Orys sahnasynda óner kórsetip, tanymaldyqqa ıe bolǵan Nurlan Sabýrovqa Reseıge 50 jylǵa kirýge tyıym salyndy. Osy jaǵdaıǵa baılanysty ázilkesh kópshilik aldynda alǵash ret ún qatty. О́nerpaz bul máselemen zańgerler aınalysyp jatqanyn aıtyp, tergeý aıaqtalǵanǵa deıin egjeı-tegjeıli túsinikteme berýden bas tartty, dep jazady Egemen.kz.
Ázilkeshtiń málimdemesi 8 aqpan kúni Instagram jelisindegi paraqshasynda jarııalandy. Onyń sózinshe, barlyq másele zań aıasynda sheshilýi tıis.
«Qalyptasqan jaǵdaıǵa qatysty pikir bildirmeımin. Bul ispen zańgerler aınalysyp jatyr, olar quzyrly organdarmen óz deńgeıinde jumys isteıdi. Ýaqyt bárin óz ornyna qoıady», dep jazdy ol.
Sonymen qatar Nurlan Sabýrov shyǵarmashylyq jolyna toqtalyp, Reseıdiń kásibı qalyptasýyndaǵy ornyna erekshe mán berdi. Aıtýynsha, stendaptaǵy joly shamamen 15 jyl buryn Ekaterınbýrg qalasynda bastalyp, keıin Máskeýde jalǵasqan.
«Osy jyldar ishinde Reseıdiń kóptegen qalasynda boldym, keıbirine birneshe márte bardym. Barlyq jerde meni jyly qabyldady. Shyǵarmashylyq damýǵa múmkindik bergen, óner adamy retinde qalyptasýyma jol ashqan elge alǵysym sheksiz. Reseıde de, odan tys jerlerde de kópultty aýdıtorııam qalyptasty», dedi ol.
Aýyl ázilkeshteri esińizde me?
Málimdemesiniń sońynda Nurlan Sabýrov kórermenderine alǵys aıtyp, jýrnalıster men blogerlerge otbasyna qatysty taqyryptardy qozǵamaýdy ótindi.
«Jýrnalısterge, blogerlerge jáne BAQ ókilderine jeke ótinishim bar: otbasymnyń – jubaıym men balalarymnyń, ata-anam men jaqyndarymnyń jeke ómirine qurmetpen qaraýlaryńyzdy suraımyn. Barshańyzǵa amandyq tileımin», dep túıindedi ol.
Aıta keteıik, Sabýrovtyń Reseı aýmaǵynda jalpy quny 60 mln rýblden asatyn múlki bar ekeni anyqtalǵan. Ol Reseıde tapqan qarajatyn deldaldar arqyly «jylystatty» degen kúdikke ilingen.