3-4 jeltoqsanda Almatydaǵy Balýan Sholaq atyndaǵy sport saraıynda sporttyq jekpe-jek jáne kúsh qoldanatyn sport túrleri konfederasııasy kýbogynyń fınaldyq kezeńi ótedi. Tuńǵysh ret boks, kúres, dzıýdo jáne taekvondo (WTF) sportynan birlesken komandalyq jarys retinde ótkiziletin sharanyń jalpy júlde qory - 125 mln. teńge. Konfederasııa kýbogy úshin qatysýshy komandalar jerebe boıynsha tórt topqa bólingen edi:
«A» toby: Qyzylorda oblysy, Almaty oblysy, Astana jáne Almaty qalasy.
«B» toby: ShQO, BQO, SQO jáne Aqmola oblysy.
«S» toby: OQO, Pavlodar oblysy, Qostanaı oblysy, Qaraǵandy oblysy.
«D» toby: Jambyl oblysy, Aqtóbe oblysy, Atyraý oblysy jáne Mańǵystaý oblysy.
Irikteý kezeńiniń nátıjesinde, grek-rım kúresinen jartylaı fınalda Almaty oblysy Ońtústik Qazaqstan oblysymen kezdesse, Soltústik Qazaqstan quramasy Jambyl oblysymen jolyǵady.
Erkin kúresten Almaty oblysynyń jartylaı fınaldaǵy qarsylasy Ońtústik Qazaqstan oblysy, Shyǵys Qazaqstan óńiri aqtóbeliktermen beldesedi.
Dzıýdodan fınalǵa beriler joladama úshin qyzylordalyq sportshylar Qaraǵandy quramasymen talassa, Shyǵys Qazaqstan oblysy jambyldyq dzıýdoshylarmen tatamıge shyǵady.
Taekvondodan Almaty qalasy OQO sportshylarymen kúsh synasady. Al, Batys Qazaqstan oblysy Jambyl quramasymen kezdesedi.
Sonymen qatar, jartylaı fınalda boks kezdesýleri de ótedi. Buǵan deıin úzdik tórt komanda anyqtalǵan. Mańǵystaý, Ońtústik Qazaqstan, Almaty oblystary men Astana qalasy fınalǵa shyǵatyn myqtylardy anyqtaıdy.
Sondaı-aq, Konfederasııa kýbogynyń fınaldyq kezeńine Eldos Smetov (Jambyl oblysy, dzıýdo), Ádilbek Nııazymbetov (Mańǵystaý oblysy, boks), Nursultan Mamaev (OQO, taekvondo), Jansaı Smaǵulov (Qaraǵandy oblysy, dzıýdo), Erjan Shynkeev (Qaraǵandy oblysy, dzıýdo), Rasýl Kalıev (ShQO, erkin kúres), Nurmahan Tinálıev (Almaty oblysy, grek-rım kúresi), Aslan Kahıdze (Almaty oblysy, erkin kúres), Berik Abdrahmanov (Mańǵystaý oblysy, boks) syndy tanymal sportshylar da qatysady.