Top bastaýshy «Astana» bul týrda «Aqtóbemen» kúsh synasyp, tegeýrindi qarsylyqqa tap boldy. Degenmen, temirjolshylar jigerli oıynnyń arqasynda aldymen esepti teńestirip, odan keıin qatarynan eki gol soǵyp, mańyzdy jeńiske ıe boldy. Al «Qaırat» bolsa, bıylǵy birinshiliktiń júldesinen úmitti «Tobyldy» óz alańynda tize búktirdi. Qyzylordada jergilikti «Qaısarmen» oınaǵan «Ordabasy» da qanjyǵaǵa úsh upaı baılap, Shymqalaǵa oljaly oraldy.
Qalaı bolǵan kúnde de, chempıonattaǵy altynshy oryn úshin arpalys kúsheıe tústi. Buǵan sebep bolǵan jaıttyń biri – «Ertis» kútpegen jerden «Tarazǵa» ese jiberdi. Sóıtip, jambyldyq fýtbolshylar týrnır kestesinde «Atyraý» men «Aqjaıyqty» basyp ozyp, altynshy oryndaǵy «Qaısarǵa» bir taban jaqyndaı tústi.
Bul týrda Qaraǵandynyń «Shahteri» kezekti jeńisine qol jetkizip, týrnır kestesindegi jaǵdaıyn túzep aldy. Al kósh sońyndaǵy «Aqtóbe» «kenshilerden» úsh upaıǵa qalyp keledi. Biraq, aqtóbelikterdiń bir oıyny kem.
Surmergender arasyndaǵy básekede Jerar Goýdyń («Qaırat», 13 dop) kókjelkesinen Jýnıor Kabananga («Astana») qarap tur. Bul shabýylshy sońǵy tórt oıynda alty dop soǵyp, gol sanyn 12-ge jetkizdi. Al, Alekseı Shetkınniń («Tobyl») enshisinde ázirge 8 gol bar.
16-týrdaǵy kezdesýlerde mynadaı nátıjeler tirkeldi:
«Qaırat» – «Tobyl» – 2:0 (0:0), Islamhan, 64 – penaltıden (1:0). Isael, 84 (2:0). «Qaısar» – «Ordabasy» – 0:1 (0:0), Fontanelo, 58 (0:1). «Shahter» – «Atyraý» – 2:0 (1:0), Stanoevıch, 1 (1:0). Stanoevıch, 89 (2:0). «Oqjetpes» – «Aqjaıyq» – 2:1 (2:0), Marochkın, 28 (1:0). Kozlov, 36 (2:0). Azýka, 58 – penaltıden (2:1). «Taraz» – «Ertis» – 2:0 (2:0), Zaınýtdınov, 13 (1:0). Seıdahmet, 24 (2:0). «Aqtóbe» – «Astana» – 2:4 (2:1), Zenkovıch, 18 (1:0). Tvýması, 19 (1:1). Grahovas, 45+2 – óz qaqpasyna (2:1). Kabananga, 47 (2:2). Tvýması, 56 (2:3). Mýjıkov, 86 (2:4).
Kelesi, 17-týr maýsymnyń 24 jáne 25 kúnderi ótedi: «Ertis» – «Qaısar», «Ordabasy» – «Qaırat», «Atyraý» – «Aqtóbe», «Astana» – «Oqjetpes», «Tobyl» – «Shahter», «Aqjaıyq» – «Taraz».
Qaırat ÁBILDINOV, «Egemen Qazaqstan»