Búginde bırjada dollardy satyp alý kórsetkishi tómen. Bankter men aqsha aıyrbastaý beketterinde de AQSh valıýtasyn satyp alǵannan góri ony satyp jiberý operasııalary basym bolyp tur, dep habarlaıdy finprom.kz saıty.
Sońǵy úsh aıdyń ishinde qor bırjasynda dollardyń saýda-sattyǵy 2,5 mlrd-tan aspaı otyr. Bırjadan tys naryqta, ıaǵnı bankter men aqsha aıyrbastaý beketterinde satyp alynǵan jáne satylǵan dollardyń araqatynasy kúrt ózgerdi. Máselen, qarasha aıynda qazaqstandyqtar AQSh-tyń valıýtasyn kóp satyp almaı, kerisinshe, 46 mln. dollarǵa artyq aqshany teńgege aıyrbastap jibergen.
Al qor bırjasynda alǵashqy on aıdyń ishinde eki ese az dollar satylǵan. О́tken jyly 48 mlrd. satylsa, bıyl nebári 25 mlrd. dollar ótken eken. Osylaısha, Qazaqstandaǵy devalvasııalyq qaýip-qaterlerdiń deńgeıi túsip otyr. Bankter, bıznes pen qarapaıym halyq dollardy satyp alýdyń ornyna kóptep ótkizip, onymen devalvasııanyń bolatynyna senbeı otyrǵanyn kórsetti. Osynyń arqasynda Ulttyq bankte valıýta baǵamyn ustaý úshin jumsaǵan shyǵyndaryn azaıtty. Úsh aı boıy bank birde-bir ıntervensııa jasaǵan joq.
Aıta ketken jón, jyldyń basynda Ulttyq bank valıýta baǵamynyń tepe-teńdigin ustaý úshin biraz aqsha jumsaǵan bolatyn. Aqpan-maýsym aılarynda bank 3,3 mlrd. dollardy satyp alǵan. Búginde kontragentterdiń «devalvasııa burq ete qalady» degen alańdaýshylyǵy da basyldy. Teńge baǵamyn erkin aınalymǵa jibergen kezde naqty ne bolatynyn eshkim bilgen joq. Sodan dúrbeleń týyndap, dollardyń spekýlıasııasy kúsheıgen edi. Sonyń saldarynan valıýta naryǵynda turaqsyzdyq boldy.