Qazaq jáne orys tilderinde, sonymen qatar aǵylshyn tilinde sýbtıtrlary bar bul dıskiniń tusaýkeser rásimin «Qazaqfılm» kınostýdııasy, «CentauRus Rustem Abdrashev production» jáne «Meloman» kompanııalary uıymdastyrǵan.
Qazaq handyǵynyń 550 jyldyǵyna oraı túsirilgen «Qazaq handyǵy» kınoserıalynyń kınonusqasy – «Almas qylysh» fılmi Mádenıet jáne sport mınıstrliginiń tapsyrysy boıynsha jaryqqa shyqqan bolatyn. Bul aýqymdy jobanyń ıdeıa avtory – Elbasy N.Á.Nazarbaev. Fılmniń ssenarııi Ilııas Esenberlınniń «Almas qylysh» romanynyń negizinde jazylǵan.
2017 jyly 5 qańtarda jalpyulttyq prokatqa shyqqan atalmysh tolyqmetrajdy kórkem fılm qazaqstandyq prokatta 72 mıllıon teńgeden astam qarjy jınady. Jalpy alǵanda 2,5 myńnan astam seans, onyń 60 paıyzy qazaq tilinde, 40 paıyzy orys tilinde kórsetildi. «Almas qylysh» tarıhı kınotýyndysynyń DVD nusqasyn elimizdiń aýmaǵynda «Meloman» dúkender jelisi arqyly satyp alýǵa bolady. Odan bólek, Rústem Ábdirash «Qazaq handyǵy» serıalynyń ekinshi maýsymynyń túsirilim jumystary qyrkúıek aıynan bastalatynyn qýana jetkizdi.
Baǵashar TURSYNBAIULY, «Egemen Qazaqstan»
ALMATY