«Qazaqstannyń eńbek sińirgen qaıratkeri» Súıinbaı Qazbaevtyń jetekshiligindegi Prezıdenttik orkestrdiń «Bıg Bend» ansambli Habarovsk jerinde alǵash ret óner kórsetýde.
Reseıdiń Qıyr Shyǵystaǵy astanasynyń turǵyndary úshin qazaqsandyq áskerı mýzykanttar arnaıy baǵdarlama daıyndady. Ansambl repertýarynda álemdik klassıkalyq djaz ánderimen qatar, otandyq kompozıtorlardyń shyǵarmalary da bar. Sonyń ishinde ásirese, Prezıdenttik orkestrdiń quramyndaǵy mýzykanttardyń tól týyndylaryna basa nazar aýdarylǵan.
«Bıg Bend» mýzykalyq ujymy Habarovsk turǵyndaryn álemdik djaz maıtalmandary Bıllı Streıhordttyń «Take the A train», Frenk Sınatranyń «May Way» jáne Lara Fabıannyń «Je t’aime» ánderin solıstter Álibek Izbasarov pen Gúlsim Myrzabekovanyń ózindik erekshe oryndaý mánerlerimen tań qaldyrdy.
Prezıdenttik orkestrdiń bastyǵy, polkovnık Talǵat Berdiǵulovtyń osy festıvalge arnaıy jazǵan «Amýr jaǵasynda» dep atalatyn kompozısııasy zalda otyrǵan kórermenniń ár qaısysyn tebirentkeni anyq. Sondaı-aq, kórermenniń erekshe yqylasyna bólengen shyǵarmalardyń qatarynda Prezıdenttik orkestrdiń solısi Oljas Súleımenovtyń avtorlyǵymen ári jeke dombyramen oryndýyndaǵy «Shyǵys-Batys» týyndysy men Jandos Muhtarovtyń «Uly dala» kúıleri boldy. Dombyranyń únimen shyqqan ulttyq bolmysymyzdy halyqaralyq konkýrstardyń laýreaty, bıshi Ásel Álibekova ulttyq bımen árleı tústi.
«Amýr tolqyndary» atty VI halyqaralyq áskerı-mýzykalyq festıvalge qatysýshy ózge de shyǵarmashylyq ujymdardan qazaqstandyq mýzykanttardyń óneri jan-jaqtylyǵymen, oryndaý mánerlerindegi jańashyldyqpen jáne kez-kelgen mýzykalyq aspapta sheber oınaýlarymen erekshelenip turǵany aqıqat. Buǵan dálel, konsert barysyndaǵy kórermen qaýymnyń ystyq yqylastary men mýzykanttarǵa bildirgen jyly lebizderi.
Adreı Grýdnev, Shyǵys áskerı aımaq shtabynyń áskerı orkestriniń jáne «Boevoe bratstvo» estradalyq-konserttik ansambliniń solısi: «Rýhanı turǵydan úlken lıazzat aldym. Ujym joǵary professıonaldyq deńgeıde jumys isteıdi. Orkestr úni mýzyka tilimen aıtqanda názik, ári naqty, keremet úndestikte shyǵady. Ásirese, vokalıst solıstter Gúlsim Myrzabekova men Álibek Izbasarovtyń ónerlerine rıza boldym. Trýba men gıtarada jeke partııany oryndaǵan mýzykanttardyń da ónerine bas ıemin. Jalpy, Habarovsk turǵyndary djazdy óte jaqsy kóredi. Sondyqtan, qazaqstandyq ujym repertýar tańdaýda esh jańylmady dep aıtýǵa tolyq negiz bar.»
Kımonko Nadejda, Habarovsk aımaǵynyń mádenıet mınıstrliginiń dástúrli mádenıet bóliminiń basshysy, festıval uıymdastyrýshysy: « «Bıg Bend» ujymynyń arqasynda biz Prezıdenttik orkestrdiń sanqyrlylyǵymen, repertýardyń aýqymdylyǵymen tanystyq. Biz úshin sizder búgin umytylýǵa jaqyn qalǵan álemdik djaz klassıkasynyń týyndylaryn qaıta jańǵyrtyp, qazaq halqynyń dástúrli mýzykasyn dombyra arqyly pash ettińizder. Oljas Súleımenov dombyrada sheber oınaýymen tań qaldyrdy. Halyqtyq ystyq yqylas bildirýine qaraǵanda eki el arasyndaǵy mádenı baılanys nyǵaıyp, mádenı dıalogtyń sátti shyqqandyǵyna kóz jetkizýge bolady. Ár mýzykalyq shyǵarmany kórermen erekshe iltıpaptpen jyly qabyldady. Onyń dáleli retinde sońǵy «Nur Astana» áni oryndalyp jatqan sátte olardyń uıaly telefondarynyń jaryqtaryn qosýp, qoldaý bildirgenderinen ańqarýǵa bolady.».
Irına, kórermen: «Maǵan, Habarovsk turǵyny retinde Qazaqstannan kelgen qonaqtardyń erekshe daıyndyqpen kelgendigi úlken áser etti. Ásirese, «Amýr jaǵasyndaǵy» áni óte qatty unady. Sondaı-aq, dombyranyń únine tebirenip, qazaq halqynyń mýzykalyq dástúrimen tanystyq. Biz úshin qala kúni merekesine óte keremet syılyq jasaǵandaryńyzǵa alǵysymdy bildiremin.»