Qazaqstan Prezıdenti Qasym-Jomart Toqaev Astanada EAEO memleketteri basshylarynyń qatysýymen ótken Eýrazııalyq ekonomıkalyq forýmnyń plenarlyq otyrysynda sóz sóıledi, dep habarlaıdy Egemen.kz
Memleket basshysy álemdik ekonomıka dástúrli syn-qaterlermen qatar sıfrlyq tehnologııalardyń qarqyndy damýymen baılanysty eleýli ózgerister kezeńin bastan ótkerip jatqanyn atap ótti. Onyń aıtýynsha, jasandy ıntellekt jahandyq ekonomıkalyq damýdyń negizgi faktorlarynyń birine aınaldy.
«Biz jasandy ıntellekt tehnologııalarynyń qarqyndy damýy jahandyq ekonomıkanyń irgeli faktoryna aınalǵanyn kórip otyrmyz», – dedi Toqaev.
Prezıdent jasandy ıntellektini engizý eńbek naryǵynda aýqymdy ózgeristerge alyp keletinin jáne búkil álem boıynsha mıllıondaǵan adamdy qaıta daıarlaýdy qajet etetinin aıtty. Osy jaǵdaıda Qazaqstan EAEO aıasyndaǵy ıntegrasııalyq úderisterdi damytý úshin jasandy ıntellekt tehnologııalaryn belsendirek paıdalanýdy usynady.
«Máselen, Halyqaralyq valıýta qorynyń baǵalaýynsha, aldaǵy jyldary jasandy ıntellekt tehnologııalaryn engizýge baılanysty álemdik eńbek naryǵynda jumys oryndarynyń shamamen 40%-y qysqarady. Árıne, bul álemniń túkpir-túkpirindegi júzdegen mıllıon adamdy qaıta oqytýdy talap etedi», – dep atap ótti Memleket basshysy.
Toqaev sondaı-aq 2026 jyldyń Qazaqstanda jasandy ıntellekt jáne sıfrlyq damý jyly bolyp jarııalanǵanyn eske saldy. Sonymen qatar, jeke derekterdi qorǵaý men azamattardyń sıfrlyq ortadaǵy qaýipsizdigine erekshe nazar aýdarylyp otyr.