Almatyda basketboldan ótken Qazaqstan kýbogy jolyndaǵy dodaǵa elimizdiń tańdaýly degen alty komandasy qatysty.
Jeńimpazdy anyqtaǵan shesheýshi synda «Astana» men «Atyraý barystary» komandalary kezdesti. Oıynnyń birinshi jartysy «Astana» komandasynyń jeńisimen aıaqtaldy. Matchtyń úshinshi kezeńinde de Atyraý komandasy astanalyqtardy qýyp jete almady. Úshinshi kezeńde «Astana» toǵyz upaı aıyrmasymen, ıaǵnı 47:38 esebimen basymdyq tanytty. Sheshýshi jáne de tartysty oıyn bolǵandyqtan, basketbolshylar alańqaı ústinde tártipti jıi buzyp ta jatty. Ásirese, kezdesýdiń sońynda sharshańqyrap qalǵan oıynshylar birinen soń biri tóreshilerden eskertýler aldy.
Sonymen, fınalda órnekti de óte qyzyqty oıyn úlgisin kórsetken «Astana» komandasy 66:46 esebimen jeńiske jetip, Qazaqstan kýbogynyń ıegeri atandy.
Budan bólek, kýbok synynyń qola júldesin qostanaılyq «Tobyl» men aqtaýlyq «Kaspıı» komandalary ózara sarapqa saldy. Bul match ta asa tartysty ótti. Kezdesý barysynda jınaqy oınap, jeńiske degen jigerlilik tanytqan «Kaspıı» klýby qarsylasyn 99:86 esebimen utyp, týrnırdiń júldegeri atandy.
Jarys qorytyndysynda arnaıy atalymdar boıynsha úzdik oıynshylar anyqtaldy. Olardyń qatarynda Rústem Murzaǵalıev («Astana»), Rýstam Erǵalı («Astana»), Pavel Ilın («Atyraý barystary»), Anton Ponomarev («Astana») jáne Vsevolod Fadeıkınniń («Almatylyq Legıon») esimderi ataldy.
Aınash ESALI,
«Egemen Qazaqstan»
ALMATY