«О́skemenim, qashan senen qazaqy ot kóremin» dep jyrlap edi dúnıeden jaryq juldyzdaı jarq etip aǵyp ótken aqyn, rejısser Rústem Esdáýletov. О́skemen óneriniń tasyn órge domalatýǵa ólsheýsiz úles qosqan daryndy jastyń armany endi oryndala bastaǵan sekildi. Jaqynda óndiristi shahardyń kórnekti jerlerine alashtyń ardaqtylary, ult ustazdary Álıhan Bókeıhan, Ahmet Baıtursynuly, Mirjaqyp Dýlatovtyń kósheli sózderiniń ilinýi sózimizge dálel. Sanaly ǵumyryn mıllátiniń múddesine arnaǵan tulǵalardyń «Ultyna, jurtyna qyzmet etý – bilimnen emes, minezden», «Jurt ádil bolmaı, jurt isi ońǵa baspaıdy» (Álıhan Bókeıhan), «Balam deıtin jurt bolmasa – jurtym deıtin bala qaıdan shyqsyn», «Adamǵa eń qymbat nárse – jurt qamy, jurt isi» (Ahmet Baıtursynuly) degen sekildi salıqaly sózderi qala kósheleriniń ajaryn ashyp, kórkin kirgize túskendeı.
О́skemen qalalyq ishki saıasat bóliminiń qyzmetkeri Álibek Tursymbetov keskekti dáýirdiń kesek qaıratkerleriniń qanatty sózderi «Alash» partııasynyń 100 jyldyǵy men Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda kórsetilgen mindetterdi júzege asyrý aıasynda shahardyń Qazaqstan, M.Gorkıı kósheleri jáne Q.Sátpaev, Táýelsizdik, Abaı, Jeńis dańǵyldary boıyndaǵy 19 bılbordqa ornalastyrylǵanyn aıtady. «Aldaǵy ýaqytta qala kóshelerine Shákárim Qudaıberdiuly, Raıymjan Mársekov, Mánnan Turǵanbaev, Bıahmet Sársenov syndy alashtyń ózge de qaıratkerleriniń taǵylymdy sózderin ilýdi josparlap otyrmyz. Budan bólek óńir tarıhynyń tereńnen tamyr tartatynyn aıǵaqtaıtyn Berel, Shilikti qorǵandary, Jıdebaı sekildi tarıhı oryndar týraly syr shertetin qundy maǵlumattardy da shahardyń kórnekti jerlerine ornalastyrmaq oıdamyz», deıdi ol.
Azamat QASYM, «Egemen Qazaqstan»
О́SKEMEN