London qalasynan saparyn bastaǵan Krıs Ramsı Astanaǵa «Nissan Leaf» elektromobılimen 36 kúnde jetken. London-Mońǵolııa rallıi Eýropa elderi, Ortalyq Azııa, Mońǵolııa arqyly ótip, reseılik Ýlan-Ýde qalasynda aıaqtalady. 21 tamyzda Ramsı óziniń elektromobılimen Qazaqstan elordasyna jetip, 25 tamyzda Semeı arqyly jolyn jalǵastyrmaq.
«Atalǵan jarysqa bıyl 2500 kólik qatysýda. Negizi London-Mońǵolııa jarysy bıyl 14-ret ótkizilip jatyr. Qazaqstandaǵy saıahatymyzdy Aqtaýdan bastap, Aqtóbege bardyq. Endi mine Astanaǵa da jettik. Kóligimiz bir qýattanǵannan keıin orta eseppen 160-260 shaqyrymdaı joldy eńseredi. Qazaqstannyń «Qazposhta» jáne «QazMunaıGaz» sekildi kompanııalary kómek kórsetip, óńirlerdegi mekemelerinde kóligimizdi qýattandyrýǵa ruqsat berdi. Sol úshin aıtar alǵysymyz sheksiz. Sonymen qatar, men 2019 jyly ótetin «80 DAY RACE» dúnıejúzilik jarysyna qatysamyn», dedi Krıs Ramsı.
Jıyn barysynda «80 Day Race» jarysynyń negizin salýshy Frank Manders jáne «Astana Konvenshn Bıýro» JShS dırektory Sanııar Áıtekenov «80 Day Race» dúnıejúzilik jarysynyń shabandozdary aıaldaıtyn toǵyz qalanyń biri retinde Astananyń dodaǵa qatysatyny jóninde memorandýmǵa qol qoıdy. Parıjdegi Eıfel munarasynan bastaý alatyn jarysqa qatysýshylar 9 iri qala arqyly jer sharyn aınalyp, saıahat jasaıdy. Sonyń biri – Astana qalasy.
«Biz 21 tamyzda Astana qalasynyń ákimi Áset Isekeshevpen kezdestik. Qazaqstan – bolashaqty jasap, qarqyndy damyp kele jatqan ınnovasııalyq, bıik maqsattardy kózdegen el. Soǵan qosa, Qazaqstannyń jańa dúnıelerge degen ashyqtyǵy jáne bolashaq tehnologııalarǵa qyzyǵýshylyǵy EKSPO-2017 «Bolashaq energııasy» kórmesi arqyly kórinis taýyp jatyr. «80 Day Race» jarysy da bolashaq tehnologııalardy keńinen taratýdy kózdeıdi. Sol sebepti Astana qalasynyń jarysty qabyldaýǵa keliskenine biz asa qýanyshtymyz», dedi «80 Day Race» jarysynyń negizin salýshy Frank Manders.
Dúnıejúzilik jarys aıasynda 40-qa jýyq top 40 000 shaqyrymǵa sozylǵan joldy júrip ótip, 80 kún ishinde Parıjge keri qaıtady. Olar kúnine 500 shaqyrymnan asa joldy eńserýge tıis. Bir ereksheligi, shabandozdar tek jańǵyrmaly qorlardy tutynatyn kólikpen ǵana jarysqa túse alady.
Spıkerlerdiń aıtýynsha, «80 Day Race» syndy aýqymdy dodany ótkizý ıdeıasy Nıderlandta týyndaǵan. Al onyń basty maqsaty - ekologııalyq taza kólik týraly jáne jasyl tehnologııalardy keńinen qoldanýǵa bolatyndyǵy jaıly búkil álem jurtshylyǵyn habardar etý.
Aıgúl ShERNIIаZ,
«Egemen Qazaqstan»