Renata Tebaldı atyndaǵy baıqaýdyń negizin qalaýshy ári dırektory, Lýchano Pavarottıdiń áriptesi, maestro Aýgýsto Chıavatta, sondaı-aq, La Skala teatrynyń áıgili vıolonchel sheberi Klaýdıo Kazadeı tárizdi talǵamy bıik ádilqazylar alqasyn óz ónerimen súısintip qaıtqan qazaq balasynyń bul bir ǵana jetistigi emes. Osy jyldyń sáýir aıynda Reseıdiń Sankt-Peterbýrg qalasyndaǵy orystyń ataqty opera ánshisi Elena Obrazsova zalynda jeke operalyq konsertin ótkizgen Qýat Baǵysbek tek shetel kompozıtorlarynyń týyndylaryn ǵana emes, qazaq halyq ánderin de oryndap, kórermenderdiń ystyq yqylasyna bólengen. Aıryqsha daýysty jas talanttyń joǵarǵy deńgeıde ótken keshin RF eńbek sińirgen ártisi Marııa Romanova júrgizse, reseılik tanymal pıanıst Dmıtrıı Mıanchın mýzykalyq súıemeldeýshi bolǵan.
Bala kezden respýblıkalyq jáne alys-jaqyn shetelderdegi án baıqaýlaryna qatysyp, jeńimpaz atanyp júrgen Qurmanǵazy atyndaǵy Qazaq ulttyq konservatorııasynyń túlegi sondaı-aq, Londonda jeke konsertin de ótkizip úlgeripti. QR Táýelsizdiginiń 25 jyldyǵyna arnap Almatyda da jeke konsertin ótkizgen tenor daýysty daryndy ánshi Qýat Baǵysbektiń álem sahnalarynda tek opera ǵana emes, arııalardy, klassıkalyq ánderdi de shyrqap, elder arasyndaǵy mádenı almasýlar baǵytyndaǵy sharalarǵa atsalysyp júrgenin aıta ketken jón.
Italııadaǵy baıqaýdan alǵan júldesin aldymen «Egemen Qazaqstan» redaksııasyna kórsetip, súıinshi suraǵan ánshiniń ózi: «Mundaı halyqaralyq baıqaýlarǵa qatysý úshin úlken irikteýlerden, túrli synnan súrinbeı ótý qajet... Endi aldaǵy ýaqytta jarty jyl shetelde bilimimdi shyńdasam degen josparym bar», – dep, óz qýanyshymen bólisti. Anglııa, Grekııa, Germanııa, Ońtústik Koreıa, Túrkııa, Lıtva, Reseıdiń úlken sahnalarynda opera, klassıkalyq krossover, pop-mýzyka men folklor syndy túrli janrda, túrli dáýirdiń túrli mánerinde án shyrqap júrgen, álemdik mýzyka qazynasynyń sanatyna engen qazaq halyq ánderin nasıhattaýdy maqsat etken Qýattyń da qýatty daýyspen áli talaı shyńdy baǵyndyryp, elimizdiń atyn asqaqtatary anyq.
Mıra BAIBEK, «Egemen Qazaqstan»