Qazaqstan Qarýly Kúshteriniń jáne UQShU-ǵa qatysýshy memleketterdiń ofıserler korpýsy qataryn 100-den asa magıstrant tolyqtyrdy. Qazirgi ýaqytta Ulttyq qorǵanys ýnıversıteti UQShU-ǵa múshe memleketterdiń qarýly kúshteri úshin áskerı kadrlardy birlesip daıarlaý jóninde oqý oryndarynyń tizbesine engizildi jáne búginde túlekter arasynda Armenııa, Qyrǵyzstan jáne Tájikstan respýblıkalarynyń ókilderi bar.
«Áskerı kadrlardy daıarlaý erekshe memlekettik mańyzdy is bolyp tabylady. Sondyqtan sizder, ıaǵnı, Ulttyq qorǵanys ýnıversıtetiniń túlekteri zaman talabyna saı jáne kóshbasshylyq qasıetterge ıe bolyp, áskerı qyzmettiń barlyq salalarynda baǵyt-baǵdarlaryńyz bar úzdik maman atanýǵa tıissizder. Ýnıversıtet qabyrǵasynda ártúrli aýqymdaǵy operasııalardy sátti josparlaýǵa, birlestikterdi, quramalar men áskerı bólimderdi myqty basqarýǵa múmkindik beretin tereń bilim aldyńyzdar», – dedi general-polkovnık S.Jasuzaqov.
Qazirgi ýaqytta Ulttyq qorǵanys ýnıversıteti Qazaqstannyń áskerı bilim berý isinde kóshbasshy sanalady. Onda tyńdaýshylar men oqytýshylardyń utqyrlyǵyna, joǵary jáne joǵary oqý ornynan keıingi barlyq deńgeıler men dárejeler sabaqtastyǵyn qamtamasyz etýge mańyz beriledi. Sondaı-aq, bilim baǵdarlamalaryn júzege asyrýda ozyq oqytý ádisteri qoldanylady.
«Egemen-aqparat»