Memleket basshysy Kenııa Prezıdentiniń elimizge jasaǵan alǵashqy tarıhı sapary qos memlekettiń yntymaqtastyǵyn jańa beleske kóteretinine senim bildirdi, dep habarlaıdy Egemen.kz Aqordanyń baspasóz qyzmetine silteme jasap.
«Kenııa – Qazaqstannyń Afrıka qurlyǵyndaǵy eń iri jáne senimdi saýda seriktesiniń biri. Biz eki eldiń yqpaldastyǵyn odan ári bekemdeı túsýge nıettimiz. Kenııa Respýblıkasy sońǵy jyldary damýdyń dańǵyl jolyna shyqty. Shyǵys Afrıkanyń jaýhary sanalatyn bul el qarjy, aýyl sharýashylyǵy, kólik-logıstıka jáne basqa da salalarda eleýli jetistikke qol jetkizdi. Naırobı qalasy mańyzdy halyqaralyq dıplomatııa ortalyǵy sanalady. Munda Birikken Ulttar Uıymynyń birneshe qurylymy tıimdi jumys istep tur. Jalpy alǵanda, Kenııanyń álemdik sahnadaǵy bedeli artyp keledi. Bul Prezıdent Rýtonyń sarabdal saıasaty men kóregen kóshbasshylyǵynyń nátıjesi dep bilemiz. Biz byltyr Naırobıde óz elshiligimizdi ashtyq. Bul sheshim Qazaqstannyń Kenııaǵa shynaıy yqylasy men dostyǵyn ańǵartady. Jalpy, bul – Qazaqstannyń Afrıka qurlyǵyndaǵy altynshy dıplomatııalyq ókildigi. Elimiz Afrıka memleketterimen baılanysyn bekemdeýge basa mán beredi», dedi Qazaqstan Prezıdenti.
Qasym-Jomart Toqaevtyń aıtýynsha, taraptar birqatar mańyzdy másele boıynsha mazmundy kelissóz júrgizgen.
«Ásirese, saýda-ekonomıkalyq yqpaldastyqty keńeıtýge nazar aýdardyq. Kólik, aýyl sharýashylyǵy, aqparattyq tehnologııalar, týrızm, ónerkásip jáne basqa da salada birlesken jobalardy iske asyrýǵa ýaǵdalastyq. Elderimizdiń arasynda turaqty túrde tikeleı áýe reısterin ashý múmkindigi týraly da pikir almastyq. Biz aýyl sharýashylyǵy ónimderin, eń aldymen, bıdaıdy jáne ózge de taýarlardy Afrıka naryǵyna jetkizýge múddelimiz. Osy maqsatpen Mombasa portyn paıdalaný máselesin qarastyrdyq. Bul – osy aımaqtyń segiz memleketine jol ashatyn Shyǵys Afrıkadaǵy eń iri logıstıka ortalyǵynyń biri. Búginde Qazaqstan naryǵynda Kenııanyń birqatar taýary, sonyń ishinde sháı jáne kofe ónimderi bar. Muny eki el arasynda ornyqqan turaqty saýda qatynasynyń kórinisi deýge bolady. Sonymen qatar biz Kenııa ónimderin Qazaqstan arqyly Eýrazııa elderine jetkizý máselesin talqyladyq. Saýda-ekonomıkalyq yqpaldastyqty jańa deńgeıge kóterý qajet ekenin aıttyq. Qazaqstan-Kenııa Iskerlik keńesin qurý týraly bastama kóterdik. Bul keńes naqty jobalardy ilgeriletýge, ózara alys-beristi arttyrýǵa múmkindik beredi», dedi Memleket basshysy.
Qazaqstan Prezıdenti Kenııa elimizdiń Egov júıesindegi, ǵarysh jáne aqparattyq tehnologııa salalaryndaǵy jetistigine qyzyǵýshylyq tanytyp otyrǵanyn aıtty
«Sapar aıasynda Prezıdent Rýto myrza AlemAI halyqaralyq jasandy ıntellekt ortalyǵynyń jáne Qazaqstannyń ulttyq ǵarysh ortalyǵynyń jumysymen tanysady. Kelissózder barysynda mádenıet, týrızm, bilim jáne ǵylym salalaryndaǵy baılanystarǵa da kóńil bóldik. Kenııa tabıǵatty qorǵaý jáne bıoalýandyqty saqtaý máselesine aıryqsha mán beredi. Bul ustanym bizdiń elimizdegi «Taza Qazaqstan» ıdeologııasymen úndes ekenin erekshe atap ótkim keledi. Sondaı-aq búgin elordamyzda Qazaqstan-Kenııa bıznes-forýmy ótip jatyr. Osy mańyzdy jıynǵa eki eldiń isker azamattary qatysýda. Bul is-shara qos taraptyń alys-berisin odan ári tereńdetýge múmkindik bereri sózsiz. Biz úkimetterimizge jan-jaqty seriktestikti jandandyrý úshin naqty sharalar qabyldaý jóninde tapsyrma berýge ýaǵdalastyq», dedi Qasym-Jomart Toqaev.
Memleket basshysy Kenııa Prezıdentin I dárejeli «Dostyq» ordenimen marapattady
Prezıdentter kelissóz barysynda halyqaralyq máseleler jóninde pikir almasqan
«Afrıka qurlyǵyndaǵy jáne Taıaý Shyǵystaǵy ahýaldy talqyladyq. Naırobı aımaqtyq qaqtyǵystardy retteýdi kózdeıtin bitimgerlik bastamalarǵa belsendi qoldaý kórsetýde. Sondaı-aq Kenııa Afrıkadaǵy beıbitshilik pen turaqtylyqty nyǵaıtý úshin júıeli jumys júrgizip keledi. Biz muny joǵary baǵalaımyz. Álemdegi kóptegen túıtkilge qatysty Qazaqstan men Kenııanyń ustanymdary – uqsas. Eki el de halyqaralyq máselelerdi tek beıbit, dıplomatııalyq jolmen, ıaǵnı, kelissózder arqyly sheshý kerek dep esepteıdi. Biz Birikken Ulttar Uıymy jáne basqa da halyqaralyq qurylymdar aıasyndaǵy yqpaldastyǵymyzdy kúsheıtýge kelistik. Jalpy, búgingi kelissózder nátıjeli ári mazmundy boldy deýge tolyq negiz bar. Biz Qazaqstan men Kenııa arasyndaǵy baılanysty nyǵaıtýǵa, ózara tıimdi seriktestikti keńeıtýge jáne túrli saladaǵy naqty jobalardy birlesip júzege asyrýǵa daıynbyz. Bul eki eldiń de múddesine saı keledi», dedi Memleket basshysy.
Kenııa Prezıdenti Memleket basshysymen kóptegen saladaǵy yntymaqtastyqty tereńdetýge baǵyttalǵan syndarly jáne nátıjeli kelissóz júrgizgenine nazar aýdardy.
«Biz ekijaqty qarym-qatynastyń qazirgi jaı-kúıin qarastyryp, saýda, ınvestısııa, ınnovasııa jáne óńirlik ózara yqpaldastyq baǵyttaryndaǵy naqty sharalardy iske asyrý jaıynda ýaǵdalastyq. Kenııa Qazaqstandy mańyzdy strategııalyq seriktes jáne Ortalyq Azııaǵa, tutas Eýrazııa aımaǵyna negizgi qaqpa sanaıdy. Biz Qazaqstannyń Shyǵys jáne Ortalyq Afrıka elderimen baılanysyna dáneker bolýǵa daıynbyz. Qazaqstan tarapyna Naırobı qalasynda qurlyqtaǵy qyzmetin uıymdastyrýdyń strategııalyq bazasyn jasaqtaýdy, al Mombasa jáne Lamý porttaryn óńirlik naryqqa shyǵý úshin negizgi logıstıkalyq hab retinde qarastyrýdy usyndyq», dedi Ýılıam Rýto.
Buǵan deıin Qazaqstan men Kenııa Birlesken málimdeme qabyldaǵany týraly habarlaǵanbyz.