Ult josparynyń birqatar qadamyn júzege asyrý Aqparat jáne kommýnıkasııalar mınıstrligine júktelgeni belgili. Osy mindetter boıynsha mınıstrlik tarapynan qandaı jumystar atqaryldy? Qandaı kórsetkishterge qol jetkizildi?
– Eń aldymen, «Esep beretin memleket qalyptastyrý» jónindegi 5-baǵytqa toqtalsaq. Osy baǵyt boıynsha Ult josparynyń 94, 96 jáne 100-qadamdary júzege asyryldy. Tarqatyp aıtar bolsam, 94-qadam boıynsha «Aqparatqa qol jetkizý týraly» Zań qabyldandy. Atalmysh zań azamattyq qoǵam tarapynan úlken qoldaýǵa ıe boldy. Munyń basty sebebi – qujattardy ázirleýge úkimettik emes uıymdardyń belsene atsalysýy. Shyny kerek, bul zańda kóptegen ońdy bastamalar qabyldandy. Osynyń barlyǵy árbir azamattyń memlekettik organdar qyzmeti týraly aqparatty erkin alýy men taratý quqyǵyn qamtamasyz etýge múmkindik berip otyr. Búgingi kúni komıssııa memlekettiń ashyqtyǵy men eseptiligin arttyrýdy baǵdarǵa ala otyryp, belsendi jumys júrgizip jatyr, – dedi Aqparat jáne kommýnıkasııalar mınıstri.
Ol sondaı-aq, osy zańnyń taǵy bir tıimdi tusy – aqparattarǵa qol jetkizýde shekteý qoıylmaý jaǵy qarastyrylǵanyn da atap ótti. Al osyny buzǵan laýazymdy tulǵalardy jaýapkershilikke tartý máselesi de qarastyrylǵanyn málimdedi. Osy baǵytta konsýltatıvtik keńesshi organ aqparatqa qol jetkizý máselesi jóninde komıssııa qurylyp, onyń quramyna osy zańdy ázirleýge qatysqan tulǵalar men azamattyq qoǵam músheleri endi.
Al Ult josparynyń 96-qadamyn júzege asyrý barysynda «Ashyq úkimettiń» barlyq júıesi iske qosyldy, ıaǵnı «Ashyq úkimet» portalynda «Ashyq derekter», «Ashyq normatıvtik-quqyqtyq aktiler» (Ashyq NQA), «Ashyq bıýdjetter», «Ashyq dıalog», sondaı-aq «Memlekettik organdar qyzmetiniń tıimdiligin baǵalaý» bólimi ashyldy.
Árqaısysyna qysqasha toqtala keteıik. «Ashyq NQA» portalyna kirgen kez kelgen adam memlekettik organdardyń normatıvtik quqyqtyq aktileri jobalarynyń, sondaı-aq, zań jobasy tujyrymdamasynyń talqysyna qatysa alady. Qazirgi tańda portalda qoǵamdyq talqyǵa 420-dan astam qujat usynylǵan. Al ótken jyly jeti myńnan astam NQA jobasy jarııalanǵan eken.
«Ashyq bıýdjetter» bóliminde qarjynyń qalaı jumsalyp jatqanyn, ıaǵnı shyǵyndardy baqylaýǵa múmkindik bar. Búginde portalda 13 myńnan astam bıýdjet jobalaryn kórýge múmkindik bar. Sonymen qatar, «Ashyq derekterde» 2300 málimet jınalǵany da belgili boldy.
«Ashyq dıalogta» memlekettik organ qyzmetkerlerine tikeleı saýal joldaýǵa bolady. Búginde bul bólimge 191 myńnan astam saýaldama joldansa, sonyń 140 myńyna jaýap berilgen eken.
– «Ashyq úkimet» – qazirgi ýaqytta elimizde demokratııalyq qoǵamdy qurýdyń birden bir ońtaıly ádisi dep aıtýǵa bolady. Endi árbir memlekettik organ óz bıýdjetin ashyq túrde jarııalaýǵa mindetteledi. Osynyń arqasynda kez kelgen qazaqstandyqtyń bıýdjet shyǵyndaryn baqylaýyna múmkindik týady. Árıne, «qupııa» degen bóliminen ózgeleri bárine qoljetimdi bolady. Al «Ashyq dıalogta» kez kelgen joǵarǵy laýazymdy portalǵa joldanǵan árbir suraqqa jaýap berýi tıis. Memlekettik organ zań jobasyn qabyldar kezde halyqtyń pikirimen sanasýy qajet, – dedi Dáýren Abaev.
Sonymen qatar, «Ashyq úkimet» portalyna aqparat jarııalaıtyn jaýapty memlekettik qyzmetkerlerdi oqytý jumystary júrgizilip jatyr. Mınıstrdiń aıtýynsha, qazirgi ýaqytta barlyǵy 9 ortalyq memlekettik organda 137 adam oqytyldy.
Memlekettik organdardyń statıstıkalyq bazalaryn onlaın júıege, ıaǵnı elektrondy úlgige keltirý arqyly ýaqytty únemdi paıdalanýǵa bolady. Dáýren Abaev osy arqyly jemqorlyqqa da tusaý salýǵa bolatynyn erekshe atap ótti. Osy sebepti Ult josparynyń 100-qadamynda memlekettik qyzmetterdi avtomattandyrý mindeti qoıylǵan.
Buǵan baılanysty, byltyr «Azamattarǵa arnalǵan úkimet» memlekettik korporasııasy quryldy. Qazirgi sátte bul korporasııa arqyly bas-aıaǵy 723 memlekettik qyzmettiń 548-ine nemese 76 paıyzyna qol jetkizýge bolady. Endi osy kórsetkishti 85 paıyzǵa deıin arttyrý josparlanyp otyr.
«Azamattarǵa arnalǵan úkimet» korporasııasyna qarasty elimizde barlyǵy 350 halyqqa qyzmet kórsetý ortalyǵy bar. Bas-aıaǵy 20 myńnan astam adam jumys isteıdi. Olar jyl saıyn 37 mıllıonnan astam qyzmet kórsetedi. Al bıyl, ıaǵnı alty aıdyń kórsetkishi boıynsha 21 mıllıonnan astam qyzmet kórsetilgen eken. Onyń 14 mıllıony, ıaǵnı 67 paıyzy elektrondy nusqada júzege asypty.
Sonymen qatar, avtokólikterdi esepke qoıý jáne júrgizýshilik kýálikterdi tapsyrý boıynsha mamandandyrylǵan halyqqa qyzmet kórsetý ortalyqtary (MHQK) jumysynyń jetildirýi qamtamasyz etilip otyr. Qazir 12 MHQK jumys isteıdi. Osy jyldyń alǵashqy jartyjyldyǵynda 172 myńnan astam júrgizýshilik kýáligi tapsyrylǵan, sondaı-aq, 701 myń kólik esepke qoıylyp, dál osynshasy esepten alynǵan.
Budan bólek, qyzmetkerlerdiń múmkingi shekteýli jandarmen de jumys isteý ádisi úıretildi. Qazir 862 adam ymdaý tilinde oqytyldy.
Aıta keteıik, esep beretin memleketti qalyptastyrý mindeti 91-100 qadamdardy qamtıdy. Aqparat jáne kommýnıkasııalar mınıstrligi bes ınstıtýsıonaldyq reformany iske asyrýdyń úsh qadamyn oryndap otyr.
Aıan ÁBDÝÁLI, «Egemen Qazaqstan»