О́tken jyldyń maýsym aıynan bastap Kókshetaý qalasynda "Ana úıi" atalatyn balalardy asyrap alý ortalyǵy jumys isteı bastaǵan bolatyn. Sodan bergi ýaqytta atalǵan ortalyq balalar úıinde tárbıelenip júrgen 14 jetkinshekke asyrap alýshy otbasyn taýyp bergen.
Negizinen «Balalardy asyrap alý ortalyǵy» jobasy Aqparat jáne kommýnıkasııalar mınıstrliginiń, jergilikti atqarýshy organdardyń jáne BAQ-tyń qoldaýymen qazaqstandyq kásipkerler tarapynan qolǵa alynǵan-dy. «Balanyń tolyqqandy jáne áleýmettik jaqsy jaǵdaıda damýynyń basty sharty – otbasylyq bereke. Bizder úshin balanyń otbasynda tárbıelenýi óte mańyzdy», deıdi «Ana úıi» qyzmetkeri Quralaı Jumabekova. Joba sheńberinde oblys boıynsha turaqty negizde qabyldap alatyn ata-analar mektebi jumys isteýde. Onda asyrap alýshylar úshin Qazaqstan jaǵdaıyna yńǵaılanyp alynǵan halyqaralyq tájirıbege negizdelgen trenıngtik baǵdarlamalar ótkizilip, psıholog-trenerler dáris beredi. Negizinen 12 modýlden (árqaısysy 3 saǵattan) turatyn baǵdarlama asyrap alýshy ata-analarǵa búldirshinderdi balalar úıinen alý kezinde salmaqty da sanaly sheshim qabyldaýǵa múmkindik týǵyzady. Bolashaq asyrap alýshy ata-analar medısına, quqyq, pedagogıka jáne psıhologııa salasynyń bazalyq biligin ıgeredi, ıaǵnı, balanyń otbasylyq jaǵdaıdy qabyldaý ereksheligin, tıimdi tárbıeleýdi jáne bala kútýdi úırenedi. Mekteptiń qysqa ýaqyt jumys isteýi kezeńinde 18 otbasy oqytýdan ótip, onyń 11-i balalardy óz otbasylaryna qabyldap aldy. Reti kelgende aıta ketý kerek, ústimizdegi jyldyń qańtarynan bastap «Patronattyq úı» otbasylyq qurylym túri jumys isteı bastady.
Asqar TURAPBAIULY,
«Egemen Qazaqstan»
Aqmola oblysy