Qaırat Aıtýǵanovtyń málimetinshe, búgingi tańda kóktemgi-dala jumystary 85%-ǵa aıaqtalǵan. Kóktemniń kesh kelýine qaramastan, jumys qarqyny ótken jylǵy deńgeımen teń, al jekelegen óńirler boıynsha 2016 jylǵy deńgeıden joǵary.
«Nátıjesinde, talap etiletin dándi-daqyldar aýdany 932 myń gektarǵa keńeıýde. Sońǵy jyldary astyq sapasynyń jyl saıyn tómendeýi baıqalady. Birinshi, úshinshi klasqa jatatyn astyq kólemi 2011 jyly - 88%, 2016 jyly 45% quraǵan, osy rette 4 jáne 5 klasqa jatatyn tómen sapaly astyq kólemi kerisinshe 2011 jylǵy 10%-dan 2016 jylǵy 41%-ǵa deıin ulǵaıǵan», - dedi birinshi vıse-mınıstr.
Osyny eskere otyra, mınıstrlik birqatar sharalar qabyldady.
«Tuqym sharýashylyǵyn sýbsıdııalaýǵa 7,7 mln teńge kózdeldi, bul 2016 jylmen salystyrǵanda 3,2 ese artyq. Osy rette, ákimdikter bastapqyda 3,7 mlrd teńge bólgen bolatyn, bul qajetti qarajattan 56%-ǵa az. Ákimdiktermen jumys júrgizý qorytyndylary boıynsha qosymsha 4 mlrd teńge bólindi. Bul aǵymdaǵy jyly sapaly tuqym sebý kólemin 2 ese ulǵaıtýǵa múmkindik berdi. Invest-sýbsıdııalaý baǵdarlamasy tuqym sharýashylyǵyn damytý úshin zamanaýı tuqym ósirý tehnıkasy engizildi», - dep atap ótti spıker.
Qaırat Aıtýǵanovtyń aıtýynsha, taýar óndirýshilerdi sapaly tuqym paıdalanýǵa mindetteıtin zańnamalyq norma jáne osy talaptardy saqtamaǵany úshin ákimshilik jaýapkershilik engizý kózdelip otyr.
Budan bólek, tyńaıtqyshtardy paıdalanýǵa yntalandyrý maqsatynda birqatar tásilder qabyldandy, olar tyńaıtqyshtardy paıdalaný kólemin ulǵaıtýǵa múmkindik berdi.
«Tyńaıtqyshtardy sýbsıdııalaýǵa 13 mlrd teńge bólindi, bul 2016 jylmen salystyrǵanda 2 mlrd teńgege artyq. Nátıjesinde, tyńaıtqyshtardy paıdalaný kúrt artty. 407 myń tonnaǵa ótinim berildi, bul 2016 jylmen salystyrǵanda 1,5 ese artyq. Sýbsıdııalanǵan tyńaıtqysh túrleri 2016 jylǵy 85-ten 2017 jylǵy 161-ge deıin ósti. Búginde 200 myń tonna alyndy», - dedi Q. Aıtýǵanov.
Sondaı-aq, búgingi kúni egis alqaptaryn ártaraptandyrý jumysy júrgizilip jatyr. Ol úshin mınıstrlikter men ákimdikter arasynda 2021 jylǵa deıingi memorandýmdarǵa qol qoıyldy. Nátıjesinde, talap etiletin dándi-daqyldar aýdany keńeıýde.