Kongress jumysyna Dúnıejúzilik densaýlyq saqtaý uıymynyń Eýropalyq aımaqtyq bıýro basshysy Jýjanna Iаkob pen Qazaqstan Respýblıkasynyń Densaýlyq saqtaý mınıstri Eljan Birtanov, Qazaq taǵamtaný akademııasynyń prezıdenti Tóregeldi Sharmanov, sondaı-aq, Otandyq jáne sheteldik kóshbasshy dárigerler men sarapshylar qatysty.
Basqosýda Elbasy Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» joldaýynda qamtylǵan mindetterdi oryndaý, mindetti áleýmettik saqtandyrý jáne emdelýshi aınalasynda densaýlyq saqtaýdyń barlyq qyzmetterin biriktirý, densaýlyq saqtaýdy damytýǵa baǵyttalǵan 2016-2019 jj. arnalǵan «Densaýlyq» memlekettik baǵdarlamasyn júıeli túrde júzege asyrý sııaqty máseleler keń mazmunda aıtyldy.
– Eýrazııalyq densaýlyq kongresiniń negizgi maqsaty – elimizdegi reformalardy qoldaý. Bul saladaǵy negizgi reformanyń biri mindetti áleýmettik saqtandyrýdy engizý. Osydan eki jyl buryn Ult jospary – «100 naqty qadamdy» qabyldaǵanda Elbasy mindetti medısınalyq saqtandyrýdyń bastamasyn alǵashqy medısınalyq kómektiń negizinde engizýimiz qajettigin tikeleı aıtqan edi. Osyǵan sáıkes elimizdegi bilikti dárigerlerdi jáne álemniń ár qıyrynan kelgen halyqaralyq deńgeıdegi belgili sarapshylardyń basyn qosyp, alǵashqy medısınalyq kómektiń qyzmetin damytýdyń tetikteri turǵysynda aqyldasyp otyrmyz. Bul júıege qatysty týyndaıtyn máseleler óte kóp. Pedıatorlyq qyzmetti damytý, alǵashqy medısınalyq kómekti jetildirý, hronıkalyq aýrýlardy engizý, sonymen qatar medısınalyq kómekterdiń ınfraqurylymyn damytý sııaqty jaıttar búgingi jıynnyń negizgi ózegine aınalyp otyr. Osy máselelerdi jolǵa qoıýda halyqaralyq sarapshylarmen keńesip, jan-jaqty sarapqa salýdyń mańyzdylyǵy zor. Aldaǵy 2018 jyly Dúnıejúzine belgili «Almaty Deklarasııasyna» - 40 jyl tolady. 1978 jyly Almaty qalasynda dúnıejúzilik densaýlyq saqtaý uıymynyń kongresi ótip, Almaty deklarasııasyna qol qoıylǵan. Atalǵan deklarasııa qazir búkil álemge tanymal qujat. Onyń sebebi, qazirgi kezdegi densaýlyq saqtaýdaǵy negizgi prınsıpter men alǵashqy medısınalyq kómektiń mańyzdylyǵy osy qujattyń ón boıynan tabylady. Osy úlken sharaǵa da daıyndyqty qazirden bastaýymyz qajet, – deıdi Qazaqstan Respýblıkasy Densaýlyq saqtaý mınıstri Eljan Birtanov.
Sarapshy mamandar atalǵan kongresstiń áleýmetke baǵyttalǵan medıko-sanıtarly alǵashqy kómekke negizdelgen densaýlyq saqtaýdy tıimdi qalyptastyrý boıynsha usnystardy quraýǵa jáne densaýlyq saqtaý salasyndaǵy kadrlyq resýrstardy damytýǵa tyń serpin beretinin aıtty. Bul shara otandyq jáne sheteldik mamandardyń qoǵamdyq densaýlyq saqtaý jáne mektep medısınasy salasynda, sımýlıasııalyq tehnologııalardy paıdalaný arqyly medıko-sanıtarly alǵashqy kómek deńgeıinde mamandardy daıarlaý isi boıynsha jáne Qazaqstanda mindetti áleýmettik medısınalyq saqtandyrýdy engizý jaǵdaıyndaǵy medıko-sanıtarly alǵashqy kómektiń damýy turǵysynda tájirıbe almasýǵa biriktirý maqsatyn kózdeıdi. Shara barysynda ozyq ǵalymdar tarapynan jıyrmadan astam baıandama oqylyp, medısınalyq týrızm men joǵarytehnologııaly medısınalyq qyzmet boıynsha kórme uıymdastyryldy.
Arman OKTIаBR,
«Egemen Qazaqstan»
ALMATY