Qazaqstandyq kásipkerler Aıdyn men Anar Rahymbaevtar halyqaralyq The Giving Pledge («Qaıyrymdylyq anty») bastamasyna qosylyp, óz baılyǵynyń jartysynan kóbin qaıyrymdylyqqa baǵyttaıtynyn jarııalady. Olar bul jobaǵa qosylǵan Ortalyq Azııadaǵy alǵashqy ókil atandy, dep habarlaıdy Egemen.kz.
Forbes-tiń baǵalaýynsha Aıdyn Rahymbaevtyń 2026 jyldaǵy baılyǵy shamamen 1,1 mıllıard dollardy quraıdy. Erli-zaıyptylar bul sheshimdi óz qundylyqtarynyń jalǵasy dep atap, ómir boıy aktıvteriniń basym bóligin áleýmettik jobalarǵa jumsaýǵa ýáde berdi. Qalǵan bóligi balalarǵa mura retinde qaldyrylmaq.
Olardyń aıtýynsha, negizgi basymdyq Qazaqstandaǵy áleýmettik jobalarǵa beriledi. Qarajat mektepter salýǵa, balalardyń bilim alýyna, ulttyq mádenıetti saqtaýǵa jáne el tarıhyn damytýǵa baǵyttalady.
Sondaı-aq kásipker otbasy kóp jyldan beri «Ana úıi» jobasy arqyly jetim balalar sanyn azaıtýǵa, al IQanat bastamasy arqyly aýyl balalaryna sapaly bilim alýǵa kómektesip keledi.
The Giving Pledge – Bıll Geıts, Melında French Geıts jáne Ýorren Baffet negizin qalaǵan halyqaralyq qaıyrymdylyq qozǵalysy. Onyń maqsaty – aýqatty adamdardy baılyǵynyń negizgi bóligin qoǵam ıgiligine jumsaýǵa yntalandyrý.
Aıdyn men Anar Rahymbaevtardyń bul bastamaǵa qosylýy Ortalyq Azııa úshin mańyzdy qadam retinde baǵalanyp otyr.
Eske salaıyq, buǵan deıin alaıaqtyq jolmen jınalǵan qaıyrymdylyq qarajatyn jymqyrdy degen aıyppen 10 jylǵa sottalǵan Perızat Qaırattyń kolonııadaǵy qazirgi jumysy týraly jazǵan bolatynbyz.
Polshadaǵy qaıyrymdylyq konsertinde Dımash Qudaıbergenniń áni shyrqalǵany da habarlandy.