Qaraǵandy oblysynyń Nura aýdanyna qarasty «Shahter» aýylynda Konstıtýsııa kúnine oraı dene shynyqtyrý-saýyqtyrý sport kesheni ashyldy. Jańadan boı kótergen qos qabatty ǵımaratqa «Shahterskoe» seriktestiginen 100 mln jáne oblystyq bıýdjetten 156 mln teńge qarjy qarastyrylǵan.
Atalmysh keshende úsh zal jumys atqarady. 160 kórermenge arnalǵan minberi bar ámbebap oıyn zalynda boks rıngi de ornatylǵan. Kúres zaly jáne trenajerlyq zal bar. Nysannyń aýmaǵy 1337 sharshy metr. Bul ǵımaratta «Shahter» aýylynyń turǵyndary ǵana emes, kórshiles aýyldardyń sportqa qyzyǵýshylyq tanytqan balalary da jattyǵýyna bolady. Keshende kúnine 100-den asa bala birneshe seksııada sheberlikterin shyńdaıdy. Atalmysh ǵımarattyń ashylý saltanatynda sóz sóılegen aýdan ákiminiń orynbasary M.Turarov aıtqandaı, aıtýly mereke qarsańynda jańa keshenniń iske qosylyp jatqany – aýdan tarıhyndaǵy asa mańyzdy oqıǵa. Bul qadam aýyldyń áleýmettik ınfraqurylymyn damytýǵa, turǵyndardyń jaǵdaıyn jaqsartýǵa zor múmkindik beredi.
– О́tken jyly atalǵan aýylda zaman talabyna saı jabdyqtalǵan kókónis qoımasy, júzý basseıni boı kótergen edi. Osyndaı ıgi ister oblystyq máslıhattyń depýtaty, «Otan» ordeniniń ıegeri G.Prokop basshylyq etip otyrǵan «Shahterskoe» seriktestiginiń arqasynda júzege asýda. Al aýyldyq jerde dene shynyqtyrý-saýyqtyrý keshenin iske qosý Elbasy Nursultan Ábishuly Nazarbaevtyń «Bolashaqqa baǵdar: rýhanı jańǵyrý» maqalasyndaǵy «Týǵan jer» baǵdarlamasyn tıimdi iske asyrý men naǵyz patrıotızmniń kórinisi bolyp otyr, – dedi ákimniń orynbasary.
Saltanatty sharaǵa oblystyń dene shynyqtyrý jáne sport basqarmasynyń basshysy Natalıa Sýhorýkova, Qazaqstan Kásipodaqtar federasııasynyń tóraǵasy Ábilǵazy Qusaıynov, Nura aýdanynyń qurmetti azamaty Daýylbaı Qusaıynov arnaıy qatysyp, izgi tilekterin bildirdi. Ábilǵazy Qusaıynov Kásipodaqtar federasııasynyń atynan G.Prokopqa Alǵys hat tabys etti.
Mıras ASAN, «Egemen Qazaqstan»
Qaraǵandy oblysy, Nura aýdany