Qorǵanys jáne áskerı qyzmet máseleleri boıynsha túzetýler qabyldandy

Qujattardyń erejeleri qaıtarylatyn adamdardy anyqtaıdy, olardyń rettelgen jáne qaýipsiz tranzıtiniń tetikterin retteıdi, readmıssııa, tranzıt nemese áńgimelesýdi júrgizý týraly suraý salýdy júzege asyrý úshin qajetti qujattar tizbesin qamtıdy, adamdardy birge júrý arqyly berýdiń sharttary men tártibin aıqyndaıdy.  Qujattardy ratıfıkasııalaý eki memleket arasyndaǵy zańsyz kóshi-qonǵa qarsy is-qımyl salasyndaǵy yntymaqtastyqty jetildirýge yqpal etedi.  Qazaqstan men Reseı arasyndaǵy temirjol kóligi kásiporyndarynyń, mekemeleri men uıymdarynyń qyzmetin quqyqtyq retteýdiń erekshelikteri týraly úkimetaralyq kelisimge ózgerister engizý týraly hattama ratıfıkasııalandy.  Hattamany ratıfıkasııalaý Qazaqstannyń shekaralyq oblystarynyń turǵyndaryna Reseı Federasııasynyń aýmaǵy boıynsha shekaralyq baqylaýdy júrgizbeı tranzıtpen ótýlerine múmkindik beredi. Eki memlekettiń atqarýshy bılik organdary temirjol jolaýshylar tasymalyn júzege asyratyn tasymaldaýshylardy aıqyndaý jónindegi qaǵıdany, shyǵystardyń kólemderin aıqyndaý jáne olardy sýbsıdııalaý ádistemesin belgileıtin bolady.  Zańnamaǵa ósimdikter men janýarlar dúnıesi máseleleri boıynsha túzetýler birinshi oqylymda qaralyp, maquldandy.  Onda 14 zańnamalyq aktige, onyń ishinde 7 kodekske ózgerister men tolyqtyrýlar engizý kózdelip otyr.  Engiziletin ózgerister men tolyqtyrýlar: Úkimetke sırek kezdesetin jáne joıylyp ketý qaýpi tóngen ósimdikterdiń túrlerin alyp qoıý týraly sheshim qabyldaý jónindegi quzyret berýdi; orman sharýashylyǵy salasyndaǵy ýákiletti organǵa basqa sanattaǵy jerdi orman qory jerine aýystyrý qaǵıdasyn ázirleý jáne bekitý jónindegi quzyretti berýdi; uzaq merzimdi jáne qysqa merzimdi orman paıdalaný túrlerin naqtylaýdy; uzaq merzimdi orman paıdalaný tenderlerine Qazaqstan azamattaryna jáne bizdiń elimizdegi sheteldikter qatyspaıtyn zańdy tulǵalarǵa ǵana quqyq berýdi; janýarlar túrlerin ıntrodýksııalaý kezindegi ekologııalyq talaptardy naqtylaýdy; janýarlardy Qazaqstanǵa ákelý jáne elden áketý máselelerin retteýdi; jekelegen zııandy jáne asa qaýipti zııandy organızmdermen kúresý úshin pestısıdterdi ýaqytsha tirkeýdi; balyq resýrstaryn jáne basqa da sý janýarlaryn qorǵaýdy, ósimin molaıtýdy jáne ornyqty paıdalanýdy júzege asyrý úshin ıhtıologııalyq baıqaýdy; janýarlar álemin qorǵaýdy, ósimin molaıtýdy jáne ornyqty paıdalanýdy júzege asyrý úshin jergilikti atqarýshy organdardyń mamandandyrylǵan uıymdardy qurýyn; erekshe qorǵalatyn tabıǵı aýmaqtardyń ýchaskelerinde bıosferalyq rezervattardy qurýdy; orman sharýashylyǵy men tabıǵat qorǵaý mekemeleriniń mamandaryn quqyqtyq jáne áleýmettik qorǵaýdy jáne basqalardy kózdeıdi.  Otyrysta Qorǵanys jáne áskerı qyzmet máseleleri boıynsha zańnamaǵa túzetýler jan-jaqty talqylanyp, qabyldandy.  Zań jobasynyń maqsaty quqyqtyq olqylyqtardy, ártúrli zańnamalyq aktilerdiń quqyq normalary arasyndaǵy qaıshylyqtardy joıý arqyly áskerı qyzmet jáne qorǵanys salasyndaǵy qoldanystaǵy zańnamany jetildirý, sondaı-aq áskerı qyzmetshilerdiń áleýmettik jáne quqyqtyq qorǵalýyn qamtamasyz etý bolyp tabylady.  Atap aıtqanda, túzetýler Qorǵanys mınıstrliginiń, Qarýly Kúshter Bas shtabynyń, áskerı basqarý organdarynyń fýnksııalaryn naqtylaıdy jáne tolyqtyrady.  Qorǵanystyq tapsyrysty oryndaý kezindegi operatorlardyń, ýákiletti uıymnyń jáne atqarýshylardyń fýnksııalary aıqyndalǵan.  Materıaldyq-tehnıkalyq qamtamasyz etý áskerlerin jáne aýmaqtyq áskerlerdi qosý esebinen Qarýly Kúshterdiń jalpy quramy keńeıtildi.  Azamattardy kelisimshart boıynsha áskerı qyzmetke irikteýge arnalǵan sıpattamalar belgilengen. Máselen, kelisimshart boıynsha áskerı qyzmetke zańda belgilengen tártippen ótelmegen nemese alyp tastalmaǵan sottylyǵy bar adam qabyldanbaıdy, al tizbesin ýákiletti organnyń basshysy bekitetin laýazymdarǵa ornalasý úshin adamnyń psıhofızıologııalyq nemese polıgrafologııalyq zertteýden ótý mindeti bekitildi.  Senatorlar Konstıtýsııalyq Keńestiń múshesi Ubaıdolla Myrzaǵalıuly Stamqulovtyń ókilettigin toqtatý týraly jáne Parlament Senaty Tóraǵasynyń Konstıtýsııalyq Keńestiń múshesi qyzmetine Rahmet Muqashevty taǵaıyndaý týraly usynýyn da qarady.  Otyrys barysynda senatorlar saýaldary jarııa etildi. Depýtat Murat Baqtııaruly «О́simdikter álemin qorǵaý týraly» zań qabyldaýdyń qajettigi jónindegi jáne emdik shópterdi qorǵaýdyń keshendi sharalary týraly; Álı Bektaev Kentaý qalasynyń jáne qala mańyndaǵy eldi mekenderdiń ekologııalyq ahýaly týraly depýtattyq saýal joldady.