Mádenıet jáne sport mınıstrliginiń habarlaýy boıynsha, 70-shi Kann kınofestıvali 17 mamyrda jalaýyn jelbiretken bolatyn. Kıno óneriniń aıtýly merekesi dástúr boıynsha 28 mamyrǵa deıin jalǵaspaq. Qazaqstannyń alǵashqy pavılony Festıvalder saraıynyń janyndaǵy «Le Village International» aýmaǵyna jaıǵasty. Qazaqstan Respýblıkasy Mádenıet jáne sport mınıstrligi men Halyqaralyq «Eýrazııa» kınofestıvali uıymdastyrý komıtetiniń tikeleı basshylyǵymen ashylǵan Qazaqstannyń Ulttyq pavılony fılmder men túrli jobalardy tanytý boıynsha kásibı kezdesýler men suhbattar ótkizýge múmkindik berdi. Kann qalasynyń meri Davıd Lısnard pen qazaqstandyq delegasııanyń kezdesýine Qazaqstannyń Fransııadaǵy Tótenshe jáne ókiletti elshisi Nurlan Dánenov, Fransııanyń Qazaqstandaǵy elshisi Fransıs Eten, Mádenıet jáne sport vıse-mınıstri Asqar Batalov, Qazaq ulttyq óner ýnıversıtetiniń rektory Aıman Musaqojaeva, kınematografııalyq óner men ǵylymdar ulttyq akademııasynyń prezıdenti Rashıd Nuǵmanov, «Eýrazııa» HKF qoldaýshysy «Human Development Group» kompanııasynyń negizin qalaýshy jáne uıymdastyrý komıtetiniń tóraǵasy Asqar Bekbaev qatysty. «Kınofestıval aıasynda bizdi Kann qalasynyń meri arnaıy qabyldady. Kezdesý barysynda qazaqstandyq mádenıetti álemdik deńgeıde nasıhattaýǵa qatysty birqatar máseleler talqylandy. Mundaı qadamdar el Prezıdentiniń rýhanı jańǵyrý ıdeıalarymen jaqyn úndesedi», dep atap ótti óz sózinde Mádenıet jáne sport vıse-mınıstri Asqar Batalov. Kezdesý sátinde ózara mádenı qarym-qatynasty damytý boıynsha pikirler qozǵalyp, mádenıet pen týrızm salasyndaǵy eki eldiń tıimdi yntymaqtastyq baılanystaryn keńeıtý maqsatyndaǵy usynystar ortaǵa salyndy. Sharaǵa qatysýshylar strategııalyq seriktestik eki eldiń mádenıet salasyna oń áserin tıgizetindigin atap ótti. Halyqaralyq deńgeıdegi álemniń eń bedeldi kınofestıvali aıasynda ótken Qazaqstan pavılonynyń tanystyrylymy elimizdiń kınoóndirýshi memleket retindegi bedelin nyǵaıtyp, kınoındýstrııa salasyndaǵy áriptestik múmkindikterge keńinen jol ashpaq. Qazaq ulttyq óner ýnıversıtetiniń rektory Aıman Musaqojaeva mádenıet pen týrızm salasyndaǵy yntymaqtastyq eki eldiń ekonomıkalyq jaǵynan ǵana emes, kıno salasyndaǵy qarym-qatynasynyń nyǵaıýyna da oń yqpal etetinin jetkizdi. – Kann kınofestıvalinde Qazaqstan pavılonynyń ashylýy, – dep atap ótti qazaqstandyq óner maıtalmany, – halyqaralyq kınematografııalyq qaýymdastyqpen mádenı baılanystardyń nyǵaıýyna, memlekettiń jáne Memleket basshysy Nursultan Nazarbaevtyń qoldaýymen kınoındýstrııasy damyǵan el retinde ımıdjiniń qalyptasýyna áserin tıgizetindigine senimdimin. Pavılon jumysy aldaǵy ýaqytta ulttyq fılmderdi birlesip túsirý men qarjylandyrýǵa áriptesterdi tartýǵa, tájirıbe almasý men qazaqstandyq kınoóndiristiń jańǵyrýyna, týrızmniń damýyna septigin tıgizetin bolady.
Qarshyǵa KÚLEN