Bilim berý júıesiniń negizgi mindetteriniń biri – daryndy balalardy erte anyqtaý jáne olardyń áleýetin jan-jaqty damytý. Osy baǵyttaǵy mańyzdy bastamalardyń biri – «Sırıýs-Qazaqstan» jobasy. Joba talantty oqýshylardy qoldaýdyń tıimdi ekojúıesin qalyptastyrýǵa, sondaı-aq ǵylym men tehnologııa salasyna qyzyǵýshylyǵy joǵary jastardyń qabiletin damytýǵa baǵyttalǵan, dep habarlaıdy Egemen.kz.
«Sırıýs-Qazaqstan» jobasy Memleket basshysy Qasym-Jomart Toqaevtyń tapsyrmalaryn iske asyrý aıasynda júzege asyrylyp otyr. Bastamanyń negizgi maqsaty – bilim sapasyn arttyrý, qazaqstandyq oqýshylardyń halyqaralyq deńgeıdegi básekege qabilettiligin kúsheıtý jáne adamı kapıtaldy damytý.
Oqý-aǵartý birinshi vıse-mınıstri Maıra Meldebekova joba aıasynda bilim berý mazmuny zamanaýı talaptarǵa sáıkes uıymdastyrylatynyn aıtady.
«Atap aıtqanda, matematıka, jaratylystaný ǵylymdary, ınjenerııa, robototehnıka, jasandy ıntellekt jáne jobalyq-zertteý qyzmeti baǵyttaryna basymdyq beriledi. Bul oqýshylardyń tek teorııalyq bilimin jetildirip qana qoımaı, olardyń zertteý daǵdylary men praktıkalyq quzyretterin damytýǵa múmkindik beredi», dedi vıse-mınıstr.
Ol sonymen qatar joba ulttyq qundylyqtardy dáripteýge erekshe nazar aýdaratynyn atap ótti.
«Oqý baǵdarlamalaryna «Dombyra», «Ulttyq óner», «Ulttyq sport» kýrstary jáne «Adal azamat» tárbıe baǵdarlamasy engiziledi. Bul óz kezeginde jas urpaqtyń ulttyq mádenıetke qurmetin arttyryp, zamanaýı bilim men ulttyq tárbıeni úılestirýge jaǵdaı jasaıdy», dedi Maıra Turǵanbaıqyzy.
Jobanyń mańyzdy baǵyttarynyń biri – pedagog kadrlardyń kásibı áleýetin kúsheıtý.
«Pedagogıkalyq quramnyń 80 paıyzy qazaqstandyq mamandardy quraıdy. Sonymen qatar halyqaralyq tájirıbeni engizý jáne «Talant jáne tabys» qorynyń biliktilikti arttyrý baǵdarlamalaryn paıdalaný kózdelip otyr. Bul otandyq bilim berý júıesine ozyq tájirıbelerdi tıimdi engizýge múmkindik beredi», dedi vıse-mınıstr.
«Sırıýs – Qazaqstan» jobasy «Sırıýs» federaldyq aýmaǵymen jáne «Talant jáne tabys» qorymen yntymaqtastyq negizinde júzege asyrylady. Atalǵan áriptestik daryndy balalarmen jumys isteýdiń úzdik tájirıbelerin engizýge, bilim berý ádistemelerin jetildirýge jáne halyqaralyq yntymaqtastyqty damytýǵa baǵyttalǵan.
Ǵalymjan Almatov: «Sırıýs» mektepteri zamanaýı bilimdi ulttyq qundylyqtarmen ushtastyrady
Vıse-mınıstrdiń aıtýynsha joba qazaqstandyq oqýshylardyń olımpıadalarǵa, ǵylymı jobalar baıqaýlaryna jáne zertteý qyzmetine qatysý múmkindikterin arttyrady. Sonymen qatar ǵylymı-tehnologııalyq baǵyttar boıynsha erte kásibı baǵdar berýge jaǵdaı jasaıdy.
«Jobany Almaty jáne Astana qalalarynda iske asyrý josparlanǵan. Bul óńirlerdegi talantty balalar úshin zamanaýı bilim berý múmkindikterin qalyptastyryp qana qoımaı, bolashaqta elimizdiń barlyq aýmaǵyna taralatyn tıimdi bilim berý modeliniń negizin qalaıdy», dedi ol.
Aıta keteıik, búgin Qasym-Jomart Toqaev pen Vladımır Pýtın Astanadaǵy «Sırıýs» mektebiniń kapsýlasyn salý rásimine qatysty.