Dúnıejúzilik ekonomıkalyq forýmnyń deregi boıynsha, 2016 jyly Parlamenttegi áıel depýtattarynyń sany boıynsha, Qazaqstan dúnıejúzindegi 144 memlekettiń arasynda 48-orynǵa shyqqan eken. Qazaqstandaǵy shaǵyn jáne orta bıznes nysandarynyń 44 paıyzyn áıelder basqarady, jalpy osy salanyń teń jarymy názik jandardyń qolynda.
Joǵarydaǵy semınar-trenıngtiń maqsaty – áleýmettik saıasatty jáne jergilikti ózin-ózi basqarý organdarynyń jumysyn jetildirýde genderlik aspektilerdi qoldanýdyń keshendi tásilderin úıretý. Sharaǵa ártúrli deńgeıdegi máslıhat depýtattary, aýyldyq okrýg ákimderi men aýdan ákimderiniń orynbasarlary qatysty. Semınar-trenıngke bilikti táýelsiz sarapshylar men keńesshiler jetekshilik etti.
Semınar-trenıngke Ulttyq komıssııa tóraıymynyń qos orynbasary Elena Tarasenko men Lázzat Súleımen moderatorlyq etti. Sonymen qatar, sharaǵa Astanadaǵy EQYU baǵdarlamalar keńsesi Adamı ólshem bóliminiń meńgerýshisi Izabela Hartman qatysty.
Semınarǵa qatysýshylar elimizde demokratııalyq qoǵam ornap, genderlik teńdik máseleleri saqtalyp otyrǵanyn, Qazaqstan Respýblıkasy BUU-nyń genderlik saıasat salasyndaǵy negizgi qujattaryna qosylǵanyn atap ótti. Elimizde Qazaqstan Respýblıkasy Prezıdenti N.Nazarbaevtyń Jarlyǵymen Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasy bekitilgen. Qyz balany, áıel-anany erekshe syılaıtyn dástúrli úrdisi bar qazaq qoǵamynda genderlik saıasat zamanaýı reńkpen júzege asýda. Bul oń úrdis Batys Qazaqstan oblysynda da aıqyn kórinis tapqan: óńir boıynsha áıelderdiń barlyq deńgeıdegi máslıhattardaǵy úlesi 26%-dy quraıdy, al Aqjaıyq pen Bórli aýdanynda tıisinshe 46% jáne 38% bolǵan. Lázzat Súleımen áıel baqyty, otbasylyq dástúrlerdiń saqtalýy qoǵamda moraldyq qundylyqtyń saqtalýyna yqpal etetinin erekshe aıtty.
Semınar aıasynda Ulttyq komıssııa tóraıymynyń orynbasarlary oblys ákimi A.Kólginovpen nan ónimderin shyǵaratyn «Balzııa» JShS jáne «Otdelstroı» JShS qurylys kompanııasy ujymymen kezdesti. Aıta keterligi, bul kásiporyndardy názik jandar basqaryp, óńir men el ekonomıkasynyń damýyna úlken úles qosyp keledi.
Qazbek QUTTYMURATULY, «Egemen Qazaqstan»
ORAL
Sýretti túsirgen Temirbolat TOQMÁMBETOV