Ol jartylaı fınalda aǵylshyndyq boksshy Pıter MakGreıldi jeńdi.
Búgin bokstan Germanııanyń Gambýrg qalasynda ótip jatqan Bokstan álem chempıonatynyń jartylaı fınaldyq básekesi bastaldy. Qazaqstandyq boksshylardan ekinshi bolyp rıng tórine 56 kılodaǵy otandasymyz Qaırat Erálıev shyqty. Ol 2017 jylǵy Eýropa chempıony aǵylshyndyq boksshy Pıter MakGreılmen judyryqtasyp, upaı sany boıynsha basym tústi.
Alǵashqy raýndta boksshylar bir-birimen ańdysyp, álsiz tustaryn izdeýge tyrysyp kórdi. Al raýndtyń sońǵy bir mınýtynda eki boksshy da ashyq jekpe-jekke kirisip, biraz soqqy almasqan bolatyn. Biraq, eki boksshyda anyq soqqy jasaı almady.
Ekinshi raýndty Qaırat Erálıev shıraq bastap, kóp soqqy jasady. Nátıjesinde, eki soqqysynyń biri qarsylasyna dóp tıip jatty. Al MakGreıl qarsy shabýylǵa ıek artyp kórgen edi, alaıda Qaırat jyldamdyǵynyń arqasynda aǵylshyndyq boksshynyń soqqylaryn ózine tıgizbedi.
Úshinshi raýndta da Qaırat qaırattylyq tanytyp, qarsylasynan bir bas joǵary ekenin dáldedi. Jekpe-jek qorytyndysy boıynsha Qaırat Erálıev qarsylasyn aıqyn basymdyqpen utyp, álem chempıonatynyń fınalyna shyqty. Endi ol fınalda amerıkalyq boksshy - Dıýk Raganmen altyn medal úshin synǵa túsetin bolady.
Aıta keteıik, Qaırat Erálıevte kem degende álem birinshiliginiń kúmis júldesi bar. Ol 2013 jyly Almatyda ótken álem chempıonatyndaǵy nátıjesin jaqsartty. Sol jyly Qaırat ázerbaıjandyq Djavıd Chelebıevten jeńilip, qola júlde enshilegen bolatyn.