Qazaqstan Respýblıkasynyń Zańy: № 40-VI QRZ

Osy Zań Qazaqstan Respýblıkasyndaǵy daktıloskopııalyq jáne genomdyq tirkeý salasyndaǵy qoǵamdyq qatynastardy retteıdi.

 

1-taraý. JALPY EREJELER

1-bap. Osy Zańda paıdalanylatyn negizgi uǵymdar

Osy Zańda mynadaı negizgi uǵymdar paıdalanylady:

1) bıologııalyq materıal – adamnyń nemese qaıtys bolǵan adam denesiniń (súıeginiń) genomdyq aqparaty bar tinderi men shyǵyndylary;

2) bıologııalyq týystar – qandas týystyǵy bar adamdar: ata-analar (ata-ana), balalar, ata, áje, nemereler, ata-anasy bir jáne ata-anasy bólek, nemere, shóbere aǵa-iniler men apa-sińliler (qaryndastar), naǵashy aǵalar, naǵashy apalar, jıender;

3) genomdyq aqparat – adamnyń nemese tanylmaǵan máıittiń jeke basyn anyqtaýǵa múmkindik beretin onyń dezoksırıbonýkleın qyshqylynyń belgili bir fragmentteri týraly kodtalǵan aqparat jáne osy Zańnyń talaptaryna sáıkes derbes derekter (ol bolǵan kezde);

4) genomdyq tirkeý – daktıloskopııalyq jáne (nemese) genomdyq tirkeý salasyndaǵy ýákiletti memlekettik organdardyń bıologııalyq materıal men genomdyq aqparatty jınaý, óńdeý, qorǵaý, adamnyń jeke basyn anyqtaý nemese rastaý boıynsha júzege asyratyn qyzmeti;

5) daktıloskopııalyq aqparat – adamnyń nemese tanylmaǵan máıittiń jeke basyn anyqtaýǵa múmkindik beretin onyń qoldarynyń saýsaqtarynyń jáne (nemese) alaqandarynyń papıllıarlyq bederleri qurylymynyń erekshelikteri týraly bıometrııalyq derekter jáne osy Zańnyń talaptaryna sáıkes derbes derekter;

6) daktıloskopııalyq jáne (nemese) genomdyq tirkeý salasyndaǵy ýákiletti memlekettik organdar – óz quzyreti sheginde Qazaqstan Respýblıkasynyń azamattaryn, sheteldikter men azamattyǵy joq adamdardy daktıloskopııalyq jáne (nemese) genomdyq tirkeýdi júzege asyratyn ishki ister organdary, syrtqy saıası qyzmet salasyndaǵy ýákiletti memlekettik organ, ulttyq qaýipsizdik organdary, kólik salasyndaǵy ýákiletti memlekettik organ;

7) daktıloskopııalyq nemese genomdyq aqparatty buǵattaý –daktıloskopııalyq nemese genomdyq aqparatty jınaýdy, jınaqtaýdy, ózgertýdi, tolyqtyrýdy, paıdalanýdy, berýdi, ıesizdendirýdi, joıýdy ýaqytsha toqtatý jónindegi áreketter;

8) daktıloskopııalyq nemese genomdyq aqparatty joıý – jasalýy nátıjesinde daktıloskopııalyq nemese genomdyq aqparatty qalpyna keltirý múmkin bolmaıtyn áreketter; 

9) daktıloskopııalyq nemese genomdyq aqparatty ıesizdendirý – nátıjesinde daktıloskopııalyq nemese genomdyq aqparattyń naqty adamǵa tıesili ekenin aıqyndaý qosymsha aqparatty paıdalanbaı múmkin bolmaıtyn áreketter;

10) daktıloskopııalyq nemese genomdyq aqparatty óńdeý –daktıloskopııalyq nemese genomdyq aqparatty jınaqtaýǵa, saqtaýǵa, ózgertýge, tolyqtyrýǵa, paıdalanýǵa, berýge, ıesizdendirýge, buǵattaýǵa jáne joıýǵa baǵyttalǵan áreketter;

11) daktıloskopııalyq nemese genomdyq aqparatty paıdalaný – daktıloskopııalyq nemese genomdyq tirkeý maqsatyna qol jetkizýge baǵyttalǵan daktıloskopııalyq nemese genomdyq aqparatpen jasalatyn áreketter;

12) daktıloskopııalyq tirkeý – daktıloskopııalyq jáne (nemese) genomdyq tirkeý salasyndaǵy ýákiletti memlekettik organdardyń daktıloskopııalyq aqparatty jınaý, óńdeý, qorǵaý, adamnyń jeke basyn anyqtaý nemese rastaý boıynsha júzege asyratyn qyzmeti;

13) materıaldyq jetkizgishter – daktıloskopııalyq nemese genomdyq aqparaty bar daktıloskopııalyq nemese aqparattyq kartalar, magnıttik, elektrondyq nemese ózge de jazba túrlerin jetkizgishter;

14) tanylmaǵan máıit – denesi (súıekteri) tabylǵan kezde jeke basy anyqtalmaǵan qaıtys bolǵan adamnyń denesi (súıekteri).

 

2-bap. Osy Zańnyń qoldanylý aıasy

Osy Zańda kózdelgen jaǵdaılarda Qazaqstan Respýblıkasynyń azamattaryn, sheteldikter men azamattyǵy joq adamdardy daktıloskopııalyq jáne genomdyq tirkeýge baılanysty qatynastar osy Zańmen retteledi.

 

3-bap. Qazaqstan Respýblıkasynyń daktıloskopııalyq jáne genomdyq tirkeý týraly zańnamasy

Qazaqstan Respýblıkasynyń daktıloskopııalyq jáne genomdyq tirkeý týraly zańnamasy Qazaqstan Respýblıkasynyń Konstıtýsııasyna negizdeledi jáne osy Zań men Qazaqstan Respýblıkasynyń ózge de normatıvtik quqyqtyq aktilerinen turady. Eger Qazaqstan Respýblıkasy ratıfıkasııalaǵan halyqara­lyq shartta osy Zańda qamtylǵannan ózgeshe qaǵıdalar belgilense, onda halyqaralyq sharttyń qaǵıdalary qoldanylady.

 

4-bap. Daktıloskopııalyq jáne genomdyq tirkeý qaǵıdattary

Daktıloskopııalyq jáne genomdyq tirkeý:

1) adam men azamattyń konstıtýsııalyq quqyqtaryn jáne bostandyqtaryn saqtaý;

2) zańdylyq;

3) mindettilik;

4) izgilik;

5) qupııalylyq;

6) adam densaýlyǵy úshin qaýipsizdik;

7) jeke adamnyń ar-namysy men qadir-qasıetin qurmetteý qaǵıdattaryna sáıkes júrgiziledi.

 

5-bap. Daktıloskopııalyq jáne genomdyq tirkeýdiń maqsaty

Daktıloskopııalyq jáne genomdyq tirkeý daktıloskopııalyq nemese genomdyq aqparat negizinde jeke basyn anyqtaý jáne (nemese) rastaý maqsatynda júrgiziledi.

 

6-bap. Daktıloskopııalyq jáne (nemese) genomdyq tirkeý salasyndaǵy ýákiletti memlekettik organdardyń quqyqtary men mindetteri

Daktıloskopııalyq jáne (nemese) genomdyq tirkeý salasyndaǵy ýákiletti memlekettik organdardyń óz quzyreti sheginde daktıloskopııalyq nemese genomdyq aqparatty jınaýǵa, óńdeýge, bıologııalyq materıaldy irikteýge jáne paıdalanýǵa quqyǵy bar. Daktıloskopııalyq jáne (nemese) genomdyq tirkeý salasyndaǵy ýákiletti memlekettik organdar óz quzyreti sheginde:

1) Qazaqstan Respýblıkasy ratıfıkasııalaǵan halyqaralyq sharttarǵa jáne osy Zańǵa sáıkes daktıloskopııalyq nemese genomdyq aqparatty qorǵaý úshin qajetti sharalardy, onyń ishinde quqyqtyq, uıymdastyrýshylyq jáne tehnıkalyq sharalardy qoldanýǵa jáne saqtaýǵa;

2) osy Zańda belgilengen jaǵdaılarda daktıloskopııalyq nemese genomdyq aqparatty jınaý, jınaqtaý, saqtaý, berý, buǵattaý, ıesizdendirý, ózgertý, tolyqtyrý, paıdalaný, joıý jóninde sharalar qoldanýǵa mindetti.

 

7-bap. Daktıloskopııalyq jáne (nemese) genomdyq tirkeýdi júzege asyrý kezindegi Qazaqstan Respýblıkasy azamattarynyń, sheteldikter men azamattyǵy joq adamdardyń quqyqtary men mindetteri

Qazaqstan Respýblıkasy azamattarynyń, sheteldikter men azamattyǵy joq adamdardyń, kámeletke tolmaǵandardyń zańdy ókilderiniń, sot sheshimi boıynsha áreketke qabiletsiz dep tanylǵan adamdar qorǵanshylarynyń daktıloskopııalyq jáne (nemese) genomdyq tirkeýdi júzege asyrý kezinde:

1) óziniń daktıloskopııalyq jáne (nemese) genomdyq aqparaty­men nemese ózderi zańdy múddelerin bildiretin adamnyń daktı­los­kopııalyq jáne (nemese) genomdyq aqparatymen tanysýǵa;

2) ózderiniń daktıloskopııalyq jáne (nemese) genomdyq aqparatyn nemese ózderi zańdy múddelerin bildiretin adamnyń daktıloskopııalyq jáne (nemese) genomdyq aqparatyn jınaýǵa jáne (nemese) óńdeýge, qorǵaýǵa baılanysty memlekettik organ­dardyń jáne olardyń laýazymdy adamdarynyń áreketterine (áreketsizdigine) joǵary turǵan organǵa (joǵary turǵan laýazymdy adamǵa) nemese sotqa shaǵym jasaýǵa quqyǵy bar.

Daktıloskopııalyq jáne (nemese) genomdyq tirkeýge jatatyn Qazaqstan Respýblıkasynyń azamattary, sheteldikter men azamattyǵy joq adamdar osy Zańda belgilengen jaǵdaılarda daktıloskopııalaý jáne (nemese) bıologııalyq materıaldy irikteý rásiminen ótýge mindetti.

 

8-bap. Daktıloskopııalyq jáne genomdyq aqparatty jınaýǵa, óńdeýge jáne qorǵaýǵa qoıylatyn negizgi talaptar

Daktıloskopııalyq jáne genomdyq aqparat qoljetimdiligi shekteýli derbes derekterge jatady. Daktıloskopııalyq jáne genomdyq aqparatty jınaý jáne óńdeý sharttary ony joǵaltý, burmalaý jáne oǵan sanksııalanbaǵan qol jetkizý, sol sııaqty daktıloskopııalyq nemese genomdyq aqparaty bar elektrondyq aqparattyq resýrstarǵa quqyqqa syıymsyz jáne (nemese) ádeıi jasalmaǵan qol jetkizý jáne (nemese) yqpal etý múmkindigin bolǵyzbaýǵa tıis. Daktıloskopııalyq jáne genomdyq aqparat memleket kepildik beretin qorǵaýǵa jatady. Daktıloskopııalyq jáne genomdyq aqparatty jınaý jáne óńdeý ony qorǵaý qamtamasyz etilgen jaǵdaılarda ǵana júzege asyrylady.

Daktıloskopııalyq jáne genomdyq aqparatty qorǵaý Qazaqstan Respýblıkasynyń aqparattandyrý týraly, derbes derekter jáne olardy qorǵaý, memlekettik qupııalar týraly zańnamasyna sáıkes júzege asyrylady.

Daktıloskopııalyq jáne (nemese) genomdyq aqparatty jınaýdy jáne (nemese) óńdeýdi júzege asyratyn memlekettik organdar daktıloskopııalyq jáne (nemese) genomdyq aqparattyń qupııalylyǵyn saqtaýǵa jáne onyń qorǵalýyn qamtamasyz etýge mindetti. Daktıloskopııalyq jáne (nemese) genomdyq aqparatty jınaý, óńdeý, qorǵaý, bıologııalyq materıaldy irikteý jáne paıdalaný daktıloskopııalyq jáne genomdyq tirkeýdi júrgizý qaǵıdalaryna sáıkes júzege asyrylady.

 

9-bap. Daktıloskopııalyq nemese genomdyq aqparatty buǵattaý, ıesizdendirý, berý

Daktıloskopııalyq jáne (nemese) genomdyq tirkeý salasyndaǵy ýákiletti memlekettik organdar daktıloskopııalyq nemese genomdyq aqparatty ıesizdendirýdi, sondaı-aq ıesizdendirýdi alyp tastaýdy júzege asyrady. Daktıloskopııalyq jáne (nemese) genomdyq tirkeý salasyndaǵy ýákiletti memlekettik organdar daktıloskopııalyq nemese genomdyq aqparatty jınaý, óńdeý sharttarynyń buzylýy týraly aqparat bolǵan jaǵdaıda ony buǵattaýdy, sondaı-aq tekserý is-sharalary júrgizilgennen jáne buzýshylyqtar joıylǵannan keıin buǵattaýdy alyp tastaýdy júzege asyrady. Daktıloskopııalyq jáne (nemese) genomdyq tirkeý salasyndaǵy ýákiletti memlekettik organdar jedel-izdestirý, barlaý, qarsy barlaý qyzmetin júzege asyratyn memlekettik organdarmen birlesken normatıvtik quqyqtyq aktilerdiń negizinde daktıloskopııalyq nemese genomdyq aqparatty buǵattaýdy jáne (nemese) ıesizdendirýdi, sondaı-aq buǵattaýdy jáne (nemese) ıesizdendirýdi alyp tastaýdy júzege asyrady. Daktıloskopııalyq nemese genomdyq aqparatty sottarǵa, quqyq qorǵaý organdaryna, arnaýly memlekettik organdarǵa, atqarýshylyq is júrgizý, anyqtaý, tergeý organdaryna berý daktıloskopııalyq jáne genomdyq tirkeýdi júrgizý qaǵıdalaryna sáıkes Qazaqstan Respýblıkasynyń zańdary negizinde júzege asyrylady. Daktıloskopııalyq jáne (nemese) genomdyq tirkeý salasyndaǵy ýákiletti memlekettik organdar Qazaqstan Respýblıkasy ratıfıkasııalaǵan halyqaralyq sharttarǵa jáne Qazaqstan Respýblıkasynyń zańdaryna sáıkes daktıloskopııalyq nemese genomdyq aqparatty shet memleketterge berýi múmkin.

 

2-taraý. DAKTILOSKOPIIаLYQ TIRKEÝDI JÚRGIZÝ

10-bap. Daktıloskopııalyq tirkeýge jatatyn adamdar

Mindetti daktıloskopııalyq tirkeýge on alty jasqa tolǵan:

1) birinshi ret Qazaqstan Respýblıkasy azamatynyń pasportyn nemese jeke kýáligin alýǵa, sondaı-aq ony qalpyna keltirý, aýystyrý jaǵdaılarynda ótinish jasaǵan Qazaqstan Respýblıkasynyń azamattary;

2) Qazaqstan Respýblıkasy teńizshisiniń jeke kýáligin berý týraly ózderine qatysty sheshim qabyldanǵan Qazaqstan Respýblıkasynyń azamattary, sheteldikter men azamattyǵy joq adamdar;

3) Qazaqstan Respýblıkasynda turaqty turatyn sheteldikter men azamattyǵy joq adamdar;

4) birinshi ret sheteldiktiń Qazaqstan Respýblıkasynda turýǵa yqtııarhatyn, azamattyǵy joq adamnyń kýáligin, bosqyn kýáligin alýǵa nemese ony qalpyna keltirýge, aýystyrýǵa ótinish jasaǵan sheteldikter men azamattyǵy joq adamdar;

5) jumys berýshi – jeke tulǵalarda úı sharýashylyǵyndaǵy jumystardy oryndaý (qyzmetterdi kórsetý) maqsatynda úı jumyskerleri retinde Qazaqstan Respýblıkasyna kelgen kóship kelýshiler;

6) Qazaqstan Respýblıkasy sheginen shyǵaryp jiberýge jatatyn ne Qazaqstan Respýblıkasy ratıfıkasııalaǵan readmıssııa týraly halyqaralyq sharttardyń kúshi qoldanylatyn sheteldikter men azamattyǵy joq adamdar;

7) Qazaqstan Respýblıkasynyń vızalaryn alý kezinde sheteldikter men azamattyǵy joq adamdar jatady.

On eki jastan on alty jasqa deıingi balalar Qazaqstan Respýblıkasy azamatynyń pasportyn alý kezinde osy Zańnyń 11-babynyń 2-tarmaǵynda kózdelgen tártippen erikti negizde daktıloskopııalyq tirkeýge jatady. On eki jasqa tolmaǵan balalar daktıloskopııalyq tirkeýge jatpaıdy. Daktıloskopııalaýǵa múmkindik bermeıtin dene kemistikteri bar (eki qolynyń barlyq saýsaqtarynyń bolmaýy nemese eki qolynyń barlyq saýsaqtarynyń tyrnaq falangalarynda papıllıarlyq bederleriniń bolmaýy) adamdar Qazaqstan Respýblıkasynyń Memlekettik shekarasyn kesip ótý kezinde daktıloskopııalyq tirkeýden, daktıloskopııalyq aqparat boıynsha jeke basyn rastaý rásiminen ótýden bosatylady.

Qazaqstan Respýblıkasynyń sheginen shyǵaryp jiberýge jatatyn ne Qazaqstan Respýblıkasy ratıfıkasııalaǵan readmıssııa týraly halyqaralyq sharttardyń kúshi qoldanylatyn, dene kemistikteri bar (eki qolynyń barlyq saýsaqtarynyń bolmaýy nemese eki qolynyń barlyq saýsaqtarynyń tyrnaq falangalarynda papıllıarlyq bederleriniń bolmaýy) sheteldikter men azamattyǵy joq adamdardyń qoldarynyń alaqandary boıynsha daktıloskopııalyq tirkeýge jatady.

 

11-bap. Daktıloskopııalyq aqparatty jınaý tártibi

Daktıloskopııalyq tirkeýdi:

1) osy Zańnyń 10-baby 1-tarmaǵynyń 1) tarmaqshasynda atalǵan adamdarǵa qatysty – ishki ister organdary, Qazaqstan Respýblıkasy azamatynyń pasportyn Qazaqstan Respýblıkasynyń shetelderdegi mekemelerinde resimdegen jaǵdaıda – syrtqy saıası qyzmet salasyndaǵy ýákiletti memlekettik organ;

2) osy Zańnyń 10-baby 1-tarmaǵynyń 2) tarmaqshasynda atalǵan adamdarǵa qatysty – kólik salasyndaǵy ýákiletti memlekettik organ;

3) osy Zańnyń 10-baby 1-tarmaǵynyń 3) – 5) tarmaqshalarynda atalǵan adamdarǵa qatysty – ishki ister organdary;

4) osy Zańnyń 10-baby 1-tarmaǵynyń 6) tarmaqshasynda atalǵan adamdarǵa qatysty – óz quzyretine sáıkes ishki ister organdary, ulttyq qaýipsizdik organdary;

5) osy Zańnyń 10-baby 1-tarmaǵynyń 7) tarmaqshasynda atalǵan adamdarǵa qatysty – óz quzyretine sáıkes syrtqy saıası qyzmet salasyndaǵy ýákiletti memlekettik organ, ishki ister organdary júrgizedi.

On eki jastan on alty jasqa deıingi balalarǵa qatysty daktıloskopııalyq tirkeý olardyń kelisimimen balanyń zańdy ókiliniń qatysýymen jáne jazbasha ótinishi negizinde júrgiziledi. Sot áreketke qabiletsiz dep anyqtaǵan Qazaqstan Respýblıkasynyń azamatyn, sheteldikti nemese azamattyǵy joq adamdy daktıloskopııalyq tirkeý onyń qorǵanshysynyń qatysýymen jáne jazbasha ótinishi negizinde júrgiziledi. Daktıloskopııalyq aqparatty jınaý daktıloskopııalyq jáne genomdyq tirkeýdi júrgizý qaǵıdalaryna sáıkes júzege asyrylady.

 

12-bap. Daktıloskopııalyq aqparaty bar materıaldyq jetkizgishterde qamtylatyn málimetter

Jeke basyn kýálandyratyn qujattardy resimdeý kezinde daktıloskopııalyq aqparaty bar materıaldyq jetkizgish mynadaı derekterdi:

1) tegin, atyn, ákesiniń atyn (ol bolǵan kezde);

2) týǵan kúnin jáne jerin;

3) jynysyn;

4) qaı ultqa jatatynyn (ıesiniń qalaýy boıynsha);

5) azamattyǵyn;

6) fotosýretin;

7) qoldarynyń saýsaqtarynyń jáne (nemese) alaqandarynyń papıllıarlyq bederleri qurylymynyń erekshelikteri týraly aqparatty;

8) qujattyń berilgen kúnin, nómirin, qoldanylý merzimin;

9) qujattar ıesiniń qoltańbasyn;

10) jeke sáıkestendirý nómirin (ol bolǵan kezde);

11) daktıloskopııalyq tirkeýdi júrgizý kúnin jáne negizin;

12) qujatty bergen organnyń ataýyn;

13) daktıloskopııalyq tirkeýdi júzege asyrǵan adamnyń tegin, atyn, ákesiniń atyn (ol bolǵan kezde) qamtıdy.

Qazaqstan Respýblıkasynyń vızalaryn resimdeý kezinde daktıloskopııalyq aqparaty bar materıaldyq jetkizgish mynadaı derekterdi:

1) tegin, atyn, ákesiniń atyn (ol bolǵan kezde);

2) týǵan kúnin;

3) jynysyn;

4) qoldarynyń saýsaqtarynyń jáne (nemese) alaqandarynyń papıllıarlyq bederleri qurylymynyń erekshelikteri týraly aqparatty;

5) azamattyǵyn;

6) fotosýretin;

7) qujattyń berilgen kúnin, nómirin, qoldanylý merzimin;

8) vızanyń berilgen kúnin, qoldanylý merzimin;

9) daktıloskopııalyq tirkeýdi júrgizý kúnin jáne negizin;

10) vızany bergen organnyń ataýyn;

11) daktıloskopııalyq tirkeýdi júzege asyrǵan adamnyń tegin, atyn, ákesiniń atyn (ol bolǵan kezde) qamtıdy.

 

13-bap. Daktıloskopııalyq aqparatty ózgertý jáne (nemese) tolyqtyrý

Daktıloskopııalyq tirkeýden ótken adamdardyń daktıloskopııalyq aqparatyn ózgertý jáne (nemese) tolyqtyrý daktıloskopııalyq jáne genomdyq tirkeýdi júrgizý qaǵıdalaryna sáıkes júzege asyrylady.

 

14-bap. Daktıloskopııalyq aqparatty jınaqtaý jáne saqtaý

Daktıloskopııalyq tirkeýdi júrgizý kezinde alynǵan daktıloskopııalyq aqparatty jınaqtaýdy jáne saqtaýdy Qazaqstan Respýblıkasynyń zańnamasyna sáıkes elektrondyq aqparattyq resýrsty qalyptastyrý arqyly ishki ister organdary júzege asyrady.

Qazaqstan Respýblıkasy teńizshisiniń jeke kýáligin berý týraly ózderine qatysty sheshim qabyldanǵan adamdardyń daktıloskopııalyq aqparatyn jınaqtaýdy jáne saqtaýdy Qazaqstan Respýblıkasynyń zańnamasyna sáıkes elektrondyq aqparattyq resýrsty qalyptastyrý arqyly kólik salasyndaǵy ýákiletti memlekettik organ júzege asyrady.

 

15-bap. Daktıloskopııalyq aqparatty saqtaý merzimderi

Ishki ister organdary, kólik salasyndaǵy ýákiletti memlekettik organ daktıloskopııalyq aqparatty:

osy Zańnyń 10-baby 1-tarmaǵynyń 1) tarmaqshasynda atalǵan adamdar týraly derekqorda – olardyń qaıtys bolý faktisi anyqtalǵanǵa deıin, sot azamatty habarsyz ketken dep tanyǵan nemese azamatty qaıtys boldy dep jarııalaǵan, Qazaqstan Respýblıkasynyń azamattyǵynan aıyrylǵan nemese odan shyqqan jaǵdaılarda, olar júz jasqa tolǵan kúnge deıin;

osy Zańnyń 10-baby 1-tarmaǵynyń 2) – 7) tarmaqshalarynda, 2-tarmaǵynda atalǵan adamdar týraly derekqorda – tirkelgen kúninen bastap on jyl saqtaıdy.

Osy baptyń 1-tarmaǵynda kórsetilgen merzimder ótkennen keıin ishki ister organdary, kólik salasyndaǵy ýákiletti memlekettik organ osy Zańnyń 10-baby 1-tarmaǵynyń 2) – 7) tarmaqshalary, 2-tarmaǵy negizinde daktıloskopııalyq tirkeýden ótken adamdar týraly daktıloskopııalyq aqparatty arhıvterde materıaldyq jetkizgishterde qyryq jyl saqtaıdy.

 

16-bap. Daktıloskopııalyq aqparatty paıdalaný

Qazaqstan Respýblıkasy azamattarynyń, sheteldikter men azamattyǵy joq adamdardyń daktıloskopııalyq tirkeý kezinde alynǵan daktıloskopııalyq aqparaty:

1) Qazaqstan Respýblıkasy azamattarynyń, sheteldikter men azamattyǵy joq adamdardyń jeke basyn rastaý jáne (nemese) anyqtaý;

2) Qazaqstan Respýblıkasynyń aýmaǵynda sheteldikter men azamattyǵy joq adamdardy esepke alý jáne baqylaý;

3) jeke adamnyń, qoǵam men memlekettiń qaýipsizdigin qamtamasyz etý;

4) Qazaqstan Respýblıkasynyń Memlekettik shekarasyn kesip ótetin adamdardy daktıloskopııalyq aqparat boıynsha adamnyń jeke basyn rastaý rásimi arqyly esepke alý jáne baqylaý úshin paıdalanylady.

Qazaqstan Respýblıkasynyń Memlekettik shekarasyn kesip ótý kezinde daktıloskopııalyq aqparat boıynsha adamnyń jeke basyn rastaý rásiminen Qazaqstan Respýblıkasynyń azamattary, sheteldikter men azamattyǵy joq adamdar arnaýly memlekettik organdardyń, Qazaqstan Respýblıkasy Qorǵanys mınıstrliginiń, syrtqy saıası qyzmet salasyndaǵy ýákiletti memlekettik organnyń jazbasha ótinishi boıynsha, sondaı-aq osy Zańnyń 10-babynyń 3-tarmaǵynda kózdelgen jaǵdaılarda bosatylady. 

 

17-bap. Daktıloskopııalyq aqparatty joıý

Daktıloskopııalyq aqparatty ony jınaqtaýdy jáne saqtaýdy júzege asyratyn ishki ister organdary, kólik salasyndaǵy ýákiletti memlekettik organ joıady. Daktıloskopııalyq aqparat osy Zańnyń 15-babynda kózdelgen onyń saqtalý merzimderi ótken soń joıylady. Daktıloskopııalyq aqparatty joıý ishki ister organdarynyń, kólik salasyndaǵy ýákiletti memlekettik organnyń ýákiletti bólimsheleriniń basshylary bekitetin aktiler boıynsha:

1) daktıloskopııalyq aqparatty joıý kúni, negizi;

2) tirkelgen adamnyń tegi, aty, ákesiniń aty (ol bolǵan kezde), jynysy, týǵan kúni jáne jeri, jeke sáıkestendirý nómiri (ol bolǵan kezde), jeke basyn kýálandyratyn qujatynyń nómiri;

3) joıý tásili;

4) daktıloskopııalyq aqparatty joıýdy júzege asyrǵan adamdardyń tegi, aty, ákesiniń aty (ol bolǵan kezde), laýazymy men qoltańbasy kórsetile otyryp júrgiziledi.

 

3-taraý. GENOMDYQ TIRKEÝDI JÚRGIZÝ

18-bap. Genomdyq tirkeýge jatatyn adamdar

Mindetti genomdyq tirkeýge:

1) aýyr nemese asa aýyr qylmystardy, sondaı-aq Qazaqstan Respýblıkasy Qylmystyq kodeksiniń 120, 121, 122, 123 jáne 124-baptarynda kózdelgen qylmystardy jasaǵany úshin sottalǵan adamdar;

2) ashylmaǵan aýyr nemese asa aýyr qylmystar, sondaı-aq Qazaqstan Respýblıkasy Qylmystyq kodeksiniń 120, 121, 122, 123 jáne 124-baptarynda kózdelgen qylmystar boıynsha Qazaqstan Respýblıkasynyń qylmystyq-prosestik zańynda belgilengen tártippen sotqa deıingi tergep-tekserý barysynda bıologııalyq materıaly alynǵan anyqtalmaǵan adamdar;

3) tanylmaǵan máıitter jatady.

Habarsyz ketken azamattardyń bıologııalyq týystary, birinshi kezekte, ata-analary (ata-anasy) jáne (nemese) balalary (balasy), al olar bolmaǵan kezde týystyq dárejesine qaraı basqa da bıologııalyq týystary osy Zańda kózdelgen tártippen olardyń kelisimimen genomdyq tirkeýge jatady.

 

19-bap. Genomdyq tirkeýdi júrgizý tártibi

Genomdyq tirkeý mynadaı tártippen júrgiziledi:

1) Qazaqstan Respýblıkasynyń zańnamasyna sáıkes, genomdyq tirkeýge jatatyn adamdardan, tanylmaǵan máıitterden bıologııalyq materıaldy irikteý, sondaı-aq ashylmaǵan aýyr nemese asa aýyr qylmys oryndarynan anyqtalmaǵan adamdardyń bıologııalyq materıalyn sotqa deıingi tergep-tekserý barysynda alý júrgiziledi;

2) osy Zańnyń 18-baby 1-tarmaǵynyń 1) tarmaqshasynda atalǵan adamdardyń bıologııalyq materıaly genomdyq aqparat alý jáne genomdyq tirkeýdi júzege asyrý úshin ishki ister organdarynyń ýákiletti bólimshesine jiberiledi;

3) osy Zańnyń 18-baby 1-tarmaǵynyń 2) tarmaqshasynda, 2-tarmaǵynda atalǵan adamdardyń jáne tanylmaǵan máıitterdiń bıologııalyq materıaly zertteý júrgizý jáne genomdyq tirkeýdi júzege asyrý úshin ishki ister organdarynyń ýákiletti bólimshesine nemese sot saraptamasyn júrgizý úshin Qazaqstan Respýblıkasy Ádilet mınıstrliginiń sot saraptamasy organdaryna (budan ári – sot saraptamasy organdary) nemese lısenzııa negizinde sot-saraptama qyzmetin júzege asyratyn jeke tulǵaǵa jiberiledi.

Sot saraptamasy organdary nemese lısenzııa negizinde sot-saraptama qyzmetin júzege asyratyn jeke tulǵa sot molekýlıarlyq-genetıkalyq saraptamalar júrgizý kezinde alynǵan genomdyq aqparattyń kóshirmesin genomdyq tirkeýdi júzege asyrý úshin ishki ister organdarynyń ýákiletti bólimshesine jiberedi. 

 

20-bap. Bıologııalyq materıaldy irikteý kezinde alynatyn málimetter

Genomdyq tirkeý úshin bıologııalyq materıaldy irikteý kezinde jazany oryndaıtyn mekemeniń nemese organnyń qyzmetkeri árbir sottalǵan adamǵa aqparattyq karta ashady, oǵan mynadaı málimetter:

1) tegi, aty, ákesiniń aty (ol bolǵan kezde), azamattyǵy, jynysy, týǵan kúni jáne jeri, turǵylyqty jeri nemese bolatyn jeri boıynsha tirkeý týraly málimetter, jeke sáıkestendirý nómiri (ol bolǵan kezde) nemese tirkeletin adam týraly derekter alynǵan adamnyń jeke basyn kýálandyratyn qujattyń ataýy men nómiri;

2) genomdyq tirkeý úshin bıologııalyq materıaldy irikteýdi júzege asyratyn memlekettik organ bólimshesiniń ataýy;

3) genomdyq tirkeý úshin bıologııalyq materıaldy irikteýdi júrgizý kúni jáne negizi;

4) adam sottalǵan Qazaqstan Respýblıkasy Qylmystyq kodeksiniń baby;

5) bıologııalyq materıaldy irikteýdi júzege asyrǵan laýazymdy adamnyń tegi, aty, ákesiniń aty (ol bolǵan kezde), laýazymy jáne qoltańbasy;

6) kámeletke tolmaǵan adamdy qospaǵanda, genomdyq tirkeý úshin bıologııalyq materıalyn irikteý júrgizilgen adamnyń qoltańbasy engiziledi. Tirkeletin adam aqparattyq kartaǵa qol qoıýdan bas tartqan kezde kartada bul týraly jazba jasalady;

7) kámeletke tolmaǵandardyń zańdy ókilderiniń qoltańbalary engiziledi.

Qazaqstan Respýblıkasynyń qylmystyq-prosestik zańynda belgilengen tártippen habarsyz ketken azamattardyń bıologııalyq týystarynan genomdyq tirkeý úshin bıologııalyq materıaldy irikteý kezinde anyqtaý, tergeý organdary aqparattyq kartaǵa osy baptyń 1-tarmaǵynyń 1) – 3), 5) – 7) tarmaqshalarynda kózdelgen málimetterdi, sondaı-aq sot sheshimi boıynsha áreketke qabiletsiz dep tanylǵan adamnyń qorǵanshysynyń qoltańbasyn engizedi. Aqparattyq kartaǵa prosestik áreket hattamasynyń kóshirmesi qosa beriledi. Qazaqstan Respýblıkasynyń qylmystyq-prosestik zańynda belgilengen tártippen sotqa deıingi tergep-tekserý barysynda bıologııalyq materıaly alynǵan anyqtalmaǵan adamdardy genomdyq tirkeý úshin bıologııalyq materıaldy irikteý kezinde anyqtaý, tergeý organdary aqparattyq kartaǵa mynadaı málimetterdi engizedi:

1) genomdyq tirkeý úshin bıologııalyq materıaldy irikteýdi júzege asyratyn memlekettik organ bólimshesiniń ataýy;

2) bıologııalyq materıaldar alýdy júrgizý kúni jáne negizi, qylmystyq istiń nómiri nemese aqparatty esepke alý kitabyndaǵy tirkeý nómiri;

3) árekettiń saralanýy, qylmys jasalǵan kún jáne oryn;

4) bıologııalyq materıaldy alǵan laýazymdy adamnyń tegi, aty, ákesiniń aty (ol bolǵan kezde), laýazymy jáne qoltańbasy.

Aqparattyq kartaǵa prosestik áreket hattamasynyń kóshirmesi qosa beriledi.

Tanylmaǵan máıitterdi genomdyq tirkeý úshin bıologııalyq materıaldy irikteý kezinde aqparattyq kartalarǵa osy baptyń 3-tarmaǵynda kózdelgen málimetter, sondaı-aq tanylmaǵan máıit tabylǵan kún jáne oryn, jynysy, erekshe belgileri jáne qaıtys bolý sebebin kórsetý (ol bolǵan kezde) engiziledi. Aqparattyq kartaǵa prosestik áreket hattamasynyń kóshirmesi qosa beriledi.

 

21-bap. Bıologııalyq materıaldy irikteý jáne paıdalaný

Genomdyq tirkeýdi júrgizý úshin bıologııalyq materıaldy irikteýdi:

1) genomdyq tirkeýge jatatyn sottalǵandardan – ishki ister organdary;

2) Qazaqstan Respýblıkasynyń qylmystyq-prosestik zańynda belgilengen tártippen sotqa deıingi tergep-tekserý barysynda bıologııalyq materıaly alynǵan anyqtalmaǵan adamdardan – ishki ister organdarynyń ýákiletti bólimshesiniń jáne (nemese) sot medısına mamandaryn tarta otyryp jáne Qazaqstan Respýblıkasynyń Qylmystyq-prosestik kodeksiniń talaptaryn saqtaı otyryp, qylmystyq ister boıynsha is júrgizýdi júzege asyratyn anyqtaý, tergeý organdary;

3) habarsyz ketken azamattardyń bıologııalyq týystarynan – ishki ister organdary;

4) tanylmaǵan máıitterden – sot medısınasy salasyndaǵy dáriger mamandy tarta otyryp, ishki ister organdary júzege asyrady.

Habarsyz ketken azamattardyń bıologııalyq týystarynan genomdyq tirkeý úshin bıologııalyq materıaldy irikteý olardyń jazbasha ótinishi negizinde júrgiziledi.

Habarsyz ketken adamnyń bıologııalyq týysy bolyp tabylatyn kámeletke tolmaǵan adamnan bıologııalyq materıaldy irikteý onyń kelisimimen zańdy ókiliniń qatysýymen jáne jazbasha ótinishi negizinde júrgiziledi.

Sot sheshimi boıynsha áreketke qabiletsiz dep tanylǵan jáne habarsyz ketken adamnyń bıologııalyq týysy bolyp tabylatyn adamnan bıologııalyq materıaldy irikteý onyń qorǵanshysynyń qatysýymen jáne jazbasha ótinishi negizinde júrgiziledi.

Bastapqyda bıologııalyq materıal genomdyq aqparat alýdy bolǵyzbaıtyndaı sapasyz iriktelgen jaǵdaıda, genomdyq tirkeýdi júzege asyratyn ishki ister organdarynyń ýákiletti bólimshesiniń suraý salýy boıynsha genomdyq tirkeýge jatatyn sottalǵandardyń, habarsyz ketken azamattardyń bıologııalyq týystarynyń bıologııalyq materıalyn qaıta irikteý júrgiziledi. Genomdyq tirkeýdi júrgizý úshin iriktelgen bıologııalyq materıal genomdyq aqparat alý úshin paıdalanylady. Genomdyq tirkeý úshin bıologııalyq materıal buryn odan ótken adam qaıta sottalǵan kezde iriktelmeıdi.

 

22-bap. Bıologııalyq materıaldy saqtaý merzimderi

Habarsyz ketken azamattardyń bıologııalyq týystarynyń, anyqtalmaǵan adamdardyń, sondaı-aq tanylmaǵan máıitterdiń sotqa deıingi tergep-tekserý barysynda alynǵan jáne qylmystyq is boıynsha zattaı dáleldeme dep tanylǵan bıologııalyq materıalyn saqtaý merzimderi Qazaqstan Respýblıkasynyń Qylmystyq-prosestik kodeksiniń 118-babynyń talaptaryna sáıkes aıqyndalady. Sottalǵan adamdardy genomdyq tirkeýdi júrgizý úshin iriktelgen bıologııalyq materıal iriktelgen kúninen bastap odan genomdyq aqparat alǵanǵa deıin saqtalady.

 

23-bap. Bıologııalyq materıaldy joıý

Habarsyz ketken azamattardyń bıologııalyq týystarynyń, anyqtalmaǵan adamdardyń, tanylmaǵan máıitterdiń sotqa deıingi tergep-tekserý barysynda alynǵan jáne qylmystyq is boıynsha zattaı dáleldeme dep tanylǵan bıologııalyq materıaly genomdyq aqparat alynǵannan keıin anyqtaý, tergeý organdaryna qaıtarylady. Sottalǵan adamdardy genomdyq tirkeýdi júrgizý kezinde alynǵan bıologııalyq materıaldy osy Zańnyń 22-babynyń 2-tarmaǵynda belgilengen saqtalý merzimderi ótkennen keıin ishki ister organdarynyń ýákiletti bólimshesi genomdyq aqparatty alǵannan keıin onyń basshysy bekitetin aktiler boıynsha:

1) bıologııalyq materıaldy joıý kúnin, negizin;

2) tirkelgen adamnyń tegin, atyn, ákesiniń atyn (ol bolǵan kezde), jynysyn, týǵan kúnin jáne jerin, jeke sáıkestendirý nómirin (ol bolǵan kezde), jeke basyn kýálandyratyn qujattyń nómirin;

3) joıý tásilin;

4) bıologııalyq materıaldy joıýdy júzege asyrǵan laýazymdy adamdardyń tegin, atyn, ákesiniń atyn (ol bolǵan kezde), laýazymyn jáne qoltańbasyn, ýákiletti bólimsheniń ataýyn kórsete otyryp joıady.

 

24-bap. Genomdyq aqparaty bar materıaldyq jetkizgishterde qamtylatyn málimetter

Genomdyq aqparaty bar materıaldyq jetkizgish aqparattyq kartadan osy Zańda belgilengen málimetterdi, sondaı-aq:

1) genomdyq aqparat alýdy júzege asyrǵan memlekettik organ bólimshesiniń ataýyn;

2) qylmystyq istiń nómirin;

3) sot sarapshysy qorytyndysynyń nemese maman qorytyndysynyń nómirin jáne kúnin;

4) genomdyq aqparatty;

5) bıologııalyq obektiniń ataýyn jáne genomdyq aqparaty sot saraptamasy nemese zertteý nátıjesinde alynǵan adamnyń prosestik mártebesin qamtýǵa tıis.

 

25-bap. Genomdyq aqparatty alý

Genomdyq tirkeýge jatatyn adamdar týraly genomdyq aqparatty:

1) genomdyq tirkeýge jatatyn sottalǵandardyń bıologııalyq materıalynan alýdy – ishki ister organdarynyń ýákiletti bólimshesi;

2) anyqtalmaǵan adamdardyń sotqa deıingi tergep-tekserý barysynda alynǵan, habarsyz ketken azamattardyń bıologııalyq týystarynyń, tanylmaǵan máıitterdiń bıologııalyq materıalynan alýdy – ishki ister organdarynyń ýákiletti bólimshesi nemese anyqtaý, tergeý organdary sot saraptamasyn taǵaıyndaǵan jaǵdaıda, sot saraptamasy organy, lısenzııa negizinde sot-saraptama qyzmetin júzege asyratyn jeke tulǵa júzege asyrady.

 

26-bap. Genomdyq aqparatty ózgertý jáne (nemese) tolyqtyrý

Genomdyq tirkeýden ótken adamdardyń genomdyq aqparatyn ózgertý jáne (nemese) tolyqtyrý daktıloskopııalyq jáne genomdyq tirkeýdi júrgizý qaǵıdalaryna sáıkes júzege asyrylady.

 

27-bap. Genomdyq aqparatty jınaqtaý jáne saqtaý

Genomdyq tirkeýdi júrgizý kezinde alynǵan genomdyq aqparatty jınaqtaýdy jáne saqtaýdy Qazaqstan Respýblı­kasynyń zańnamasyna sáıkes elektrondyq aqparattyq resýrstarda ishki ister organdary júzege asyrady.

 

28-bap. Genomdyq aqparatty paıdalaný

Genomdyq tirkeýdi júrgizý nátıjesinde alynǵan genomdyq aqparat:

1) qylmystyq quqyq buzýshylyqtardyń aldyn alý, olardy ashý jáne tergep-tekserý, sondaı-aq olardy jasaǵan adamdardy anyqtaý jáne belgileý;

2) Qazaqstan Respýblıkasynyń habarsyz ketken azamattaryn, Qazaqstan Respýblıkasynda turaqty turatyn nemese ýaqytsha bolatyn sheteldikter men azamattyǵy joq adamdardy izdestirý;

3) tanylmaǵan máıitter boıynsha Qazaqstan Respýblıkasy azamattarynyń, sheteldikter men azamattyǵy joq adamdardyń jeke basyn anyqtaý;

4) izdestirilip jatqan nemese anyqtalyp jatqan adamdardyń týystyq qatynastaryn anyqtaý maqsatynda paıdalanylady.

Habarsyz ketken azamattardyń bıologııalyq týystary­nyń genomdyq aqparaty osy baptyń 1-tarmaǵynyń 3) tarmaqshasynda kózdelgen maqsatta paıdalanylady.

 

29-bap. Genomdyq aqparatty saqtaý merzimderi

Genomdyq tirkeýge jatatyn sottalǵan adamnyń genomdyq aqparaty genomdyq tirkelgen kúninen bastap onyń qaıtys bolý faktisi anyqtalǵannan keıin jıyrma bes jyl ótkenge deıin, al onyń qaıtys bolǵany týraly málimetter bolmaǵan nemese sot ony qaıtys boldy dep jarııalaǵan kezde ol júz jasqa tolǵan kúnge deıin saqtalady. Bıologııalyq materıaly sotqa deıingi tergep-tekserý barysynda alynǵan anyqtalmaǵan adamdardy genomdyq tirkeýdi júrgizý kezinde alynǵan genomdyq aqparat genomdyq tirkelgen kúninen bastap jıyrma bes jyl saqtalady. Habarsyz ketken azamattardyń bıologııalyq týystaryn genomdyq tirkeýdi júrgizý kezinde alynǵan genomdyq aqparat habarsyz ketken adamnyń júrgen jeri anyqtalǵanǵa nemese oqıǵanyń nemese qylmys quramynyń bolmaýyna baılanysty qylmystyq is toqtatylǵanǵa deıin saqtalady. Tanylmaǵan máıitterdi genomdyq tirkeýdi júrgizý kezinde alynǵan genomdyq aqparat qaıtys bolǵan adamnyń jeke basyn anyqtaǵanǵa deıin, biraq genomdyq tirkelgen kúninen bastap jıyrma bes jyldan aspaı saqtalady.

 

30-bap. Genomdyq aqparatty joıý

Genomdyq tirkeýdi júrgizý nátıjesinde alynǵan genomdyq aqparatty osy Zańda kózdelgen saqtaý merzimderi ótkennen keıin, ony saqtaýdy júzege asyratyn ishki ister organdary joıady. Sottalǵannan keıin genomdyq tirkeýge ushyraǵan aqtalǵan adamnyń genomdyq aqparaty sottyń aqtaý úkimi zańdy kúshine engennen keıin bir jyldan erte joıylmaıdy. Genomdyq tirkeý kezinde alynǵan genomdyq aqparatty joıýdy ishki ister organdarynyń ýákiletti bólimshesi onyń basshysy bekitetin aktiler boıynsha:

1) genomdyq aqparatty joıý kúnin jáne negizin;

2) genomdyq aqparattyń tirkeý nómirin;

3) tirkelgen adamnyń tegin, atyn, ákesiniń atyn (ol bolǵan kezde), jynysyn, týǵan kúnin jáne jerin, jeke sáıkestendirý nómirin (ol bolǵan kezde), jeke basyn kýálandyratyn qujatynyń nómirin;

4) joıý tásilin;

5) genomdyq aqparatty joıýdy júzege asyrǵan laýazymdy adamdardyń tegin, atyn, ákesiniń atyn (ol bolǵan kezde), laýazymyn jáne qoltańbasyn, ýákiletti bólimsheniń ataýyn kórsete otyryp júzege asyrady.

Tanylmaǵan máıittiń genomdyq aqparatyn joıý aktisinde anyqtaý, tergeý organynyń ataýy jáne genomdyq tirkeýge bastamashy bolǵan laýazymdy adam, qylmystyq istiń nómiri, árekettiń saralanýy, tanylmaǵan máıit tabylǵan kún jáne oryn kórsetiledi.

 

4-taraý. DAKTILOSKOPIIаLYQ JÁNE GENOMDYQ TIRKEÝ SALASYNDAǴY MEMLEKETTIK RETTEÝ

31-bap. Qazaqstan Respýblıkasy Úkimetiniń daktıloskopııalyq jáne genomdyq tirkeý

salasyndaǵy quzyreti

Qazaqstan Respýblıkasynyń Úkimeti daktıloskopııalyq jáne genomdyq tirkeý salasynda:

1) daktıloskopııalyq jáne genomdyq tirkeý salasyndaǵy memlekettik saıasattyń negizgi baǵyttaryn ázirleıdi jáne olardyń júzege asyrylýyn uıymdastyrady;

2) daktıloskopııalyq jáne genomdyq tirkeýdi júrgizý qaǵıdalaryn bekitedi;

3) ózine Qazaqstan Respýblıkasynyń Konstıtýsııasymen, zańdarymen jáne Qazaqstan Respýblıkasy Prezıdentiniń aktilerimen júktelgen ózge de fýnksııalardy oryndaıdy.

 

32-bap. Qazaqstan Respýblıkasy ishki ister organdarynyń daktıloskopııalyq jáne genomdyq tirkeý salasyndaǵy quzyreti

Qazaqstan Respýblıkasynyń ishki ister organdary daktıloskopııalyq jáne genomdyq tirkeý salasynda:

1) daktıloskopııalyq jáne genomdyq tirkeýdi júrgizý qaǵıdalaryn ázirleıdi;

2) daktıloskopııalyq jáne genomdyq aqparattyń derekqoryn qalyptastyrý, júrgizý qaǵıdalaryn ázirleıdi jáne bekitedi;

3) Qazaqstan Respýblıkasynyń zańdarynda, Qazaqstan Res­­pýb­­lıkasy Prezıdentiniń jáne Qazaqstan Respýblıkasy Úki­meti­niń aktilerinde kózdelgen ózge de ókilettikterdi júzege asyrady.

 

33-bap. Syrtqy saıası qyzmet salasyndaǵy ýákiletti memlekettik organnyń daktıloskopııalyq tirkeý salasyndaǵy quzyreti

Syrtqy saıası qyzmet salasyndaǵy ýákiletti memlekettik organ daktıloskopııalyq tirkeý salasynda:

1) shetelde Qazaqstan Respýblıkasy azamatynyń pasportyn alýǵa úmitker Qazaqstan Respýblıkasynyń azamattarynan, Qazaqstan Respýblıkasynyń vızalaryn alý kezinde sheteldikter men azamattyǵy joq adamdardan daktıloskopııalyq aqparat jınaý jáne óńdeý qaǵıdalaryn ázirleıdi jáne bekitedi;

2) Qazaqstan Respýblıkasynyń zańnamasyna sáıkes daktıloskopııalyq tirkeýdi júzege asyrady;

3) Qazaqstan Respýblıkasynyń zańdarynda, Qazaqstan Respýblıkasy Prezıdentiniń jáne Qazaqstan Respýblıkasy Úkimetiniń aktilerinde kózdelgen ózge de ókilettikterdi júzege asyrady.

 

34-bap. Kólik salasyndaǵy ýákiletti

memlekettik organnyń daktıloskopııalyq

tirkeý salasyndaǵy quzyreti

Kólik salasyndaǵy ýákiletti memlekettik organ daktıloskopııalyq tirkeý salasynda:

1) Qazaqstan Respýblıkasy teńizshisiniń jeke kýáligin berý týraly ózderine qatysty sheshim qabyldanǵan adamdardyń daktıloskopııalyq aqparat derekqoryn qalyptastyrý, júrgizý qaǵıdalaryn ázirleıdi jáne bekitedi;

2) Qazaqstan Respýblıkasynyń zańnamasyna sáıkes, Qazaqstan Respýblıkasy teńizshisiniń jeke kýáligin berý týraly ózderine qatysty sheshim qabyldanǵan adamdardy daktıloskopııalyq tirkeýdi júzege asyrady;

3) Qazaqstan Respýblıkasynyń zańdarynda, Qazaqstan Respýblıkasy Prezıdentiniń jáne Qazaqstan Respýblıkasy Úkimetiniń aktilerinde kózdelgen ózge de ókilettikterdi júzege asyrady.

 

35-bap. Qazaqstan Respýblıkasy ulttyq

qaýipsizdik organdarynyń daktıloskopııalyq

tirkeý salasyndaǵy quzyreti

Qazaqstan Respýblıkasynyń ulttyq qaýipsizdik organdary daktıloskopııalyq tirkeý salasynda:

1) Qazaqstan Respýblıkasynyń Memlekettik shekarasyn kesip ótý kezinde daktıloskopııalyq aqparat boıynsha jeke basyn rastaý rásimin júzege asyrý jáne osy adamdardyń daktıloskopııalyq aqparat derekqoryn qalyptastyrý, júrgizý qaǵıdalaryn ázirleıdi jáne bekitedi;

2) Qazaqstan Respýblıkasynyń zańdarynda jáne Qazaqstan Respýblıkasy Prezıdentiniń aktilerinde kózdelgen ózge de ókilettikterdi júzege asyrady.

 

36-bap. Daktıloskopııalyq jáne genomdyq tirkeý salasyndaǵy qadaǵalaý

Prokýratýra organdary memleket atynan osy Zańnyń jáne Qazaqstan Respýblıkasynyń daktıloskopııalyq jáne genomdyq tirkeý salasyndaǵy ózge de normatıvtik quqyqtyq aktileriniń dálme-dál jáne birkelki qoldanylýyna joǵary qadaǵalaýdy júzege asyrady.

 

5-taraý. QORYTYNDY EREJELER

37-bap. Daktıloskopııalyq jáne (nemese) genomdyq tirkeý salasyndaǵy ýákiletti memlekettik organdardyń áreketterine (áreketsizdigine) shaǵym jasaý tártibi

Daktıloskopııalyq jáne (nemese) genomdyq tirkeý salasyndaǵy ýákiletti memlekettik organdardyń jáne olardyń laýazymdy adamdarynyń áreketterine (áreketsizdigine) Qazaqstan Respýblıkasynyń zańnamasynda belgilengen tártippen joǵary turǵan organǵa (joǵary turǵan laýazymdy adamǵa) nemese sotqa shaǵym jasalýy múmkin.

 

38-bap. Qazaqstan Respýblıkasynyń daktıloskopııalyq jáne genomdyq tirkeý týraly zańnamasyn buzǵany úshin jaýaptylyq

Qazaqstan Respýblıkasynyń daktıloskopııalyq jáne genomdyq tirkeý týraly zańnamasyn buzý Qazaqstan Respýblıkasynyń zańdaryna sáıkes jaýaptylyqqa alyp keledi.

 

39-bap. Osy Zańdy qoldanysqa engizý tártibi

Osy Zań 2021 jylǵy 1 qańtardan bastap qoldanysqa engiziledi.

 

Qazaqstan Respýblıkasynyń Prezıdenti N.NAZARBAEV

 

Astana, Aqorda, 2016 jylǵy 30 jeltoqsan

№ 40-VI QRZ