Jańa eskertkish qalanyń qaq ortasyndaǵy Naýryzbaı batyr men Qabanbaı batyr kósheleriniń qıylysyndaǵy «Qaraǵaıly» saıabaǵynda ornatylǵan. Bıiktigi 3 metr bolatyn, qola men granıttiń qospasynan quıylǵan músin, Qanat Begýlıev, Aıdos Búrkitbaev jáne Dýlat Úsenbaev syndy tanymal sáýletshilerdiń týyndysy. Saltanatty rásim zulmat zamannyń ýyn jutqan bozdaqtardyń arýaǵyna qurmet kórsetý maqsatynda, bir mınýt únsizdikpen bastaldy. Zııaly qaýym ókilderi sol bir qıyn-qystaý zamannyń aýyrtpalyǵyn, qazaq halqyna tıgizgen salqynyn tolǵanyspen eske aldy. О́tkenge salaýat, urpaqqa amanat aıtyldy.
«Eskertkish Qazaqstan Respýblıkasynyń Prezıdenti Nursultan Nazarbaevtyń tikeleı tapsyrmasymen boı kóterdi. Biz osy eskertkishti jasaýǵa baıqaý jarııalaǵan bolatynbyz. Oǵan jalpy sany 21 joba túsip, arnaıy mamandardyń talqylaýyna usynyldy. Elordamyzdaǵy memlekettik komıssııanyń uıǵarymymen jobalardyń ishinen balasyn keýdesine qysqan Ana beınesi jeńimpaz dep tanyldy. Ana – barsha tirshiliktiń qaınar kózi, ulttyń uıytqysy, keleshektińń kepili. Ana qasireti – el qasireti. Ashtyqtan buratylǵan – bolashaǵyn – óz sábıin qushaqtaǵan Ananyń qaıǵyly hali sol kezeńde ómir men ólimniń arasyndaǵy qazaq halqynyń basynan keshken talaıly taǵdyryn shynaıy beıneleıtindeı. Ashylǵaly turǵan eskertkish óskeleń urpaqtyń jazyqsyz sheıit bolǵan ata-babalar men analardyń rýhyna bas ıip, Táýelsizdiktiń táttiligin, azattyq pen beıbit ómirdiń baǵa jetpes baılyq ekenin uǵyna biletin kıeli oryn bolsyn dep tileımiz! Bul eskertkishtiń máni – ótkender rýhyna taǵzym, al, bolashaq – úshin taǵylym», deıdi qala ákimi Baýyrjan Baıbek.
Shara sońynda 30-shy jyldardyń basynda oryn alǵan qazaq qasiretiniń sebep-saldaryn zerttegen alǵashqy iri eńbekterdiń biri Valerıı Mıhaılovtyń «Uly juttyń jazbalary» kitabynyń jańa basylymy jıylǵandarǵa tegin úlestirildi. Ata-babalarymyz kórgen qıyndyq pen umytylmas náýbettiń umytylmas belgisindeı bolǵan bul eskertkish, jas urpaqty Táýelsizdiktiń qadirin bilip, táýbesizdikten aýlaq bolýǵa shaqyratyndaı.
Arman OKTIаBR, «Egemen Qazaqstan»
ALMATY