Qaıyrymdylyq kómek aıasynda Bolat О́temuratovtyń «Asyl mıras» qaıyrymdylyq qory Almatydaǵy Akýsherlik, gınekologııa jáne perınatologııa ǵylymı ortalyǵyna ómirlik mańyzǵa ıe jańa jabdyqtar tabystady.
Atap aıtar bolsaq, qaıyrymdylyq qory nárestelerge ıntensıvti terapııa jasaıtyn bólimshege 2 elektrlik aspırasııalyq sorǵyny, ortalyqtandyrylǵan medısınalyq gazben jabdyqtaý júıesine arnalǵan qondyrǵyny, náreste ókpesindegi aýany jasandy jolmen almastyratyn apparat pen fototerapııaǵa arnalǵan 4 shamdy tabys etti.
– Búgin bizdiń Akýsherlik, gınekologııa jáne perınatologııa ǵylymı ortalyǵyna tabystap otyrǵan jabdyqtar kesheni shala týǵan nárestelerge joǵary sapaly medısınalyq kómek kórsetý, olarǵa kútim jasaý úshin asa qajet. Ana men bala ómiriniń densaýlyǵyn saqtaýǵa kishigirim bolsa da úles qosyp otyrǵanymyzǵa qýanyshtymyz jáne de bul biz úshin úlken qurmet, – dedi «Asyl mıras» qaıyrymdylyq qorynyń dırektory Marat Aıtmaǵambetov.
Iá, atalǵan ortalyq Qazaqstanda akýsherlik-gınekologııalyq jáne perınataldyq qyzmetti úılestiretin ǵylymı-zertteý, emdik, bilim beretin jetekshi uıym bolyp tabylady. Ǵylymı ortalyqtyń negizgi qyzmeti perınataldyq medısına, joǵary qaýip-qater tobyna jatatyn júkti áıelderdi bosandyrý, áıelderdiń reprodýktıvtik densaýlyǵyn saqtaý, perınataldyq jáne analar arasyndaǵy aýrý-syrqaý men ólim-jitim kórsetkishin tómendetý máselelerin sheshýge baǵyttalǵan. Ortalyqta jyl saıyn 7 myńnan asa emdelýshige, sonyń ishinde joǵary qaýip-qater tobyna jatatyn 3 myńǵa jýyq nárestege medısınalyq kómek kórsetedi. Ońaltý bólimshesinde dene salmaǵy aıryqsha az jáne jetkiliksiz 350-ge deıin nárestege em jasaldy. Respýblıkada «Ana atanýdyń qaýipsiz joly», «Nárestelerdi ońaltý», «Shala týǵan nárestelerge kútim jasaý» sekildi tıimdi kómek kórsetý tehnologııalary endirilýde.
«Asyl mıras» qorynyń arqasynda osy baǵdarlamanyń nátıjeli qyzmet kórsetip, júzdegen balanyń ómirin aman saqtap qalýǵa kómektesetin jańa jabdyq satyp alyndy», dedi baspasóz máslıhatynda Akýsherlik, gınekologııa jáne perınatologııa ǵylymı ortalyǵynyń dırektory, medısına ǵylymdarynyń doktory Lázzat Aqtaeva.
Aıta ketý kerek, Bolat О́temuratovtyń «Asyl mıras» qaıyrymdylyq qorynyń negizi 2014 jyly qalanǵan. Qordyń maqsaty – bala men onyń otbasynyń ómir súrý sapasyna, tulǵa bolyp qalyptasýyna jáne sonyń nátıjesinde búkil memleketimizdiń tabysty damýyna úles qosý.
Gúlzeınep SÁDIRQYZY,
«Egemen Qazaqstan»
ALMATY