«Egemen Qazaqstan» gazetiniń fototilshisi Erlan Omarov «Úzdik fotosýret» atalymy boıynsha «Úrker-2017» birinshi ulttyq syılyǵyna ıe boldy. Bul atalym boıynsha Rojın Maksım, Sársenbek Qyzaıbekuly, Turar Qazanǵapov pen Gerard Stavrıanıdı de úmitkerler qatarynda bolǵan edi.
Saltanatty jıynda sóz alǵan Aqparat jáne kommýnıkasııa mınıstri Dáýren Abaev aqparat salasynyń úzdikterin quttyqtady.
– Qadirmendi áriptester, aqparat jáne baılanys kúnimen shyn júrekten quttyqtaýǵa ruqsat etińizder. Búgin mańyzdy kún, mańyzdy mereke. «Buqaralyq aqparat quraldary týraly» zań jobasyn talqylaý kezinde jýrnalıster mártebesi týraly únemi aıtylyp keledi. Búgingi ótip jatqan ultyq syılyq osy baǵyttaǵy qadamdardyń biri dep bilemin, – dedi Dáýren Abaev.
Júlde 15 atalym boıynsha tabystaldy. Júldege úmitkerlerdi qazylar alqasy tańdady. Qazylar alqasy qatarynda L.N Gýmılev atyndaǵy EUÝ jýrnalıstıka máselelerin zertteý ınstıtýtynyń dırektory Namazaly Omashev, memlekettik jáne qoǵam qaıratkeri Myrzataı Joldasbek, EUÝ jýrnalıstıka jáne saıasattaný fakýltetiniń dekany Qaırat Saq, «Qazaqstan-250» jalpyulttyq qozǵalysy keńesiniń tóraǵasy Muhtar Mankeev, «Nur Otan» partııasynyń saıası taldaý jáne strategııalyq zertteýler ortalyǵynyń dırektory Iýlııa Kýchınskaıa, «Qoǵamdyq kelisim» RMM dırektory Aleksandr Tarakov, Rasýl Jumaly, Murat Ábenov, Meıramhan Jápek, Amangeldi Myrzabekov bar.
Esterińizge sala ketsek, «Úrker» tuńǵysh ulttyq syılyǵy 15 nomınasııadan turady. Olar: «Úzdik aımaqtyq baspasóz basylymy», «Úzdik radıobaǵdarlama», «Úzdik salalyq baspasóz basylym», «Úzdik jyl jýrnaly», «Úzdik respýblıkalyq baspasóz basylymy», «Úzdik reportaj», «Qaznettegi medıaserpilis», «Úzdik aımaqtyq radıostansııa», «Úzdik jýrnalıstik zertteý», «Úzdik ıntervıý», «Qazaqstan týraly úzdik tanymdyq materıal», «Úzdik halyqaralyq saraptamalyq materıal», «Jýrnalıstıkadaǵy debıýt», «Úzdik fotosýret», «Úzdik saraptamalyq materıal». Konkýrsqa ótinish qabyldaý 2017 jyldyń 7 mamyrynan 10-maýsym aralyǵynda júrgizilgen bolatyn. Baıqaýǵa 860-qa jýyq BAQ ókili qatysýǵa nıet tanytqan.
Aıa О́MIRTAI,
"Egemen Qazaqstan"