Jańa ǵımarattyń ashylý saltanatyna Kóliktegi ishki ister departamentiniń basshylary men jeke quramy, sondaı-aq ishki ister organdarynyń ardagerleri qatysty. Ǵımarat aldyndaǵy saptyq alańda Ulttyq ulan orkestriniń súıemeldeýimen saltanatty sherý ótkizildi. Budan soń jańa ǵımarattyń nyshandyq kilti JIIB-niń basshylyǵyna tapsyryldy. – Memleket basshysy men Úkimettiń qoldaýy nátıjesinde ishki ister organdarynyń materıaldyq-tehnıkalyq jaǵdaıy jyldan jylǵa jaqsaryp keledi. Búgin, mine, kólik polısııasy Astana áýejaıynda JIIB-niń barlyq qajettilikterge jaýap bere alatyn jańa qyzmettik baspanasyna qol jetkizip otyr,– dep málimdedi Ishki ister mınıstri saltanatty sharada. Q.Qasymov óz sózinde halyqaralyq EKSPO-2017 kórmesin ótkizý qarsańynda elordanyń áýejaıy men vokzaldaryna sheteldik qonaqtar jáne elimizdiń turǵyndary kóptep keletinin atap ótti. Sondyqtan Astanaǵa joly túsken qonaqtar ózderin jaıly ári qaýipsiz sezinýleri úshin kólik polısııasyna júkteler jaýapkershilik júgi aýyr. Atap óter jaıt, Astana qalasynyń áýejaıy táýligine 10 myńnan astam jolaýshy qabyldaıdy, al mereke kúnderi bul kórsetkish eki esege kóbeıedi. Áýejaıǵa kúnine 160 jolaýshy ushaǵy ushyp-qonady. Soǵan baılanysty elimizdiń kólik polısııasy quqyq buzýshylyqtyń aldyn alýǵa jáne azamattardyń qaýipsizdigin qamtamasyz etýge aıryqsha kóńil bóledi. Mınıstr jańa ǵımaratty aralap, ishki jabdyqtarymen, sondaı-aq, kólik polısııasynyń qyzmet atqaratyn oryndarymen tanysyp shyqty. Sodan soń Kóliktegi ishki ister departamenti men bólimsheleriniń jeke quramy aldaǵy ýaqytta da azamattardyń quqyǵy men múddelerin laıyqty qorǵap, olardyń kóliktegi qaýipsizdigin joǵary deńgeıde qamtamasyz etetinine senim bildirdi. Jelilik ishki ister bóliminiń jańa ǵımaraty EKSPO-2017 kórmesine daıyndyq jáne ony ótkizý kezindegi qaýipsizdik pen quqyqtyq tártipti qamtamasyz etý is-sharalary jospary aıasynda salyndy.
Nurlybek DOSYBAI, «Egemen Qazaqstan»