Páteraqynyń qymbattyǵynan bastap, qojaıynnyń qatal talaptary men páterden páterge aýysyp júrýdiń moraldyq qıyndyqtaryna deıin qamtyp, jeli oqyrmandarynyń jan-júıesin eljiretti. Ol jazbalardy unatyp, pikir bildirip, tipti bólisken adamdardyń da qarasy mol boldy. Tipti tanymal jýrnalıster, blogerler, ustazdar, aqyn-jazýshylar jeke jazba arnap, baspana máselesin kótergen heshtegke qatysty óz pikirlerin bildirdi. Sebebi túsinikti. Baspana zary – áleýmetke ortaq úlken másele. Álgi jazbalardyń biri bolmasa biri másele sheshetin tıisti organdardyń jumysyna qyldaı bolsa da áser etip jatsa, biz qýanamyz. Biraq, bul jerde meniń aıtqym kelgeni basqa nárse. Uly dala – qazaq úshin kıeli de úlken uǵym. Ol – Altaıdan Qara teńizge deıingi aralyqtaǵy qazaqtyń ómir súrgen mekeni. Uly dala – erkindikte ǵumyr keshken rýhy kóterińki jaýynger halqymyzdyń, qan maıdandardaǵy uly jeńisterimizdiń sımvoly, oǵan qosa rýhanı keńistigimiz. Uly dalany biz birligi jarasqan elsiz, saltanatty kóshsiz, at tuıaǵynyń dúbirinsiz elestete almaımyz. Mıymyzda ábden ornyǵyp, qasterli uǵymǵa aınalǵan «Uly dalany» elge telý týraly Elbasynyń eki jyl burynǵy usynysy da este. Ol Qazaqstannyń halyqtyq ataýy «Uly dala eli» bolýy kerektigin aıtqan edi. Ulttyń jadynda ómir súrip kele jatqan uǵym jańǵyryp, sonyń sheńberinde birshama jaqsy ıdeıalar da týyndaýda. Al, endi myna «Uly Dala kvartırantynyń» jóni múlde bólek. Bul – Uly dalany ulyqtaý da, uly uǵymǵa qurmet te emes. «Kvartırantty» qosaqtaý arqyly eleń etkizerlik sóz tapqanǵa qýanyp, áleýmetke ony ótkizýdiń utymdy tásili shyǵar? Osydan biraz buryn bir jas ánshiniń «Uly dala balasy» degen atpen efırden túspeı qoıǵanyn kórgende «Uly dalany» qıqymdaı balanyń menshigi qylǵan qudiretti kúsh ne boldy eken dep oılap edik. Endi myna heshtegti kórip qolǵa qalam almaýǵa bolmady. Meıli, pikirime qarsy bolatyndar trendti aıtyp, brendti túsindirip biraz aqyl aıtar. Biraq, kim-kimniń de uly uǵymdardyń qadirin qashyrýǵa, kúlki etýge nemese kóz aldymyzda alasartýǵa qaqysy joq.
Aıgúl SEIILOVA, «Egemen Qazaqstan»