«Bolashaq energııasy» taqyrybyndaǵy EKSPO kórmesinde Izraıl «Jasampazdyq energııasy» uranyn tý etken. Bul – ızraıldikterdiń bilimimen, kreatıvti daǵdylarymen jáne qushtarlyǵymen úndesken «Bolashaqtyń energııasy». Qazirgi tańda Qazaqstan men Izraıl medısına, agroónerkásip kesheni salalarynda joǵary tehnologııalardy paıdalaný máseleleri boıynsha yntymaqtastyq ornatqan. Bolashaqta qos memleket «jasyl energetıka» salasynda aýqymdy jobalaryn júzege asyrmaq. «Qazaq eli keremet jumys atqardy. Men Qazaqstan úkimeti men «Astana EKSPO-2017» ulttyq kompanııasyn osy ıdeıany júzege asyrýymen quttyqtaımyn. Kórme aıaqtalǵan soń da ol kóp ýaqytqa deıin esten shyqpaıtyny anyq. EKSPO kóptiń aýzynan túspeıtini haq. Men úshin ızraıldik delegasııamen birge kórmege qatysýdyń ózi úlken mártebe», dedi Izraıl Syrtqy ister mınıstrliginiń bas dırektory Iýval Rotem. Saltanatty jıynda qazaqstandyq Qarjy vıse-mınıstri Qanat Baedilov qos memleket arasyndaǵy dıplomatııalyq qarym-qatynasqa 25 jyl tolǵanyn aıtty. Onyń málimetinshe, eki el arasyndaǵy ózara tıimdi yntymaqtastyq senim men dostyqqa negizdelgen. «Qazirgi tańda «Bolashaq energııasy» – álemdik deńgeıdegi ózekti taqyryp. Izraıl – medısına men ınnovasııalyq tehnologııalar salasynda aldyńǵy orynda turǵan el. Biz úshin osy saladaǵy Izraıl tájirıbesi asa qundy jáne olardyń bizben tájirıbe almasýǵa daıyn bolýy erekshe qýantady», dedi ol. Izraıl pavılony kórme aıaqtalǵanǵa deıin qonaqtaryn túrli mádenı sharalarymen tańǵaldyrmaq.
Izraıl memleketi EKSPO-2017 halyqaralyq kórmesi aýmaǵynda ulttyq kúnin atap ótti. Shara aıasynda ızraıldik ánshi Aveva án shyrqap, álemge áıgili «King David Peace Drummers» barabanshylar tobynyń sherýi uıymdastyryldy.