Sodan beri de arada biraz jyl ótti. Biraz sý aqty. Búgingi kúni sol kezde ajary qashqan aýyldardyń da sáni kirip keledi. Eldi mekender ósip-órkendeý jolyna bet bura bastady. Buǵan belgili bir óńirde týyp-ósken, qazirgi kúni týǵan jerinen jyraqta júrse de el-jurtyna paıdasy men kómegin tıgizýdi murat tutqan azamattardyń qosyp júrgen úlesteri qomaqty.
Osyndaı kóńil kúı ahýaly Aqtóbe aımaǵynda aıqyn ańǵarylady. Qazirgi kezde oblysta Memleket basshysy belgilep bergen «Týǵan jer» baǵdarlamasyna qatysty keń aýqymdy is-sharalar kesheni belgilendi. Sonyń biri taıaýda qurylǵan «Týǵan jer» atty áleýmettik júıe bolyp tabylady. Mundaǵy basty maqsattyń biri álemniń ár qıyryna tarydaı shashyrap ketken aqtóbelikterdiń basyn qosyp, olardyń týǵan jer men týǵan topyraqqa qandaı qyzmet jasap júrgenderin pash etý. Bul úshin oblysta aldymyzdaǵy qyrkúıek aıynda «Aqtóbe – qutty meken» atty álemdik aýqymdaǵy basqosý josparlanǵan.
Soǵan sáıkes maýsymnyń mamyrajaı kúnderiniń birinde óńirde kishi kezdesý ótkizilip, oǵan Astana men Almatydan, elimizdiń ózge óńirlerinen jáne taıaý shet elderden Aqtóbe óńirinde týyp-ósken tulǵalar qatysty. Týǵan jerge tý tigý, onyń bir qajetine jaraý – árkimniń azamattyq boryshy. О́teıtin paryzy. Bul árkimniń júreginiń qalaýymen atqarylatyn saýaby mol is. «Aqtóbe – qutty meken» forýmyna ázirlik aıasynda Máskeý qalasyndaǵy «Aqtóbelik jerlester» qoǵamdyq uıymynyń atqarýshy dırektory Sergeı Vorobev óz sózin osy arnada órbitti. Sondaı-aq, ol Germanııa men Izraılde, Amerıka men Avstralııada, Jańa Zelandııa men Japonııada turatyn aqtóbeliktermen de tyǵyz baılanys ustaıtyndaryn jetkizdi. Eń bastysy, olardyń ortaq oılary týyp-ósken topyraǵyna ınvestısııa tartý tóńiregine toqaılasypty.
S.Vorobev týyp-ósken jerin sheksiz súıetinin, bala kezindegi týǵan jeri tabıǵatynyń qaıtalanbas kórinisteri júreginiń túkpirinde máńgi baqı saqtalyp qalǵanyn tereń súıispenshilik sezimmen túıindep berdi. Qazaq halqynyń darhandyǵy men keńdigi, kishiniń úlkenge degen syılastyǵy, al úlkenderdiń kishilerge kórsetken izeti, meniń týyp-ósken topyraǵymnyń basty rýhanı qundylyǵy edi, deıdi ol. Sondaı-aq, Aqtóbede týǵan azamat óz ólkesiniń tóskeıine erte kóktemde eń alǵashqy ushyp jetetin boztorǵaıdyń úni men qasap qar ketip úlgermeı jatyp, jeti qabat jerdi jaryp shyqqan qyzǵaldaqtar saǵynysh sezimin tereńdete túsetinin aqtaryla otyryp aıtqanda, zal ishinde tolqymaǵan jan qalmaǵandaı kórindi.
Bizdiń oıymyzsha týǵan topyraqqa qoldaý kórsetý men qolushyn berýdiń joldary jetkilikti. Munyń ózi de el-jurt aldyndaǵy paryz ben qaryzdy tereń túısine bilý jáne árkimniń óz múmkindigi men qabiletin osy maqsatqa jumyldyra alýynan bastaý alsa kerek-ti. Osy oraıda Aqtóbeniń týmasy, medısına ǵylymdarynyń doktory, professor Jaqsylyq Dosqalıevtiń óńirde hırýrgııa men transplantologııa salasyn jańa sapalyq deńgeıge kóterý jóninde aıqyn maqsat josparlar qurǵany da qoldaýǵa ábden laıyqty der edik. Osyndaı maqsat aıasynda ol búgingi kúnderi jas mamandar úshin sheberlik klastaryn ótkizip, buǵan deıin oblys kóleminde jasalmaǵan kúrdeli otalardy iske asyrýǵa óz yqpaly men kómegin kórsetýdi oılastyryp otyr eken. Jalpy, bul arada ózge óńirlermen salystyra qaraǵanda, aqtóbelik hırýrg-dárigerler búırek jáne baýyr almastyrý otalaryn qazirdiń ózinde sheber meńgerip alǵandaryn aıtqan jón. О́ńir medısınasy órge basqanynyń basty bir kórsetkishi bul.
Túıindep aıtqanda, oblysta týǵan jerin kórkeıtýge bel býyp, bul iske óz úlesterin qosýdy maqsat etken aqtóbelikter qatary júzdep, myńdap sanalady. Sóz joq, bul asa ıgi is, baıypty bastama. Elge degen perzenttik paryzdyń boı kóterýiniń basty ındeksi. Al qazirgi kezde Aqtóbe aımaǵynan tys turatyn, bul eldiń maqtan tutar ul-qyzdary ázirlep otyrǵan áleýmettik jobalar da az emes. Onyń keıbir mysaldaryn joǵaryda aıtyp ketken bolsaq, osy qatarǵa halqymyzdyń talantty qyzdarynyń biri, belgili ánshi Janar Aıjanovany da qosýǵa bolady. Onyń óz eline tıgize bastaǵan kómegi «qanatymen sý sepken qarlyǵashtan» da asyp túsetinin sezindik. «Aqtóbe – qutty meken» álemniń ár qıyryna taralyp ketken aqtóbelikter jan-jaqtan jıylyp ótkizetin forýmnyń ataýy ǵana emes. Eń bastysy, bul – óńirlik «Týǵan jer» baǵdarlamasynyń basty tuǵyry.
Temir Qusaıyn, «Egemen Qazaqstan»
Aqtóbe