Elbasy baǵdarlamasyn iske asyrý aıasynda Almaty qalasynyń ákimdigi erekshe jobany júzege asyrýdy qolǵa aldy. Qala ákimdigi «Alpha Academy» bilim akademııasymen birlese otyryp birinshi ret «Tilder Saıabaǵy – Park Iаzykov – Language Park» jobasynyń tusaýyn kesti. Mamandar til úırenýdiń, óz ishindegi talap, yqylas-tilekti oıatýdyń, oǵan qurmetpen qaraýdyń, nátıjesinde tolyqqandy meńgerip shyǵýdyń túrli joldaryn usynyp keledi, biraq nátıjesi birde – tıimdi, birde – tıimsiz.
«Tilder Saıabaǵy – Park Iаzykov – Language Park» – nátıjege negizdelgen sheteldik joba. Osy baǵdarlama aıasynda qalanyń Medeý aýdanynyń ákimdigi aýdan turǵyndaryn qazaq, orys, aǵylshyn tilderine tegin oqytyp, úıretedi. Til úırený kýrstary ashyq aspan astynda, taza aýada, ıaǵnı Almatynyń Ortalyq demalys saıabaǵynyń jasyl alańqaılarynda uıymdastyrylady. Maýsymnan bastalyp, tamyz aıynyń sońyna deıin jalǵasatyn úsh aılyq til kýrstarynda aýdannyń 600 turǵyny tegin oqytylady. Bul áleýmettik joba eshqandaı qarajatty qajet etpeıdi. Muǵalimder – eriktiler. Til úırenýshi de, tildi úıretýshi de aqysyz júıe boıynsha túrli tásil arqyly ortaq múddege jumys isteıdi. Bul maqsatty iske asyrý úshin arnaıy saıt ashylyp, til úırengisi keletin yntalylar aldyn ala sol jerge tirkeledi. О́tken juma kúni tusaýy kesilgen jobaǵa qyzyǵyp, jazylǵan jastardyń, oqýshylardyń, zeınetkerlerdiń sany qazirdiń ózinde 600-den asyp ketken. 6 jastan bastap 60 jasqa deıin nıet bildirgender qatarynyń kóptigin eskergen aýdan ákimi Erjan Jylqybaev kelesi aıdan bastap kýrsqa qatysatyndardyń sany 1000-ǵa deıin qamtylatynyn aıtyp, kópshilikti qýantyp tastady. Respýblıka boıynsha alǵash ret júzege asyrylǵaly otyrǵan jobanyń nátıjesi sátti bolsa, sheteldik jobany aldaǵy ýaqytta qalanyń basqa aýdandarynda, tipti elimizdiń basqa aımaqtarynda da júıeli uıymdastyrý kózdelip otyr.
Aıgúl Ahanbaıqyzy, «Egemen Qazaqstan»
Almaty