Sharanyń uıymdastyrýshylary: Qazaqstan Respýblıkasynyń Tuńǵysh Prezıdenti – Elbasy kitaphanasynyń Analıtıkalyq ortalyǵy, QR Tuńǵysh Prezıdenti – Elbasy qory janyndaǵy Álemdik ekonomıka jáne saıasat ınstıtýty men Qytaıdy zertteý ortalyǵy. Sı Szınpınniń kitabyn QHR azshylyq ulttar baspa úıi qazaq tiline tárjimalady.
- Atalmysh kitaptyń qazaq tiline aýdarylýy Memleket basshysynyń úzdik zamanaýı ádebıetterdi qazaq tiline aýdarý boıynsha qoıǵan tapsyrmalarǵa jaýap berip, memlekettik tildegi ádebıet qoryn jetildiretinine nazar aýdarǵym keledi. Sondaı-aq, onyń oqyrman aýdıtorııasy aıtarlyqtaı ulǵaıady, - dedi QR Tuńǵysh Prezıdenti – Elbasy qory janyndaǵy Álemdik ekonomıka jáne saıasat ınstıtýtynyń dırektory Erjan Saltybaev.
2014 jyly jaryq kórgen «Sı Szınpın el basqarý jóninde» kitaby álemde úlken suranysqa ıe, bul kitap jyl saıyn 25-ten astam tilde mıllıondaǵan danamen basylady.
Erjan Saltybaevtyń sózinshe, Qazaqstanda júrgizilip jatqan Úshinshi jańǵyrtý aıasynda bul kitap úlken suranysqa ıe bolmaq.
- Biz úshin shyǵystaǵy tabysty ári nátıjeli kórshimizdiń jetistikteri men reformalyq tájirıbeleri mańyzdy. Sı Szınpınniń negizgi maqalalary, suhbattary men baıandamalary jınaǵynda qytaılyq trıýmf fenomeni, áıgili jetekshiniń saıası fılosofııasy, Qytaı Halyq Respýblıkasynyń ishki jáne syrtqy saıasaty damýynyń negizgi strategııalyq baǵyttary anyqtalyp jazylǵan, - dedi ÁESI dırektory.
E. Saltybaevtyń pikirinshe, kitap qazaqstandyq oqyrmandar tarapynan laıyqty baǵasyn alady: «Sarapshylar men zertteýshiler úshin bul qujattyq derek pen bastapqy derekterdiń qaınar kózi bolyp tabylady. Isker orta men kásipkerler qaýymdastyǵy úshin bul kitap Qytaı ekonomıkasynyń tetikterin, onyń jumys isteýin bilýge, ınvestısııa úshin jańa ıdeıalar men jańa bıznes-josparlardy týdyrýǵa kómektesedi. Kitaptyń Qazaqstanda jaryq kórýi memlekettik qurylym, jańǵyrtý men tarıhtaǵy tulǵanyń róli sekildi salalarda jańa ǵylymı zertteýler júrgizýge taǵy bir serpin beredi dep oılaımyn».
Kitaptyń tanystyrý rásimine QR Prezıdentiniń Keńsesi jetekshisiniń orynbasary Baqytjan Temirbolat, QHR Qazaqstandaǵy Tótenshe jáne ókiletti elshisi Chjan Hanhoı jáne QHR Memlekettik keńesi Baspasóz-keńsesiniń jahandyq kommýnıkasııa Bıýrosy dırektorynyń orynbasary Týo Jen, sondaı-aq, L.N. Gýmılev atyndaǵy EUÝ rektory Erlan Sydyqov, QR Tuńǵysh Prezıdenti – Elbasynyń kitaphanasy dırektorynyń orynbasary Tımýr Shaımergenov jáne basqa da Qazaqstannyń qoǵam qaıratkerleri qatysty.
Kitaptyń tusaýkeser rásimi QHR Tóraǵasy Sı Szınpınniń 2017 jyldyń 8 maýsymynda Astanaǵa resmı saparmen kelýine jáne ShYU múshe-memleketter basshylarynyń Sammıtine qatysýyna oraılastyrylǵan.
Tusaýkeser aıasynda qonaqtar qytaı tiline aýdarylǵan belgili qazaq jazýshylarynyń kitaptarymen tanys boldy. Shara qatysýshylaryna kitaptyń alǵashqy danalary tanystyryldy.