Qazaqstan Respýblıkasynyń Prezıdenti Nursultan Nazarbaev jýrnalıstermen kezdesýinde táýelsizdiktiń alǵashqy jyldaryndaǵy jaǵdaıdy eske aldy.
"Birinshi Parlamentimiz 1992 jyly saılandy. Ol kommýnıstik parlament boldy. Sebebi adamdardyń Keńes úkimetinde qalyptasqan oı-sanasy sol júıede boldy. Ol kezde qazirgi jaǵdaıdy bilmediń dep te eshkimdi kinálaýǵa bolmaıdy. Biraq, bizge burynǵy jaǵdaıdy artta qaldyryp, naryqqa ótý kerek boldy. Sol kezde biz eshbir zań qabyldaı almadyq. Parlamentimiz zań qabyldaý kerek boldy. Biraq, qabyldamady. Túsinbedi.
Men kelip, Parlamentte otyryp, árbir zańdy túsindirdim. Nege olaı jasaý kerektigimizdi, baptar týraly bárin aıttym. Tipti, olar qoryqty desek te bolady. Qoryqqandyqtan qabyldaǵysy kelmedi. Jekeshelendirý týraly aıtsaq, ony qalaı beremiz dep oıbaı saldy. Sondyqtan, sol jerde parlamentti taratýǵa týra keldi. Sodan keıin jaýapkershiliktiń barlyǵyn Prezıdent ózine alýǵa týra keldi.
Sol kezde men 147 zań kúshi bar jarlyqqa qol qoıdym. Bul jarlyqtarda naryqtyq ekonomıkaǵa qajetti orta jáne shaǵyn bıznes, jekeshelendirý, ınvestısııa máseleleri qaraldy. Tek sonyń arqasynda ǵana TMD-nyń basqa elderiniń aldyna tústik. Tek sonyń arqasynda ǵana biz TMD-nyń aldyna tústik. Prezıdenttik bılik búgingi jetistikterge jetýimizge septigin tıgizdi", dedi Elbasy.
Sonymen qatar, Prezıdent óziniń osy ýaqyt aralyǵynda dıktatorǵa da, avtokratqa da aınalmaǵanyn, biraq qajet kezde qataldyq tanytqanyn aıtty.
"Qataldyq boldy. Sebebi, barlyq qabyldanǵan baǵdarlamalar men jumystardyń oryndalýyn, onyń nátıjesin baqyladym. Mine, 25 jylda osyndaı nátıjege jetip otyrmyz. Qazir kedeılik azaıdy, eńbekaqy artty. Qazaqstan qazir ózgergendikten, ókilettikterdi bólý qajettiligi týdy. Mysaly, men burynǵy Konstıtýsııa boıynsha zań qabyldaıtynmyn nemese ekonomıkalyq baǵdarlamalardy men bekitetinmin. Zań qabyldaý Parlamentke berildi. Al baǵdarlamalardy Úkimet daıyndasyn, ózi qabyldasyn da ózi baqylasyn. Jaýapkershilikti moınyna alsyn. Bılik bir adamnyń tóńireginde bolmaýy kerek. Bul zaman talaby", dedi Prezıdent. Elbasy Qazaqstanda Prezıdenttik bıliktiń qalatynyn aıtyp, Konstıtýsııalyq ózgerister ýaqytymen bolyp jatqanyn jáne ol elimizge qyzmet etetinin jetkizdi.