kartasy-2020» baǵdarlamasy sheńberinde 101 mádenıet jáne muraǵat ǵımaraty qalpyna keltirildi. Táýelsizdiktiń shırek ǵasyrlyq kezeńinde eki teatr, alty murajaı, «Abylaıhan» rezıdensııasy» murajaı kesheni, jastar saraıy boı kóterdi. Qarjylandyrý on esege kóbeıip, konserttik jáne gastroldik saparlar jıi uıymdastyrylatyn boldy. Eldi mekenderde jabylyp qalǵan klýbtar, kitaphanalar, mádenıet úıleri qaıtadan iske qosyldy. Jaǵymdy jańalyqtardyń birine S.Muqanov atyndaǵy qazaq sazdy-drama teatryndaǵy kórermender zalynyń 500 orynǵa deıin ulǵaıtylyp, jobalaý-smetalyq qujattardyń túzilýin ataýǵa bolady.
N.Pogodın atyndaǵy orys drama teatrynda ótken saltanatty keshte mádenıet salasy ókilderine erekshe qurmet kórsetildi. Kórmege tarıhı qundy jádigerler, S.Muqanov, Ǵ.Músirepov, I.Shýhov sekildi tanymal jerles jazýshylardyń jeke zattary qoıyldy.
Oblys ákimi Erik Sultanov jas urpaqty rýhanı tárbıeleýge úlken úles qosyp, ómirine ónerdi serik etip kele jatqan bir top mádenıet salasy ókilderin marapattady.
Barlyq aýdandarda jekelegen atalymdar boıynsha ótkizilgen baıqaýlardyń qorytyndylary osy jıynda shyǵarylyp, jeńimpazdar anyqtaldy. Murajaılar arasynda Shoqan Ýálıhanov atyndaǵy Syrymbet tarıhı-etnografııalyq murajaıy men Esil aýdandyq murajaıy ozyp shyǵyp, árqaısysyna 500 myń teńgeniń sertıfıkaty berildi. «Úzdik medıateka» atalymy boıynsha Tımırıazev aýdandyq kitaphanasyna 300 myń teńgeniń syıaqysy tapsyryldy. Qyzyljar aýdanynyń muraǵat ujymy 500 myń teńgeni oljalady. «Úzdik aýyldyq mádenıet – 2016» atalymynda Aıyrtaý aýdany Gran-prı ıegeri atanyp, 2 mıllıon, al Shal aqyn aýdany 1,5 mıllıon teńgege ıe boldy.
N.Pogodın atyndaǵy orys drama teatryna 10 mıllıon teńgeniń sertıfıkaty syılandy.
О́mir ESQALI,
«Egemen Qazaqstan»
Soltústik Qazaqstan oblysy