«Qurmet» ordeniniń ıegeri, ekonomıka ǵylymdarynyń doktory, professor, Ulttyq Ǵylym akademııasynyń akademıgi Ǵalymjan Nuryshev bes jyl buryn ómirden ótip edi. Týǵan jeri tekti azamatyn umytqan joq. Atyraý qalasynda 1995-2004 jyldary turǵan úıine eskertkish taqta ornatty.
Bar ǵumyryn elimizdegi bilim men ǵylymnyń damýyna arnaǵan Ǵalymjan Jumabaıulyn eske alý sharasyna oblys ákimi Nurlan Noǵaev qatysyp, abzal azamattyń ómir joly, adamgershilik qasıeti, kásibı biliktiligi árkez úlgi bolyp qalatynyn aıtty.
H. Dosmuhamedov atyndaǵy Atyraý memlekettik ýnıversıtetiniń rektory Abzal Taltenov, oblystyq qoǵamdyq keńestiń múshesi Ánes Bısenuly, aqyn-jazýshy Qadyr Júsip estelikterimen bólisti.
Eskertkish taqtanyń ashylý saltanatynan soń H. Dosmuhamedov atyndaǵy Atyraý memlekettik ýnıversıtetinde professor Ǵ. Nuryshevty eske alýǵa arnalǵan «Jaqsynyń jaryǵy óshpeıdi» atty dóńgelek ústel ótti.
Baqytgúl BABASh, «Egemen Qazaqstan»