Aqmola oblysyndaǵy Rodına aýylynda Qazaqstan Qarýly kúshteri Ulttyq áskerı-patrıottyq ortalyǵy áskerı-tarıhı mýzeıiniń jańa fılıaly ashyldy. Saltanatty shara Uly Otan soǵysy batyrlaryna arnalǵan eskertkishke gúl qoıý rásimimen bastaldy. Eskertkishte soǵys jyldary Jeńiske úles qosqan 130-dan astam aqmolalyqtyń esimi jazylǵan, dep habarlaıdy Egemen.kz.
Is-sharaǵa Qorǵanys mınıstri Dáýren Qosanov, oblys ákimi Marat Ahmetjanov, Halyq qaharmany Baqytjan Ertaev, ardagerler men aýyl turǵyndary qatysty.
Jańa mýzeı jastarǵa patrıottyq tárbıe berip, tarıhı jadyny saqtaýǵa baǵyttalǵan. Munda soǵys kezeńindegi qarý-jaraqtar, áskerı tehnıka, arhıv qujattary, jaýyngerlik týlar jáne Aqmola óńiriniń tarıhyna qatysty túrli jádigerler qoıylǵan. Jalpy mýzeıde 100-den astam eksponat bar, onyń ishinde 1939-1944 jyldary shyǵarylǵan 16 áskerı tehnıka usynylǵan.
Mýzeı «Rodına» agrofırmasynyń basshysy Ivan Saýerdiń bastamasymen jáne Qorǵanys mınıstrliginiń qoldaýymen ashyldy. Jobany júzege asyrýǵa áskerı mýzeı qyzmetkerleri, izdestirý jasaqtary men jergilikti turǵyndar atsalysqan.
Saltanatty jıynda sóılegen Dáýren Qosanov mundaı mýzeıler jastardyń Otan tarıhyn tereń túsinýine jáne aǵa býyn erligin qurmetteýine yqpal etetinin aıtty. Al Ulttyq áskerı-patrıottyq ortalyqtyń bastyǵy Arman Ásenov osyndaı mýzeılerdi bolashaqta elimizdiń basqa aýyldarynda da ashý josparlanyp otyrǵanyn jetkizdi.
Shara shyǵarmashylyq konserttik baǵdarlamamen aıaqtaldy.