Adamzattyń rýhanı qundylyqtaryn damytý jáne saqtaı bilý – óskeleń urpaqtyń boryshy. Osyǵan oraı oblystyq ishki saıasat basqarmasynyń bastamasymen «Juldyz» balalar qoǵamdyq uıymdarynyń odaǵy» qoǵamdyq birlestiginiń jáne oblystyq bilim basqarmasynyń qoldaýymen atalǵan is-shara óz máresine jetti. Elbasynyń «Bolashaqqa kózqaras: qoǵamdyq sanany jańǵyrtý» tujyrymdamasy sheńberinde ótken sammıtke Bilim jáne ǵylym mınıstrligi, «Nur Otan» partııasynyń ókilderi, zertteýshiler, balalar qoǵamdyq qozǵalysynyń jetekshileri, múgedek balalar ata-analary, pedagogtar, túrli memlekettik jáne qoǵamdyq uıymdar ókilderi qatysty. Uıymdastyrýshylardyń aıtýynsha, basty maqsat – óskeleń urpaqtyń óz múmkindikteri men shyǵarmashylyq jigerin janý, olardyń boıynda óz umtylystaryn ushtaı otyryp, ja-ýapkershilik pen toleranttylyqty, mádenıet pen bitimgershilikti boılaryna sińire bilý. Sammıt ótken úsh kún ishinde Aqmola oblysynyń 30-ǵa tarta balalar uıymdarynyń jetkinshekteri úshin kóptegen sharalar uıymdastyryldy. Is-shara aıasynda ótken kórmege kelýshiler ınnovasııalyq jobalardy tamashalap, jastar uıymdary jetken jetistiktermen tanysty. Sondaı-aq, zamanaýı tehnologııalar jóninde sheberlik synyptary ótkizilip, ǵylymı-praktıkalyq konferensııada jastardyń múmkindikteri jan-jaqty saraptaldy, óskeleń urpaqty patrıottyqqa tárbıeleý barysy sóz etildi. Sammıt sońynda úzdik balalar marapattaldy.
Asqar TURAPBAIULY, «Egemen Qazaqstan»
Aqmola oblysy