Saltanatty rásimdi Qorǵanys komıteti Bas shtaby bastyǵynyń orynbasary – Tárbıe jáne ıdeologııalyq jumystar departamentiniń bastyǵy general-maıor Muhamedjan Talasov ashty. «Jańa qazaqstandyq patrıotızmge tárbıeleý týraly Memleket basshysynyń tapsyrmasyn oryndaý úshin, sondaı-aq, Qazaqstan Respýblıkasy Qorǵanys mınıstriniń tapsyrmasy boıynsha biz atalǵan áskerı-sporttyq jıyndy alǵash ret uıymdastyrdyq. Is-sharanyń basty maqsaty jastarǵa patrıottyq tárbıe berý bolyp tabylady. Jıynǵa qatystyrýǵa biz sport pen oqýda nátıjeler kórsetip júrgen balalardy ǵana emes, sonymen birge, jaýyngerlik daıarlyq pánderi boıynsha keremet kórsetkishter pash etip júrgen ata-analardy da iriktedik», − dep Qorǵanys komtıteti Bas shtaby bastyǵynyń orynbasary – Tárbıe jáne ıdeologııalyq jumystar departamentiniń bastyǵy general-maıor Muhamedjan Talasov atap ótti. Ekologııalyq taza jáne shahardyń kórikti jerinde ornalasqan «Jas sarbaz» lageri aǵymdaǵy jylǵy maýsymnyń 10-y men tamyzdyń 10-y aralyǵynda balalardy qýana-qýana qarsy alady. Olardy mádenı-tynyǵý jáne sporttyq is-sharalardyń keń aýqymy, onyń ishinde, Almatynyń kórikti jerlerine saıahat jasaý, konserttik baǵdarlamalar, ártúrli oıyn-saýyq baıqaýlaryn ótkizý, AOSK-nyń tanymal olımpıadalyq sportshylarymen júzdesý kútip tur. Sondaı-aq, Panfılov kentindegi AOSK-nyń oqý-jattyqtyrý ortalyǵyna bir kúndik shyǵý josparlanǵan. Onda QR QM Armııa ortalyq sport klýbynyń bilikti nusqaýshylary kedergiler jolaǵynan ótý, ártúrli sporttyq snarıadtardaǵy jattyǵýlardy oryndaý boıynsha sabaqtar ótkizedi. Sonymen qatar, arqandy saıabaqta, skalodrom men peıntboldaǵy sabaqtar boıynsha sheberlik-synybyn ótkizedi.
Almatyda «Jas sarbaz» áskerı-patrıottyq jıynynyń saltanatty ashylý rásimi ótti. Alǵash ret Qazaqstan Respýblıkasy Qorǵanys mınıstrligi basshylyǵynyń bastamasymen shalǵaı garnızondarda turatyn áskerı qyzmetshilerdiń balalary úshin Sport komıteti – Qorǵanys mınıstrligi Armııashylardyń ortalyq sport klýbynyń oqý-jattyqtyrý ortalyǵynda ornalasqan lager óz jumysyn bastady.