– Gúlzada hanym, kóńil-kúıińiz qalaı, halyqaralyq kórme aıasynda Astanada ótip jatqan mádenı sharalar unady ma, sizge?
– Shynymdy aıtaıyn, Astana qalasy dál mundaı bıik mártebege qol jetkizgen shahar ekenin buryn ańdamappyn. Osynda kelgeli óte bir kóterińki kóńil kúıde júrmin. Mundaǵy atmosfera qatty unady. Qazaq eli qaryshtap damyǵan eken.
– «NOMAD WAY» festıvaline qandaı ánderdi tartý etpeksiz?
– Bul sharaǵa jalǵyz men emes, quramynda jıyrmadaı ónerpaz bar qyrǵyzdyń etnofolklorlyq ansambli kelip otyr. Sonyń súıemeldeýimen ári jandy daýysta ulttyq etnomýzykalyq týyndylardy oryndaımyn. Odan keıin meniń ataǵymdy shyǵarǵan «Men qyrǵyz qyzymyn» ánin de qazaq kórermenderine tartý etpekpin.
– Siz ne sebepti etnoóner salasyn tańdadyńyz?
– Men eksperıment jasaýdy unatamyn. Etnodjaz, rok, popsa – osylardyń kez kelgenin tańdaı beremin. Qazir adam balasynyń jan dúnıesinde daǵdarys bar. Adamdar ınternet, áleýmettik jeliden de bir kúni jırenetin bolady. Sóıtip, baıyrǵy tek-tanymyn ańsaıdy. Ol – myna etnomýzyka. Sol sebepti men kóshpendi babalarymyzdyń tabıǵatqa degen syılastyǵy men súıispenshiligi sińirilgen osy etnoónerdi tańdadym.
– Qazaqsha da án aıtatyn kórinesiz.
– Osy festıvalǵa shaqyrtý alǵan kúnnen bastap qazaqtyń eski ánderin tyńdap kórdim. Ásirese, sizderde «qara óleń» dep aıtatyn epıkalyq saryndy ánderge yqylasym aýdy. «Aıt degende óleńdi biz aıtaıyq, kópshiliktiń kóńilin qýantaıyq...» dep bastalatyn halyq ánin ózimniń repertýaryma kirgizdim. Osy ándi jańasha yrǵaqpen oryndaıtyn bolamyn.
– Budan basqa...
– Budan basqa, shoń ánshi apamyz Roza Rymbaevanyń oryndaýyndaǵy «Kýá bol» meniń bala kúnimde kókeıime tereń qonaqtaǵan án edi. Sony da retin taýyp, kópshilikke usynamyn.
– О́z stılińiz qalyptasqan, dara ánshisiz. Osy bıikke qalaı jettińiz?
– Kishkentaı kezimde ataqty ánshilerge eliktep, solardyń mánerine eltip kete berýshi edim. Keıin ánshiniń ózindik bet-beınesi bolýy kerek ekenin túsindim. Ol úshin adamnyń tanymy, aqyly, rýhanı jan dúnıesi úılesim tabýy qajet eken. Osy úılesimdi tapqanda baryp ózimdi tapqandaı boldym.
– Shet elge kóp shyǵasyz ba?
– О́te kóp shyǵamyn. Kóbinde Túrkııada bolamyn. Túrik baýyrlarymyzdyń týrısterge qyzmet kórsetý servısi men koreılerdiń mádenıeti unaıdy. Osy úrdis Qyrǵyzstanda da qalyptassa dep armandaımyn.
– О́zińiz jaıly bir aýyz...
– Osh oblysy, О́zgón óńiriniń týmasymyn. Jasym 37-de. Kúıeýim, eki balam bar.
Áńgimelesken
Beken Qaıratuly, «Egemen Qazaqstan»