Jyldyq ınflıasııa nysanaly dálizde ornyqty, halyqtyń ınflıasııalyq kútýleri qalypty bolyp qalýda, ekonomıka belsendiliginiń jandanǵany baıqalady. Qalyptasyp jatqan aqsha-kredıt talaptaryn eseptegende jáne kúızelister bolmaǵan jaǵdaıda ınflıasııa 2017 jáne 2018 jyldary belgilengen nysanaly dáliz sheginde bolady.
Inflıasııalyq qysymnyń ekonomıkanyń jáne jıyntyq suranystyń óte jyldam qalypqa kelýi jaǵdaıyndaǵy táýekelderi aıtarlyqtaı dep baǵalanbaıdy. Ekonomıkanyń damýynyń bazalyq ssenarııiniń iske asyrylýy (munaı baǵasy – bir barrel úshin 50 AQSh doll.), sondaı-aq jaǵymsyz kúızelister bolmaǵan jáne ınflıasııanyń naqty serpini boljanatyn ólshemderge sáıkes kelgen jaǵdaıda aldaǵy 12 aıda bazalyq mólsherlemeniń tómendeý úrdisi jalǵasýy múmkin.
Ulttyq Bank naqty paıyzdyq bazalyq mólsherlemeni ekonomıkanyń ósýiniń uzaq merzimdi áleýetti qarqynymen salystyrmaly deńgeıde ustap turatyn bolady.
Sonymen qatar Qazaqstan ekonomıkasy úshin aıtarlyqtaı qolaısyz ssenarııdi baǵalaý bazalyq mólsherlemege qatysty aıtarlyqtaı konservatıvti tásildi boljaıdy. Bazalyq mólsherleme boıynsha sheshim mynadaı faktorlar eskerile otyryp qabyldandy. Jyldyq ınflıasııa 2017 jylǵy mamyrda nysanaly dáliz sheńberinde 7,5% mólsherinde qalyptasty jáne Ulttyq Banktiń baǵalaryna tolyǵymen sáıkes keledi.
Sońǵy birneshe aı boıy baıqalǵan azyq-túliktiń belgili bir túrlerine, atap aıtqanda kókónis pen etke usynystyń kúızelisi azyq-túlik ınflıasııasynda aıtarlyqtaı ózgeristerdi týyndatpaı, azyq-túliktiń álemdik baǵasy ındeksiniń úsh aı qatarynan tómendeýimen ishinara ótelýde. Azyq- túlik taýarlarynyń ishki usynysynyń kútiletin maýsymdyq ósýi, baǵalaý boıynsha, 2017 jylǵy 3- toqsannyń sońyna deıin jyldyq ınflıasııanyń odan ári baıaýlaýyna yqpal etetin bolady.
Sonymen qatar, 2016 jylǵy 4-toqsandaǵy bazanyń tómen bolýy saldarynan aǵymdaǵy jyldyń sońyna qaraı jyldyq ınflıasııa qysqa ýaqytqa azdap kóterilýi múmkin.
Ulttyq Bank usynystar jaǵyndaǵy shyǵasylardyń ósýimen baılanysty jáne suranys jaǵynda qoldanylatyn kredıtteý talaptaryna tikeleı baılanysty emes ınflıasııanyń ádeıi shektelgen kóterilýine jaýap retinde aqsha-kredıt talaptaryn qatańdatý qajet dep sanamaıdy. Halyqtyń ınflıasııanyń bolashaqtaǵy deńgeıine qatysty kútýleri is júzinde ózgerissiz qalýda, jekelegen aýytqýlar aıtarlyqtaı emes jáne jalpy úrdiske áser etpeıdi.
Kútiletin ınflıasııanyń bir jyl alǵa arnalǵan sandyq baǵalaýy qalyptasqan ınflıasııanyń (6,1%) máninen tómen deńgeıde belgilendi, bul onyń 2018 jylǵa belgilengen nysanaly dálizge birtindep jaqyndap jatqanyn bildiredi.
Halyqtyń kútýleri men valıýta naryǵynyń kásibı qatysýshylarynyń teńge baǵamynyń aǵymdaǵy deńgeıde saqtalýy boıynsha turaqty kútýleri aıasynda salymshylardyń valıýtalyq basymdyǵynyń ózgerýi jalǵasýda. Mamyr aıynyń aldyn ala derekteri boıynsha depozıtterdiń qurylymynda teńgedegi depozıtterdiń úlesiniń valıýtalyq depozıtterden 2017 jylǵy naýryzda qol jetkizilgen asyp ketýi saqtalyp otyr.
Ekonomıkadaǵy iskerlik belsendilik ınflıasııalyq qysym kórsetpeı, aıtarlyqtaı jandanýda. Ekonomıkanyń bazalyq salalary boıynsha qysqa merzimdi ekonomıkalyq ındıkatory ósý aımaǵynda tur. 2017 jylǵy sáýirdiń derekteri boıynsha ol sońǵy 3 jyldaǵy eń joǵary mánge – 107,1%-ǵa jetti. Halyq arasynda ekonomıkalyq perspektıvalarǵa qatysty júrgizilgen pikirterimniń derekteri baqylanyp otyrǵan úrdisti jáne ekonomıkalyq agentterde pozıtıvtik kútýlerdiń bolýyn rastaıdy. Tutynýshylyq suranystyń birtindep ósýi baıqalyp otyr. Qańtar-naýryzda halyqtyń naqty kiristeri 2,4%-ǵa ósti, bul negizinen bıýdjettiń áleýmettik tólemderge arnalǵan shyǵystarynyń ulǵaıýymen túsindiriledi.
Syrtqy talaptar Qazaqstan ekonomıkasynyń ósýin qoldady. Munaıdyń álemdik baǵasy aıdyń kóp bóliginde shamaly óskenin kórsete otyryp, mamyr aıynda bir barrel úshin 48-54 dollar aralyǵynda boldy.
Aqsha-kredıt talaptary bazalyq mólsherleme tómendegennen keıin qalypty-qatań deńgeıden beıtarap deńgeıge deıin jumsarýda. Qazaqstannyń óndirýshilerine baǵalaı qoldaý kórsetetin teńge baǵamynyń naqty mániniń tolyq baǵalanbaýyna (álsizdigine) qosa naqty paıyzdyq mólsherlemeniń (ıaǵnı ınflıasııanyń 2017 jylǵy 6-8% jáne 2018 jylǵy 5-7% targetteletin deńgeıine túzetilgen nomınaldyq mólsherlemeniń) deńgeıi tómendeýde, bul bankterdiń kredıttik resýrstarǵa degen suranysyna qoldaýdy qamtamasyz etedi. Soǵan qaramastan, artyq ótimdilik bolsa da, bank kapıtalynyń shektelýi qorlandyrý qunyna qaraǵanda, kredıtke usynysty tejeıtin asa mańyzdy faktor bolyp tabylady.
Bazalyq mólsherleme boıynsha kezekti sheshim 2017 jylǵy 17 shildede Astana ýaqyty boıynsha saǵat 17.00-de jarııalanatyn bolady.