Bul – mınıstrlik konferensııasy jáne turaqty damý energetıkasy jónindegi segizinshi halyqaralyq forým. Sharanyń ashylý rásimine Premer-Mınıstr Baqytjan Saǵyntaev qatysyp, Qazaqstan álemdik energetıkanyń uzaq merzimge negizdelýin ári onyń turaqty damýyn qamtamasyz etý strategııasyn ustanatyndyǵyn jetkizdi. Sonymen qatar, on jyldaı buryn Prezıdent Nursultan Nazarbaev BUU Bas Assambleıasynyń sessııasynda jahandyq energııalyq-ekologııalyq strategııany ázirleýdi usynǵanyn, 2011 jyly BUU Bas Assambleıasynda óńirde jasyl ekonomıkalyq ósimdi kúsheıtýge arnalǵan «Jasyl kópir» seriktestik baǵdarlamasyna bastamashy bolǵanyn eske saldy. 2012 jyly osy baǵdarlama BUU-nyń Dúnıejúzilik sammıtinde maquldanǵan. «2013 jyly Qazaqstan «Jasyl» ekonomıkaǵa kóshý jónindegi tujyrymdamany qabyldady. Ol óz kezeginde eldiń energetıkalyq sektorynda júıeli túrlenýge sáıkes jaǵdaı týǵyzdy. 2016 jyly biz klımattyq baǵyttaǵy Parıj kelisimin ratıfıkasııalaý arqyly parnıktik gazdardy azaıtý boıynsha mindettemeler aldyq. Qazirgi kezde Úkimet Qazaqstan ekonomıkasynyń Úshinshi jańǵyrýy baǵytynda jumys isteýde. Osy oraıda «jasyl» ekonomıka aıasyndaǵy reformamyz 2050 jylǵa qaraı ishki jalpy ónimdi 3 paıyzǵa arttyrýǵa múmkindik beredi dep josparlaýdamyz», dedi Úkimet basshysy. Jıynda Energetıka mınıstri Qanat Bozymbaev Qazaqstan ekonomıkasy tabıǵı resýrstardy, ásirese kómirsýtegi shıkizatyn óndirýge negizdelgenin jetkizdi. «Eldiń ishki jalpy óniminiń shamamen 15 paıyzy kómirsýtegin satýdan túsken kiristen qalyptasady. Qazaqstannyń munaı, gaz, kómir, ýrandy qosa alǵandaǵy bastapqy energııa resýrstarynyń jıyntyq qory munaı ekvıvalentimen 32 mlrd tonnaǵa baǵalanady. Bul álemdik energııa resýrstarynyń shamamen 4 paıyzyn quraıdy», degen mınıstr Qazaqstan energııa resýrstaryn netto-eksporttaýshy sanalatyndyǵyn, elde óndiriletin resýrstardyń 40 paıyzǵa jýyǵyn ǵana tutynatyndyǵyn aıtty. Vedomstvo basshysynyń sózinshe, eldiń ishki jalpy ónimine 1 mln dollar qosý úshin munaıdyń 400 tonnadan astam ekvıvalentin óndirý qajet. Biz 2020 jylǵa qaraı IJО́-degi energııa qamtymdylyqty 25 paıyzǵa, 2050 jylǵa qaraı 50 paıyzǵa tómendetýdi maqsat etýdemiz. Ekonomıkany jańǵyrtý jolymen, onyń ishinde eldiń energııalyq teńgerimin balama jáne jańaratyn kózderimen qalyptastyra otyryp, onyń úlesin 2020 jylǵa qaraı – 30, 2050 jylǵa qaraı 50 paıyzǵa jetkizbekpiz. Konferensııa jumysyna Reseı, Saýd Arabııasy, Túrkııa syndy memleketterdiń energetıka salasyna jaýapty basshylary belsene atsalysýda. Budan bólek, BUU-nyń ókilderi de arnaıy málimdeme jasap, qatysýshy elderdi qorshaǵan orta máselelerine aıryqsha nazar aýdarýǵa shaqyrdy. Shara aıasynda birqatar mańyzdy qujattarǵa qol qoıyldy.
Ashat RAIQUL, «Egemen Qazaqstan»