«Jándikter» atty 50 betke taıaý kitapshada jándikter álemi týraly qysqa maǵlumattardy túrli-tústi ádemi sýrettermen bergen. Aıtalyq, kóbelektiń oryssha, qazaqsha, aǵylshynsha ataýy qatar tur. Al «Kókónister» kitapshasynda onyń san alýan túrleri baryn aıta otyryp, balalar kúnde kórip júrgen asqabaq, qarbyz, qaýyn, qııar, taǵy basqa kókónisterden qysqa da nusqa málimet beredi. «Qustar» jınaǵynda búrkit, qarshyǵa, tuıǵyn týraly, «Balyqtar», «Janýarlar» «Aǵashtar» taqyrybyndaǵy kitapshalarda ártúrli derekterdi sýretpen ushtastyrǵan. Sol sekildi, balalardyń bir-birine degen týystyǵy da «Týystar» atty kitapshada ádemi kórinis tapqan. Ata, áje, ana, apa, aǵa, ápke, jezde, ózge de ataýlarǵa jan-jaqty túsinikteme beredi. Munyń bárin balalardyń ózderi baıandaıdy. Kitapshalardy jaryqqa shyǵarýǵa ǵalymdar, jýrnalıster atsalysypty.
Qazir úsh tildilik týraly kóp aıtylady. Sol máseleni osyndaı uǵynyqty tilmen jazylǵan eńbekter arqyly jetkizsek degen nıet quptaýǵa turady. Eń bastysy, balalardyń qorshaǵan ortany tanyp bilýine, til ushtaýyna, kitapshalardaǵy derekterdi kúndelikti sabaǵyna qoldanýyna bolady. Aldaǵy ýaqytta bul ıgi is jalǵasyn taýyp, ulttyq qundylyqtarymyz osyndaı úlgimen ul-qyzdyń qolyna jetip jatsa, nur ústine nur bolary haq.
Súleımen MÁMET, «Egemen Qazaqstan»