Bıyl Aqtóbe aımaǵyndaǵy mektepter 132 myńnan astam oqýshyny qabyldaǵan bolsa, olardyń 16 myńnan astamy mektep tabaldyryǵyn jańa attaǵan búldirshinder. Iаǵnı bilim berý ǵımarattaryna «tarydaı bolyp kirgender». О́mir bir ornynda turmaıdy. Ol únemi alǵa qaraı úzdiksiz damý, jyljý, ósý ústinde. Soǵan sáıkes mektepterde bilim alatyn oqýshylardyń sany da jyl saıyn odan ári arta túsýde.
О́zge óńirlermen salystyra qaraǵanda bul oń úrdistiń geometrııalyq qarqyny Aqtóbe aımaǵynda basym ekeni aıqyn baıqalady. Osyndaı jaǵymdy, oń demografııalyq jáne aglomerasııalyq ósim men faktor aldyn ala muqııat eskerilgen óńirde qazirgi kúni 25 jalpy orta bilim beretin mekteptiń qurylysy qarqyndy júrgizilip keledi. Aldaǵy oqý jylynan bastap 11 myńǵa jýyq balanyń oıdaǵydaı bilim alýyna arnalǵan mektep ǵımarattary qurylysyna 25 mıllıard teńgeden astam qomaqty qarajat bólingen.
Al kúni keshe ǵana elimizdiń túkpir-túkpirindegi mektepterde qońyraý soǵylyp, jańa oqý jyly bastalyp ketkeni málim. Qońyraý syńǵyrymen birge myńdaǵan aqtóbelik órender oqýdy syńǵyrlaǵan sý jańa ǵımarattarda bastaýǵa múmkindik aldy. Júzderi qýanyshtan jaınaǵan jas ulandardyń osy mereıli de baqytty sátterine Aqtóbe oblysynyń ákimi Berdibek Saparbaev ortaqtasyp, olardyń aldaǵy qadamdaryna sát-sapar tiledi.
Aıtalyq búgingi kúni oblys ortalyǵynda qurylys keńinen qanat jaıǵan aýdandardyń biri «Batys-2» turǵyn úı aýmaǵy bolsa, bul jerde turǵyndar sanynyń ósýine oraı jańa mektep ǵımarattarynyń boı kóterýi qajettigi eshqandaı talas týǵyzbaıdy. Solaı boldy da. Osyndaǵy 320 jáne 620 oqýshyǵa arnalǵan jańa mektepter sapaly bilim berý normalary men joǵary standarttarǵa sáıkes turǵyzylǵan.
Jańa bilim berý nysandary eń sońǵy úlgidegi jańa tehnologııalarmen, oqý kabınetterimen, kompıýter-kitaphanalarmen jabdyqtalǵan. Sonymen birge sport jáne májilis zaldary, mýltımedııalyq qural-jabdyqtarymen ınteraktıvti taqtalar da jańa mektep ǵımarattarynyń bási men mártebesin bıiktete túsedi. Dál osyndaı oqý ǵımaratynyń biri Aqtóbe qalasynyń irgesindegi Nokın aýylynda da boı kóterip, bilim kúni esigin aıqara ashty.
Jańa oqý jylynda jańa mektep ǵımarattarynyń paıdalanýǵa berilý rásimi shalǵaıdaǵy Shalqar, Yrǵyz, Oıyl jáne Muǵaljar aýdandaryn da ótkizildi. Olardyń árqaısysy 600 oqýshyǵa arnalǵan. Osy oraıda eldiń sheti men jeldiń ótinde ornalasqan aýdandarda turǵyzylǵan búgingi zamannyń bıik talaptaryna tolyqtaı jaýap bere alatyn bilim berý nysandary oblystaǵy apatty jaǵdaıda turǵan jáne úsh aýysymdyq bilim beretin mektepterdi aıta ketýdiń ózi úlken mártebe.
Osylaısha oblysta atalǵan sanattaǵy mektepterdi joıý jónindegi belgilengen is-sharalar men keshendi jumystar ájeptáýir sheshimin tapty dep túıin jasaýǵa tolyq negiz bar. Sóz sońynda Aqtóbe aımaǵynda bilim kúni oqýshylar men ata-analardyń jáne ustazdardyń qýanyshtaryn kól-kósir qylǵan jańa mektep ǵımarattary Elbasy belgilep bergen «Nurly jol» baǵdarlamasynyń tıgizgen shapaǵaty ekenin oqýshylar nazaryna berýdi basty paryzymyzdyń biri dep bilemiz.
Temir QUSAIYN, «Egemen Qazaqstan»
Aqtóbe oblysy
Sýrette: Jańa mektepterdiń ashylý rásiminen kórinis