QR Mádenıet jáne sport mınıstrliginiń tapsyrysymen Sháken Aımanov atyndaǵy "Qazaqfılm" AQ Ábish Kekilbaevtyń "Shyńyraý" povesiniń jelisimen tolyqmetrajdy kórkem fılm túsiredi, dep habarlady kınostýdııanyń baspasóz qyzmeti.
Qazir ssenarıı avtory jáne fılm rejısseri Jańabek Jetirýov kastıng ótkizip, túsirilim tobyn jınap jatyr. Ol buryn "Aqqyz" sekildi kóptegen kórkem fılmder men Ábish Kekilbaevtyń ómirine arnalǵan "Samǵaý " atty qujatty fılm avtory.
Fılm Mańǵystaý oblysynda, Aqtaý qalasynda Kaspıı jaǵalaýynda túsiriledi.
Rejısser povest sıýjetin tolyǵymen saqtap qalǵan. "Ádebı týyndyny ekranǵa shyǵarýǵa qajetti degen azdaǵan ǵana saryndar qostym. Prozada sezim men tabıǵatty sıpattap, sýrettep berýge bolady. Al kınematografııada ony is-áreketter men oqıǵalar arqyly jetkizý kerek", deıdi rejısser.