Elordada polısııa qyzmetkerleriniń zańdy talaptaryna baǵynbaı, olarǵa qarsy kúsh qoldanǵan qala turǵynyna qatysty sot úkimi shyqty, dep habarlaıdy Egemen.kz.
Astana qalalyq prokýratýrasynyń baspasóz qyzmetiniń málimetinshe, oqıǵa qaladaǵy turǵyn úılerdiń biriniń aýlasynda bolǵan. Masań kúıde bolǵan er adam qoǵamdyq tártipti buzyp, ózine eskertý jasaǵan polısııa qyzmetkerleriniń zańdy talaptaryna baǵynýdan bas tartqan. Tártip saqshylaryn balaǵattap, olardyń ar-namysy men qadir-qasıetin qorlaǵan ol munymen toqtamaı, belsendi qarsylyq kórsetip, bılik ókilderine qatysty kúsh qoldanǵan.
Ishki ister mınıstrligi: Polısııa qyzmetkerlerine kúsh qoldanǵan barlyq tulǵalar qamaýǵa alyndy
Quqyqqa qarsy áreketterdiń saldarynan polısııa qyzmetkerleri densaýlyqqa aýyr zııan keltirmeıtin ártúrli dene jaraqattaryn alǵan.
Sot prosesi barysynda memlekettik aıyptaýshy sottalýshynyń kinásin tolyq dáleldeıtin bultartpas aıǵaqtardy usyndy. Kináli dep tanylǵan azamat óz isin tolyq moıyndap, jasaǵan áreketine ókinetinin jetkizdi.
Qostanaıda bir top mas adam polısııa qyzmetkerine shabýyl jasady
Sot úkimimen azamat kináli dep tanylyp, oǵan 3 jyl merzimge bas bostandyǵynan aıyrý jazasy taǵaıyndaldy. Úkim zańdy kúshine endi.
Elordalyq prokýratýra bılik ókilderin qorlaý, olardyń zańdy talaptaryna baǵynbaý jáne quqyq qorǵaý organdarynyń qyzmetkerlerine qatysty kúsh qoldaný aýyr qylmystyq jaýaptylyqqa ákep soǵatynyn qatań eskertedi. Vedomstvo azamattardy zań talaptaryn qatań saqtaýǵa jáne qoǵamdyq tártipti buzbaýǵa shaqyrady.